తెలంగాణ రాష్ట్రంలో రహదారుల నిర్మాణంపై రోడ్లు, భవనాల శాఖ మంత్రి కోమటిరెడ్డి వెంకటరెడ్డి కీలక ప్రకటన చేశారు. రాష్ట్ర ప్రభుత్వం పీపీపీ (పబ్లిక్ ప్రైవేట్ పార్టనర్షిప్) విధానంలో రహదారుల నిర్మాణం చేపట్టడం లేదని, హైబ్రిడ్ యాన్యుటీ మోడల్ ద్వారా రహదారుల అభివృద్ధి చేస్తున్నామని స్పష్టం చేశారు. తెలంగాణ శాసనసభ సమావేశాల్లో మాజీ మంత్రి హరీశ్ రావు అడిగిన ప్రశ్నకు సమాధానంగా మంత్రి వెంకటరెడ్డి ఈ వివరాలను వెల్లడించారు. పీపీపీ మోడల్ అంటే ప్రైవేట్ కంపెనీలు పెట్టుబడులు పెట్టి రహదారులు నిర్మించడం, నిర్వహించడం, కొన్ని సంవత్సరాల పాటు వాటిని నిర్వహించి ప్రభుత్వం కేటాయించిన విధంగా ఆదాయం పొందడం. కానీ హైబ్రిడ్ యాన్యుటీ మోడల్ కింద ప్రాజెక్ట్కు 40% మొత్తం ప్రభుత్వమే ముందుగా ఇస్తుంది, మిగిలిన 60% మొత్తాన్ని ప్రైవేట్ కంపెనీ పెట్టుబడి రూపంలో వెచ్చిస్తుంది. తరువాత, ఆ మొత్తాన్ని ప్రభుత్వమే క్రమంగా చెల్లిస్తుంది.
గత ప్రభుత్వంపై ఆరోపణలు
కొన్ని గణాంకాలను ప్రస్తావిస్తూ మంత్రి బీఆర్ఎస్ ప్రభుత్వం పదేళ్ల పాలనలో రహదారుల అభివృద్ధి పూర్తిగా నిర్లక్ష్యం చేయబడిందని ఆరోపించారు. రూ. 112 కోట్లతో కేవలం 6,668 కిలోమీటర్ల రహదారుల మరమ్మతులు మాత్రమే చేసినట్లు ప్రభుత్వ రికార్డులు చెబుతున్నాయని పేర్కొన్నారు. అంతేకాదు, బీఆర్ఎస్ ప్రభుత్వం రూ. 4,167 కోట్ల రుణం తీసుకుని అప్పుల భారం మోపిందని ఆయన ఆరోపించారు. ప్రస్తుతం కొత్త ప్రభుత్వం ఆ అప్పులను చెల్లిస్తోందని చెప్పారు. గత ప్రభుత్వం రహదారుల అభివృద్ధిపై తగినంత నిధులు ఖర్చు చేయలేకపోయింది. కానీ, మేము కేవలం పద్నాలుగు నెలల్లోనే రూ. 4,000 కోట్లకు పైగా నిధులను రహదారుల అభివృద్ధికి మంజూరు చేశాం అని తెలిపారు. హైబ్రిడ్ యాన్యుటీ మోడల్ (HAM) అనేది ప్రభుత్వ-ప్రైవేట్ భాగస్వామ్య విధానంలో ఒక నూతన నమూనా. ఈ విధానంలో ప్రభుత్వం ప్రాజెక్ట్ మొత్తంలో 40% నిధులను ముందుగా ఇస్తుంది. మిగిలిన 60% మొత్తాన్ని ప్రైవేట్ కంపెనీలు పెట్టుబడి రూపంలో వెచ్చిస్తాయి. దీని వల్ల రెండు ముఖ్యమైన ప్రయోజనాలు ఉంటాయి. ప్రభుత్వానికి భారం తక్కువ – రహదారుల నిర్వహణపై పూర్తిగా ప్రభుత్వం పెట్టుబడి పెట్టకూడదు. దీని వల్ల నాణ్యతా ప్రమాణాలు పెరుగుతాయి, ప్రైవేట్ సంస్థలు మంచి క్వాలిటీతో రహదారులు నిర్మిస్తాయి. ప్రైవేట్ రంగం బరువు తగ్గుతుంది – పూర్తిగా ప్రైవేట్ పెట్టుబడులతో రోడ్లు నిర్మించడంవల్ల, రాబడి రావడానికి చాలా సమయం పడుతుంది. కానీ, ప్రభుత్వ హామీతో ప్రైవేట్ సంస్థలకు భద్రత ఉంటుంది.
ఉప్పల్ ఎలివేటెడ్ కారిడార్: కొత్త ప్రాజెక్టులపై మంత్రి హామీ
హైదరాబాద్లో ట్రాఫిక్ సమస్యను తగ్గించేందుకు ఉప్పల్ ఎలివేటెడ్ కారిడార్ ప్రాజెక్ట్ను 18 నెలల్లో పూర్తి చేస్తామని మంత్రి హామీ ఇచ్చారు. ఈ ప్రాజెక్ట్ పూర్తి అయితే ఉప్పల్, నాగోల్, ఎల్బీ నగర్ ప్రాంతాల్లో ట్రాఫిక్ రద్దీ తగ్గే అవకాశం ఉంది. గత ప్రభుత్వం 10 ఏళ్లలో రూ. 3,945 కోట్లు మాత్రమే రహదారుల అభివృద్ధికి ఖర్చు చేసింది. కానీ, ప్రస్తుత ప్రభుత్వం తక్కువ కాలంలోనే భారీ మొత్తాన్ని మంజూరు చేసిందని మంత్రి వివరించారు. మన సంపద మన రహదారులను నిర్మించదు, మన రోడ్లు మన సంపదను పెంచుతాయి అని మాజీ అమెరికా అధ్యక్షుడు జాన్ ఎఫ్. కెన్నడీ చెప్పిన మాటలను ఆయన ప్రస్తావించారు.