Hyderabad Pod Taxi Project: హైదరాబాద్ నగరంలో రోజురోజుకూ పెరుగుతున్న ట్రాఫిక్ సమస్యలకు చెక్ పెట్టేందుకు ప్రభుత్వం సరికొత్త రవాణా మార్గాన్ని అన్వేషిస్తోంది. మెట్రో ప్రయాణికులకు ‘లాస్ట్-మైల్ కనెక్టివిటీ’ (మెట్రో స్టేషన్ నుంచి గమ్యస్థానానికి చేరుకోవడం) సులభతరం చేసేందుకు ‘పర్సనలైజ్డ్ ర్యాపిడ్ ట్రాన్సిట్ సిస్టమ్’ (PRTS) లేదా పాడ్ ట్యాక్సీలను ప్రవేశపెట్టేందుకు రంగం సిద్ధం చేస్తోంది. ఈ అత్యాధునిక రవాణా వ్యవస్థ ద్వారా ప్రయాణికులు ఎలాంటి ట్రాఫిక్ చిక్కులు లేకుండా వేగంగా తమ కార్యాలయాలకు చేరుకోవచ్చు.
హెచ్ఎంఆర్ఎల్ (HMRL) టెండర్ల ప్రకటన
ఈ ప్రతిష్టాత్మక ప్రాజెక్టు సాధ్యాసాధ్యాల (Feasibility Study) అధ్యయనం కోసం కన్సల్టెంట్ను నియమించేందుకు హైదరాబాద్ మెట్రో రైల్ లిమిటెడ్ (HMRL) తాజాగా టెండర్లను ఆహ్వానించింది. నగరంలోని భౌగోళిక పరిస్థితులు, ప్రయాణికుల రద్దీ, నిర్మాణ వ్యయం వంటి అంశాలను ఈ కన్సల్టెన్సీ పరిశీలించనుంది. నివేదిక అందిన వెంటనే పైలట్ ప్రాజెక్టు పనులను ప్రారంభించాలని ప్రభుత్వం భావిస్తోంది.
ముఖ్యంగా ఐటీ కారిడార్, ఫైనాన్షియల్ డిస్ట్రిక్ట్, సచివాలయం వంటి రద్దీ ప్రాంతాల్లో ఈ వ్యవస్థను ఏర్పాటు చేయాలని ప్రభుత్వం భావిస్తోంది. రాయదుర్గం, హైటెక్ సిటీ మెట్రో స్టేషన్ల నుంచి కార్యాలయాలకు సులభంగా చేరుకునేలా ఈ పాడ్ కార్లు ఉపయోగపడతాయి. మెట్రో స్టేషన్లో దిగిన తర్వాత కూడా ట్రాఫిక్లో చిక్కుకోకుండా, నేరుగా గమ్యస్థానాలకు చేరడం దీని ముఖ్య ఉద్దేశం.
రెండో దశ విస్తరణ
ఈ పీఆర్టీఎస్ వ్యవస్థలో డ్రైవర్ లేకుండా, విద్యుత్తో నడిచే చిన్నపాటి కార్లు ఎలివేటెడ్ ట్రాక్లపై ప్రయాణిస్తాయి. ఒక్కో కారులో 4 నుంచి 8 మంది వరకు ప్రయాణించవచ్చు. ఈ ప్రాజెక్టును పబ్లిక్-ప్రైవేట్ పార్ట్నర్షిప్ (పీపీపీ) పద్ధతిలో ‘డిజైన్, బిల్డ్, ఫైనాన్స్, ఆపరేట్, ట్రాన్స్ఫర్’ (DBFOT) విధానంలో చేపట్టాలని హెచ్ఎంఆర్ఎల్ నిర్ణయించింది.
గత బీఆర్ఎస్ ప్రభుత్వ హయాంలోనూ ఈ ప్రతిపాదనలు వచ్చినప్పటికీ అవి కార్యరూపం దాల్చలేదు. ప్రస్తుత కాంగ్రెస్ ప్రభుత్వం మెట్రో రెండో దశ విస్తరణతో పాటు ఈ పీఆర్టీఎస్పై కూడా ప్రత్యేక దృష్టి సారించింది. కన్సల్టెంట్ నియామకం కోసం జారీ చేసిన టెండర్లకు బిడ్లు దాఖలు చేసేందుకు మార్చి 25ను ఆఖరి తేదీగా నిర్ణయించారు. కన్సల్టెంట్ ఇచ్చే నివేదిక ఆధారంగా తుది మార్గాలను ఖరారు చేయనున్నారు.
