ఒకే రోజు ఒకే కేసు విచారణ నుంచి ముగ్గురు న్యాయమూర్తులు తప్పుకోవడం తెలంగాణ హైకోర్టు (High Court) చరిత్రలో అరుదైన సంఘటనగా నిలిచింది. ఓబులాపురం అక్రమ ఖనిజ తవ్వకాల కేసు. ఇది దేశవ్యాప్తంగా సంచలనం రేపిన పెద్ద మైనింగ్ స్కాంలో ఒకటి. ఈ కేసులో ప్రధాన నిందితులు గాలి జనార్ధన్ రెడ్డి, బివి శ్రీనివాసరెడ్డి, మెఫజ్ అలీ ఖాన్, వి.డి.రాజగోపాల్ లాంటి పేరుగాంచిన వ్యాపారవేత్తలు, ఐఏఎస్ అధికారులు ఉన్నారు.
కేసు నేపథ్యం:
ఓబులాపురం మైనింగ్ కంపెనీ (OMC) తరఫున గాలి జనార్దన్ రెడ్డి అక్రమంగా ఖనిజం తవ్వకాలు జరిపారని, అనుమతులేని ప్రాంతాల్లో తవ్వకాలు చేసి ప్రభుత్వానికి భారీ నష్టాన్ని కలిగించారని సీబీఐ ఆరోపించింది. సీబీఐ కోర్టు విధించిన శిక్షను సస్పెండ్ చేయాలంటూ దోషులు బి.వి.శ్రీనివాసరెడ్డి, గాలి జనార్దన్రెడ్డి, ఓఎంసీ కంపెనీ, మెఫజ్అలీఖాన్, వి.డి.రాజగోపాల్లు హైకోర్టులో అప్పీళ్లు దాఖలు చేయగా, శిక్షను సస్పెండ్ చేసి బెయిలు మంజూరు చేయాలని కోరారు. గాలి జనార్దన్రెడ్డి శిక్షను రద్దు చేయాలంటూ పిటిషన్ దాఖలు చేశారు. ఓబుళాపురం అక్రమ మైనింగ్ కేసులో ఏడేళ్ల జైలు శిక్ష విధిస్తూ సీబీఐ కోర్టు మే 6న వెలువరించిన తీర్పుపై గత వారం దోషులు అప్పీలు దాఖలు చేశారు.
విచారణలో న్యాయమూర్తుల నుంచి అనూహ్య ట్విస్ట్:
ఈ పిటిషన్లను విచారించేందుకు మొదట జస్టిస్ నందికొండ నర్సింగ్ రావు ధర్మాసనం విచారణ చేపట్టింది. కానీ సీబీఐ పూర్తి వివరణ ఇవ్వలేదని పేర్కొంటూ, ఆ కేసు వాదనను వాయిదా వేసారు. పిటిషనర్ల తరఫు సీనియర్ న్యాయవాదులు వాదనలు వినిపిస్తూ ఏడేళ్ల లోపు శిక్ష పడి, గతంలో బెయిలు లభించినట్లయితే తక్షణం శిక్ష అమలును నిలిపేసి బెయిలు మంజూరు చేసే సంప్రదాయం ఉందని పిటిషన్లో తెలిపారు. అందులోనూ మూడున్నరేళ్లకుపైగా జైలు జీవితం గడిపారని, అందువల్ల బెయిలు మంజూరు చేయాలని పిటిషన్లో కోరారు.
ఇందులో భాగంగా దోషులు దాఖలు చేసిన 5 పిటిషన్లు బుధవారం జస్టిస్ కె.శరత్ బెంచ్ ముందుకు విచారణకు రాగా, ఉదయం కోర్టు ప్రారంభ సమయంలోనే ఈ కేసులను మరో న్యాయమూర్తి ముందుంచాలని రిజిస్ట్రీకి ఆదేశాలు జారీ చేశారు.
అరుదైన పరిస్థితి:
ఒకే రోజు ముగ్గురు న్యాయమూర్తులు విచారణ నుంచి తప్పుకోవడం హైకోర్టు చరిత్రలోనే గొప్పగా గుర్తుంచుకోదగిన సంఘటనగా మారింది. సాధారణంగా న్యాయమూర్తులు వ్యక్తిగత కారణాలు, పూర్వపు సంబంధాలు ఉండే సందర్భాల్లో తప్పుకుంటుంటారు. కానీ ఒకే కేసులో ముగ్గురు ఇలా ఒకదానికొకరు విచారణ బాధ్యతలు తిరస్కరించడాన్ని పరిశీలిస్తే, ఈ కేసు ఎంత సంక్లిష్టమో తెలుస్తోంది.
జస్టిస్ అలిశెట్టి లక్ష్మీనారాయణ బెంచ్ ముందుకు విచారణకు వచ్చాయి. సాయంత్రం 7 గంటల సమయంలో అవి విచారణకు రాగా, మరో న్యాయమూర్తి ముందుంచాలంటూ చెప్పారు. దీంతో న్యాయవాదులు సీనియర్ న్యాయమూర్తి జస్టిస్ నగేశ్ భీమపాక ధర్మాసనం ముందు కేసును ప్రస్తావించారు. ఇద్దరు న్యాయమూర్తులు విచారణ నుంచి తప్పుకొన్నారని, వీటిపై విచారణ చేపట్టాలని కోరారు. దీంతో జస్టిస్ నగేశ్ భీమపాక పిటిషన్లకు చెందిన ఫైళ్లను తెప్పించి పరిశీలించి ఇది ఓబుళాపురం అక్రమ మైనింగ్ కేసు అని, తాను కూడా తప్పుకుంటున్నానని చెప్పారు. దీంతో బెయిలు పిటిషన్ల విచారణకు గాలితో సహా దోషులు మరోవారం వేచి ఉండాల్సిందే. దోషుల తరఫున న్యాయవాదులు, సీబీఐ తరఫున న్యాయవాదులు ఉదయం నుంచి సాయంత్రం 7.30 గంటల దాకా వేచి చూశారు. గాలి జనార్దన్ రెడ్డి గతంలో రాజకీయంగా బలమైన నేతగా పేరున్న వ్యక్తి కావడం, కేసులో ఉన్న మిగతా నిందితులు కూడా రాజకీయ-ప్రశాసన అనుబంధాలు కలిగినవారై ఉండడం, ఈ విచారణ నుంచి న్యాయమూర్తుల తప్పుకోవడానికి కారణమై ఉండవచ్చని న్యాయవాదుల వర్గాల్లో చర్చ జరుగుతోంది.
Read also: Kavitha: కేటీఆర్ పై విరుచుకుపడ్డ కవిత