తెలంగాణ రాష్ట్ర ప్రభుత్వం తాజాగా ప్రారంభించిన ‘భూభారతి’ వ్యవస్థలో భూరికార్డుల్లో ఉన్న తప్పులను సరిచేసుకునేందుకు రైతులు, భూ యజమానులకు పెద్ద ఊరట లభించింది. భూరికార్డుల్లో ఉన్న తప్పుడు వివరాల సవరణకు ఒక సంవత్సరం వరకూ అవకాశం కల్పిస్తూ ప్రభుత్వం కీలక నిర్ణయం తీసుకుంది. త్వరలోనే జిల్లాల కలెక్టర్లు, ఆర్డీవోలకు సవరణ అధికారులను నియమించే ప్రక్రియ ప్రారంభం కానుంది. దీనివల్ల భూ యజమానులు తమ రికార్డుల్లో ఉన్న పొరపాట్లను సులభంగా సరిదిద్దుకునే అవకాశం లభిస్తుంది.
రికార్డ్ సవరణ లేదా అప్పీళ్లు దాఖలు చేయాలంటే రూ. 1,000 చెల్లించాల్సిందే
భూమికి సంబంధించిన వివిధ రకాల సేవల కోసం ప్రభుత్వం ఫీజులను కూడా నిర్ణయించింది. మ్యుటేషన్/సక్సెషన్ కోసం ఎకరానికి రూ. 2,500, పట్టాదార్ పాస్ బుక్ కొరకు రూ. 300, సర్టిఫైడ్ కాపీ కోసం రూ. 10 ఫీజు విధించారు. అలాగే, రికార్డ్ సవరణ లేదా అప్పీళ్లు దాఖలు చేయాలంటే రూ. 1,000 చెల్లించాల్సి ఉంటుంది. ఈ విధంగా, వ్యవస్థను పారదర్శకంగా మరియు వ్యవస్థబద్ధంగా నిర్వహించేందుకు ప్రభుత్వం చర్యలు తీసుకుంటోంది.
మొదటిసారి స్లాట్ రీషెడ్యూల్ చేయడం ఉచితం
అలాగే, భూ సంబంధిత సేవల కోసం తీసుకునే స్లాట్ బుకింగ్ విషయంలో ప్రభుత్వం అనుకూలంగా వ్యవహరించింది. మొదటిసారి స్లాట్ రీషెడ్యూల్ చేయడం ఉచితం, అయితే రెండోసారి రీషెడ్యూల్ చేయాలంటే రూ. 500 ఫీజు చెల్లించాల్సి ఉంటుంది. భూభారతి అమలులోకి రావడంతో భూ రికార్డుల నిర్వహణ మరింత సమర్థవంతంగా మారనుంది. ఈ ఏడాది కాలంలో తప్పుల సవరణ కోసం ప్రజలు ఈ అవకాశాన్ని వినియోగించుకోవాలని అధికారులు సూచిస్తున్నారు.