హైదరాబాద్ నగరంలో ట్రాఫిక్ సమస్యలు ఎన్నో సంవత్సరాలుగా కొనసాగుతూనే ఉన్నాయి. ఉదయం ఆఫీస్ టైమ్ నుండి రాత్రి తిరుగు ప్రయాణం వరకు ప్రధాన రహదారులు వాహనాలతో నిండిపోతాయి. ప్రత్యేకించి ట్యాంక్బండ్, మియాపూర్, కూకట్పల్లి, ఎల్బీనగర్, అమీర్పేట్ వంటి ప్రాంతాలు రద్దీతో కిక్కిరిసిపోతుంటాయి. వాహనాల సంఖ్య పెరగడం, సన్నని రహదారులు, సరైన పార్కింగ్ సదుపాయాల లేమి వంటి సమస్యల కారణంగా నగరవాసులు తరచుగా గంటల కొద్దీ ట్రాఫిక్లో ఇరుక్కుపోతున్నారు.
ఈ పరిస్థితుల్లో మెట్రో రైలు (Metro train) ప్రారంభం హైదరాబాద్ ప్రజలకు పెద్ద ఊరట కలిగించింది. సమయాన్ని ఆదా చేసుకోవడం, తక్కువ ఖర్చుతో గమ్యస్థానానికి చేరుకోవడం, ట్రాఫిక్ సమస్యల నుండి తప్పించుకోవడం వంటి అనేక ప్రయోజనాల కారణంగా ప్రజలు మెట్రో రైలు ప్రయాణాన్ని ఎక్కువగా ఎంచుకుంటున్నారు. ప్రస్తుతం రోజూ సగటున 4.5 లక్షల మంది ప్రయాణికులు ఈ సదుపాయాన్ని వినియోగిస్తున్నారు. పండుగలు, ప్రత్యేక ఉత్సవాల సమయంలో ఈ సంఖ్య మరింత పెరిగిపోతుంది. కొన్ని రోజుల్లో కూర్చోవడానికి స్థలం దొరకక, నిలబడేందుకు కూడా ఇబ్బందులు ఎదురయ్యేంతగా కోచ్లు నిండిపోతాయి.
ప్రత్యేక చర్యలు
ఇక వినాయక చవితి, గణేశ్ నిమజ్జనాల సమయంలో ఖైరతాబాద్ బడా గణేష్ (Khairatabad Bada Ganesh) దర్శనం కోసం, అలాగే ట్యాంక్బండ్ పరిసర ప్రాంతాలకు వెళ్లే భక్తుల రద్దీ విపరీతంగా పెరుగుతుంది. ఈ రద్దీని దృష్టిలో పెట్టుకుని ట్రాఫిక్ పోలీసులు ప్రత్యేక చర్యలు చేపడతారు. అయినప్పటికీ రోడ్లపై ప్రయాణం కష్టంగా మారుతుంది. అలాంటి సందర్భాల్లో మెట్రో రైలు ప్రయాణం భక్తులకు పెద్ద సాయం అవుతుంది.
తాజాగా మెట్రో నిర్వాహకులు ఒక కీలక నిర్ణయం తీసుకున్నారు. సాధారణంగా ప్రతిరోజు రాత్రి 11 గంటల వరకు మాత్రమే మెట్రో సర్వీసులు నడుస్తాయి. కానీ ఈసారి గణేశ్ నిమజ్జనాల సందర్భంగా ప్రత్యేక ఏర్పాట్లు చేసి రాత్రి 1 గంట వరకు మెట్రో రైళ్లు నడపాలని నిర్ణయించారు. అంటే ఉదయం 6 గంటల నుండి అర్ధరాత్రి 1 గంట వరకు సర్వీసులు అందుబాటులో ఉంటాయి. ఈ సౌకర్యం వల్ల భక్తులు ఆలస్యంగా ఇంటికి తిరిగి వెళ్లాల్సిన పరిస్థితుల్లో కూడా పెద్దగా ఇబ్బంది పడాల్సిన అవసరం ఉండదు.
Read hindi news : hindi.vaartha.com
Read also: