మహబూబ్ నగర్ పాలిటెక్నిక్ కాలేజీలో ప్రైవేట్ వీడియోల వ్యవహారం తీవ్ర కలకలం సృష్టించింది. బాలికల వాష్రూంలో మొబైల్ ఫోన్ ఉపయోగించి వీడియోలు రికార్డు చేస్తున్నట్లు విద్యార్థినులు గుర్తించడం దీనికి కారణమైంది. ఈ ఘటన పట్ల విద్యార్థులు, విద్యార్థి సంఘాలు కఠిన చర్యలు తీసుకోవాలని డిమాండ్ చేస్తూ కాలేజీ ఎదుట ఆందోళనకు దిగాయి.
వివరాల్లోకి వెళితే, బ్యాక్లాగ్ పరీక్ష రాసేందుకు వచ్చిన సిద్ధార్థ్ అనే విద్యార్థి ఈ చర్యకు పాల్పడినట్లు అధికారులు గుర్తించారు. అతడు వాష్రూంలో మొబైల్ ఫోన్ పెట్టి వీడియో రికార్డింగ్ చేస్తున్నట్లు తేలింది. విద్యార్థినులు దీనిని గుర్తించి వెంటనే కాలేజీ యాజమాన్యానికి సమాచారం ఇచ్చారు. ఈ పరిణామం వల్ల కాలేజీ ప్రాంగణం ఉద్రిక్తంగా మారింది. విద్యార్థి సంఘాలు మరియు బాధిత విద్యార్థినుల కుటుంబ సభ్యులు కాలేజీ ఎదుట ఆందోళన చేపట్టారు. ఈ వ్యవహారంపై కఠినంగా స్పందించాలని, బాధ్యులపై చట్టపరమైన చర్యలు తీసుకోవాలని వారు డిమాండ్ చేశారు. ఘటనా స్థలానికి పోలీసులు చేరుకుని పరిస్థితిని చక్కదిద్దే ప్రయత్నం చేశారు.
పోలీసులు సిద్ధార్థ్ను అదుపులోకి తీసుకుని విచారణ ప్రారంభించారు. మొబైల్ ఫోన్లో ఉన్న వీడియోల వివరాలను పరిశీలించి, అతనిపై కేసు నమోదు చేశారు. వాష్రూంలో కెమెరా ఉంచడం తీవ్రమైన నేరమని పోలీసులు స్పష్టం చేశారు. కాలేజీ యాజమాన్యం కూడా ఈ ఘటనపై విచారణకు ఆదేశాలు జారీ చేసింది. ఈ సంఘటన విద్యాసంస్థల్లో భద్రతా సమస్యలపై తీవ్రమైన చర్చకు దారితీసింది.