తెలంగాణ రాష్ట్ర ప్రభుత్వం ఎస్టీల అభివృద్ధికి ప్రత్యేక ప్రాధాన్యత ఇస్తోంది. తాజాగా, రాష్ట్ర గిరిజన సంక్షేమ శాఖా మంత్రి సీతక్క కీలక ప్రకటన చేశారు. రాష్ట్రంలో ఎస్టీల కోసం మూడు కొత్త కార్పొరేషన్లు ఏర్పాటు చేయనున్నట్టు వెల్లడించారు. కొమరం భీం, సేవా లాల్, ఏకలవ్య పేర్లతో ఈ కార్పొరేషన్లు ఏర్పాటవుతాయని తెలిపారు. నిర్మల్ జిల్లా బాసరలో గోదావరి ఒడ్డున జరిగిన శ్రీ సంత్ సేవాలాల్ 286వ జయంతి ఉత్సవాల్లో పాల్గొన్న సీతక్క, ఎస్టీల కోసం తీసుకుంటున్న కొత్త నిర్ణయాలను వివరించారు.
ఎస్టీలకు మద్దతుగా ప్రభుత్వం
ఎస్టీ వర్గాల ప్రజల కోసం ప్రభుత్వం ప్రత్యేకంగా ఐటీడీఏలను ఏర్పాటు చేసి, అభివృద్ధి పథకాలను మరింత విస్తరించేందుకు కృషి చేస్తోంది. మైదాన ప్రాంతాల్లో కూడా ఐటీడీఏలు ఏర్పాటు చేయాలని నిర్ణయించిందని మంత్రి తెలిపారు. అదనంగా, ఎస్టీ వర్గాలకు మరిన్ని ఇండ్లు కేటాయించేందుకు ముఖ్యమంత్రి రేవంత్ రెడ్డి అంగీకరించినట్టు సీతక్క వెల్లడించారు. తమ సంస్కృతి, చరిత్రను భవిష్యత్ తరాలకు అందించాల్సిన అవసరం ఎంతైనా ఉందని, అందుకే బంజారా ఉద్యోగులకు సేవాలాల్ జయంతి రోజున సెలవు కల్పించినట్టు తెలిపారు.
బంజారా భాషకు గుర్తింపు కోసం పోరాటం
హైదరాబాద్లో బంజారాభవన్లో జరిగిన వేడుకల్లో మాట్లాడుతూ, బంజారా భాషను అధికారికంగా గుర్తించి రాజ్యాంగంలోని 8వ షెడ్యూల్లో చేర్చాలని సీతక్క కేంద్ర ప్రభుత్వాన్ని డిమాండ్ చేశారు. ఈ అంశంపై అసెంబ్లీలో తీర్మానం చేసి కేంద్రానికి పంపుతామని వెల్లడించారు. ఎస్సీ, ఎస్టీ సబ్ ప్లాన్, ఐటీడీఏ వంటి సంక్షేమ పథకాలను కాంగ్రెస్ ప్రభుత్వం ప్రారంభించిందని గుర్తుచేశారు.
సంత్ సేవాలాల్ సేవలను స్మరించుకుంటూ
286 ఏళ్ల క్రితం జన్మించిన సంత్ సేవాలాల్ సేవలు ఎప్పటికీ చిరస్మరణీయమని, ఆయన బంజారాల అభివృద్ధికి అహర్నిశలు శ్రమించారని మంత్రి కొనియాడారు. సంచార జీవనాన్ని విడనాడి స్థిర నివాసాలు ఏర్పాటుకు ఆయన చేసిన కృషి అనన్యమని ప్రశంసించారు. తమ మూలాలను మరవకుండా సంస్కృతి, భాష, వేషధారణలను గౌరవించాలని, ప్రతి ఒక్కరూ బంజారా డ్రెస్సులు ధరించి తమ ప్రత్యేకతను తెలియజేయాలని సూచించారు.
ఎస్టీల సంక్షేమానికి భారీ నిధులు
ఈ ఏడాది రాష్ట్ర బడ్జెట్లో ఎస్టీల సంక్షేమానికి రూ. 17,000 కోట్లు కేటాయించినట్టు మంత్రి వెల్లడించారు. గత ప్రభుత్వ హయాంలో ఎస్టీ సబ్ ప్లాన్ నిధులను ఇతర పథకాలకు మళ్లించారని ఆరోపించారు. అయితే, ప్రస్తుత కాంగ్రెస్ ప్రభుత్వం ఎస్టీల సంక్షేమం కోసం ప్రత్యేక కృషి చేస్తోందని తెలిపారు. అంతేకాదు, ఈ ఏడాది సేవాలాల్ జయంతి ఉత్సవాలకు రూ. 2 కోట్లు కేటాయించినట్టు ప్రకటించారు. రాబోయే ఏడాది ఉత్సవాలను మరింత ఘనంగా ఎల్.బీ. స్టేడియంలో నిర్వహించేందుకు సీఎం రేవంత్ రెడ్డిని కోరతామని పేర్కొన్నారు.
