Nagarjunasagar: నాగార్జునసాగర్‌ 22 గేట్లు ఎత్తివేత..

తెలంగాణ, ఆంధ్రప్రదేశ్ రాష్ట్రాల సరిహద్దులో ఉన్న నాగార్జునసాగర్ (Nagarjunasagar) ప్రాజెక్ట్ ప్రస్తుతం వరద ప్రవాహాలతో కళకళలాడుతోంది. ఎగువ ప్రాంతాల్లో కురుస్తున్న భారీ వర్షాల కారణంగా సాగర్‌లోకి పెద్ద ఎత్తున నీరు చేరుతోంది. వరద ఉధృతి పెరగడంతో అధికారులు జాగ్రత్త చర్యలుగా 22 గేట్లను ఎత్తి నీటిని దిగువకు విడుదల చేస్తున్నారు. ఈ సుందర దృశ్యం పర్యాటకులను ఆకర్షిస్తోంది.సాగర్ పూర్తి స్థాయి నీటిమట్టం 590 అడుగులు కాగా, ప్రస్తుతం 587 అడుగుల వరకు నీటిమట్టం నమోదైంది. ప్రాజెక్ట్ సామర్థ్యం 312 టీఎంసీలు, అయితే ప్రస్తుతం 305 టీఎంసీల నీరు నిల్వ ఉంది. వరద ఉధృతి పెరగడంతో ఇన్‌ఫ్లో 1.98 లక్షల క్యూసెక్కులు, ఔట్‌ఫ్లో 2.13 లక్షల క్యూసెక్కులుగా కొనసాగుతోంది. ఇందులో, స్పిల్‌వే గేట్ల ద్వారా 1.71 లక్షల క్యూసెక్కుల నీరు దిగువకు విడుదల చేస్తున్నారు.

మౌలిక సదుపాయాలకు

తెలంగాణలో కురుస్తున్న భారీ వర్షాలు, వరదల నేపథ్యంలో పంచాయతీరాజ్ శాఖ ప్రజల సహాయార్థం కీలక చర్యలు చేపట్టింది. రాష్ట్ర స్థాయిలో ఒక ఫ్లడ్ కంట్రోల్ రూమ్‌ను ఏర్పాటు చేసింది. వర్షాల వల్ల రోడ్లు, ఇతర ఇంజినీరింగ్ మౌలిక సదుపాయాలకు సంబంధించిన సమస్యలు తలెత్తితే ఈ కంట్రోల్ రూమ్‌ను సంప్రదించవచ్చు. ప్రజల ఫిర్యాదులను స్వీకరించేందుకు పంచాయతీరాజ్ శాఖ 040-3517-4352 అనే టోల్-ఫ్రీ నంబర్‌ను అందుబాటులోకి తెచ్చింది. ఈ నంబర్ ఇంజినీర్ ఇన్ చీఫ్ (ENC) కార్యాలయంలో ఏర్పాటు చేసిన కంట్రోల్ రూమ్‌కు అనుసంధానించబడి ఉంటుంది. వర్షాల కారణంగా ఎక్కడైనా రోడ్లు దెబ్బతిన్నా.. కల్వర్టులు కూలినా.. లేదా రోడ్లపై గండ్లు పడినా ప్రజలు ఈ నంబర్‌కు ఫోన్ చేసి సమాచారం అందించవచ్చు.

ప్రజలు సమస్యలను

రాష్ట్ర స్థాయి కంట్రోల్ రూమ్‌తో పాటు, ప్రతి సర్కిల్ రేంజ్‌లో ఉన్న సూపరింటెండెంట్ ఇంజినీర్, ఎగ్జిక్యూటివ్ ఇంజినీర్ కార్యాలయాల్లో కూడా కంట్రోల్ రూమ్‌లను ఏర్పాటు చేసినట్లు అధికారులు తెలిపారు. ఈ చర్యల ద్వారా క్షేత్రస్థాయిలో సమస్యలను త్వరితగతిన పరిష్కరించవచ్చని అధికారులు పేర్కొన్నారు. ప్రజలు సమస్యలను వెంటనే ఫిర్యాదు చేయడం ద్వారా ప్రమాదాలను నివారించవచ్చని, ప్రజా రవాణాకు అంతరాయం కలగకుండా చూడవచ్చని అధికారులు వెల్లడించారు. ఈ కంట్రోల్ రూమ్‌లు 24 గంటలు పనిచేసి ప్రజలకు సహాయపడతాయి.