భద్రాద్రి జిల్లా కార్యకర్తల సమావేశంలో బీఆర్ఎస్ వర్కింగ్ ప్రెసిడెంట్ కేటీఆర్ (KTR), మంత్రి పొంగులేటి శ్రీనివాస్ రెడ్డిపై చురకలు అంటించారు. గత ఏడాది దీపావళికి పొంగులేటి పెద్ద బాంబులు పేలుస్తారని ప్రచారం జరిగిందని, కానీ ఫలితం ఏమీ కనిపించలేదని ఎద్దేవా చేశారు. “మళ్లీ ఈ ఏడాది దీపావళి వచ్చింది, ఇంకా బాంబులు ఎక్కడ?” అంటూ ఆయన వ్యంగ్యంగా వ్యాఖ్యానించారు.
పొంగులేటి గెలుపుపై కేటీఆర్ సవాల్
కేటీఆర్ మాట్లాడుతూ.. “అడ్డిమారి గుడ్డి దెబ్బలా గెలిచి ఇప్పుడు బిల్డప్ కొడుతున్నారు” అని పొంగులేటిని విమర్శించారు. స్థానిక పరిస్థితుల వలన ఒక్కసారిగా గెలిచిన విజయాన్ని పెద్ద విజయంగా చూపించుకోవడం సరికాదని ఆయన అభిప్రాయపడ్డారు. రాబోయే ఎన్నికల్లో పాలేరు నియోజకవర్గంలో పొంగులేటి మళ్లీ ఎలా గెలుస్తారో చూద్దామని సవాల్ విసిరారు.
రాజకీయ వాతావరణంలో కొత్త చర్చ
కేటీఆర్ చేసిన ఈ వ్యాఖ్యలు భద్రాద్రి-పాలేరు ప్రాంతాల్లో రాజకీయ చర్చకు దారితీశాయి. పొంగులేటి (Ponguleti) గెలుపు కేవలం రాజకీయ పరిస్థితుల వలన జరిగినదా, లేక ప్రజల మద్దతుతో సాధించిన విజయమా అనే అంశంపై వర్గాల మధ్య చర్చ మొదలైంది. రాబోయే ఎన్నికల దిశగా బీఆర్ఎస్-కాంగ్రెస్ మధ్య పోటీ మరింత ఉత్కంఠభరితంగా మారే అవకాశం ఉందని విశ్లేషకులు భావిస్తున్నారు.