Telugu News: Ponguleti Srinivas: ప్రతి కుటుంబానికి సొంతిల్లు ప్రభుత్వ సంకల్పం

తెలంగాణ రాష్ట్రంలోని ప్రతి కుటుంబం ఉన్నతమైన ప్రమాణాలతో నివసించడానికి అనువైన సొంత ఇంటి వసతిని కల్పించాలన్నదే ప్రభుత్వ సంకల్పమని రాష్ట్ర రెవెన్యూ, గృహ నిర్మాణ, సమాచార పౌర సంబంధాల శాఖ మంత్రి పొంగులేటి శ్రీనివాస్ రెడ్డి (Ponguleti Srinivas) అన్నారు. అన్ని వర్గాల ప్రజలకు అందుబాటులో ఉండే ధరల్లో ఇళ్ల నిర్మాణం ఉండేలా సమగ్ర విధాన రూపకల్పనకు తెలంగాణ రైజింగ్ గ్లోబల్ సమ్మిట్-2047 చక్కటి వేదిక అని మంత్రి పేర్కొన్నారు.

Read Also:  Global Summit: రైతుల ఉత్పత్తులు పెంచడానికి ఎఐ, డీప్ టెక్ సాంకేతికత

ఆఫర్డబుల్ హౌసింగ్ పాలసీ ఫర్ అర్బన్ ఫ్యూచర్ – తెలంగాణ మోడల్ 2047

భారత్ ఫ్యూచర్ సిటీలో జరుగుతున్న గ్లోబల్ సమ్మిట్‌లో (Global Summit) భాగంగా, రెండో రోజు ‘ఆఫర్డబుల్ హౌసింగ్ పాలసీ ఫర్ అర్బన్ ఫ్యూచర్-తెలంగాణ మోడల్ 2047’ అనే అంశంపై జరిగిన సదస్సులో మంత్రి పొంగులేటి శ్రీనివాస రెడ్డి కీలక ఉపన్యాసం చేశారు. పెరుగుతున్న పట్టణీకరణ, విస్తృతమవుతున్న గృహ అవసరాలను దృష్టిలో ఉంచుకుని, దేశానికి ఆదర్శంగా ఉండేలా ఆర్థికంగా సాధ్యమైన, పర్యావరణ పరిరక్షణకు అనుగుణమైన, సాంకేతికత ఆధారిత అంశాలు ఉండేలా సమగ్రమైన గృహ నిర్మాణ పాలసీని రూపొందిస్తున్నామని తెలిపారు. ముఖ్యమంత్రి రేవంత్ రెడ్డి (Revanth Reddy) నాయకత్వంలో కాంగ్రెస్ ప్రభుత్వం అనుసరించే విధానాలు జాతీయ, అంతర్జాతీయ స్థాయిలో రోల్ మోడల్‌గా నిలుస్తాయనే విశ్వాసాన్ని ఆయన వ్యక్తం చేశారు.

గత కార్యక్రమాల పురోగతి మరియు డిమాండ్‌లో అంతరం

రాష్ట్రంలో ఇప్పటివరకు అమలు చేసిన గృహ నిర్మాణ కార్యక్రమాల ద్వారా సాధించిన పురోగతిని మంత్రి వివరించారు. గతంలో ఇందిరమ్మ పథకం ద్వారా సుమారు 42 లక్షల ఇళ్లను నిర్మించగా, ఇప్పుడు ఇందిరమ్మ ఇళ్ల కార్యక్రమంలో సుమారు 3.5 లక్షల ఇళ్ల నిర్మాణాలు వివిధ దశల్లో ఉన్నాయని తెలిపారు. మధ్య తరగతి కుటుంబాల కోసం హౌసింగ్ బోర్డ్, రాజీవ్ స్వగృహ కార్పొరేషన్ తదితర సంస్థల ద్వారా సుమారు ఒక లక్ష ఇళ్లు నిర్మించినట్లు వివరించారు.

అయినప్పటికీ, రాష్ట్రంలో గృహాల డిమాండ్, సరఫరా మధ్య భారీ అంతరం ఉందని మంత్రి అంగీకరించారు. ఈ అంతరాన్ని పూడ్చడానికి, ఆదాయంతో సంబంధం లేకుండా, ప్రతి వ్యక్తి అవసరాలకు పరిమితం కాకుండా, తెలంగాణ 2047 లక్ష్యానికి మూలస్తంభం లాంటి ఒక సమగ్ర గృహ నిర్మాణ విధానాన్ని రూపొందిస్తున్నామని ప్రకటించారు.

తెలంగాణ నమూనా 2047: మూడు ప్రాంతాల వ్యూహం

పట్టణ ప్రాంతాల అవసరాలపై దృష్టి సారించి, సమతుల్యతతో కూడిన “గృహ నిర్మాణ తెలంగాణ నమూనా 2047” వైపు చారిత్రక అడుగు వేస్తున్నామని మంత్రి తెలిపారు. ఈ నమూనా ఆర్థికంగా లాభదాయకంగా, సామాజికంగా సమ్మిళితంగా, పర్యావరణపరంగా బాధ్యతాయుతంగా, సాంకేతికత ఆధారితంగా ఉండాలని ప్రభుత్వం సంకల్పించింది.

ప్రభుత్వ, ప్రైవేట్ భాగస్వామ్యంతో ఔటర్ రింగ్ రోడ్, రీజినల్ రింగ్ రోడ్డు (RRR) మధ్యలో పేద, మధ్యతరగతి ప్రజల కోసం కూకట్‌పల్లి హౌసింగ్ బోర్డ్ తరహాలో ఇళ్లను నిర్మించాలని ఆలోచిస్తున్నామని తెలిపారు. తెలంగాణను మూడు ప్రధాన ప్రాంతాలుగా విభజించి వ్యూహాలను రూపొందించారు:

1. తెలంగాణ కోర్ అర్బన్ ప్రాంతం (TCUR): మురికివాడల యథాస్థితి పునరాభివృద్ధి, ఐటీ కారిడార్లలో అందుబాటు అద్దె గృహ నిర్మాణం, రవాణా కారిడార్ల వెంబడి గృహాల ఏర్పాటు.
2. పరి-అర్బన్ ప్రాంతం (PUR): ప్లాన్డ్ టౌన్‌షిప్‌లు, భారత్ సిటీ వంటి గ్రీన్ఫీల్డ్ శాటిలైట్ టౌన్లు, పారిశ్రామిక ప్రాంతాలలో కార్మికుల గృహవసతి.
3. రాష్ట్రంలోని మిగిలిన ప్రాంతాలు (ROS): చిన్న/మధ్య తరహా టౌన్‌షిప్‌లు, పారిశ్రామిక పార్కులు, లాజిస్టిక్స్ హబ్‌లతో అనుసంధానించబడిన అద్దె/కార్మికుల గృహనిర్మాణం.

మంత్రి పొంగులేటి శ్రీనివాస్ రెడ్డి, కొత్తగా రూపొందించనున్న అఫర్డబుల్ హౌసింగ్ పాలసీలో (Affordable Housing Policy) ఇటీవల ప్రకటించిన TCUR, PUR, ROS జోన్‌లకు అనుగుణంగా విధానాలను నిర్దేశించనున్నామని వెల్లడించారు. ఈ సదస్సులో ప్రపంచ బ్యాంకు ప్రతినిధి అభిజిత్ శంకర్, రాంకీ సిఎడి నంద కిషోర్, హుడ్కో ఎండి వి. సురేష్, క్రెడాయ్ ప్రెసిడెంట్ జి. రామ్ రెడ్డి, ఏఎస్‌బిఎల్ సీఈఓ అజితేష్, సిబిఆర్ ప్రతినిధి ప్రీతం మెహెరా పాల్గొన్నారు.

Read hindi news: hindi.vaartha.com

Epaper : epaper.vaartha.com

Read Also: