తెలంగాణ రాజకీయాల్లో మరో కీలక పరిణామం చోటుచేసుకుంది. భారత రాష్ట్ర సమితి (BRS) నేత, మాజీ ముఖ్యమంత్రి కేసీఆర్ కుమార్తె కల్వకుంట్ల కవిత రాజీనామాను శాసనమండలి ఛైర్మన్ గుత్తా సుఖేందర్ రెడ్డి అధికారికంగా ఆమోదించారు. గత కొంతకాలంగా పార్టీ కార్యకలాపాలకు దూరంగా ఉంటున్న కవితను, సెప్టెంబర్ 2025లో బీఆర్ఎస్ అధిష్టానం పార్టీ నుంచి సస్పెండ్ చేసిన సంగతి తెలిసిందే. పార్టీ ప్రాథమిక సభ్యత్వం కోల్పోయిన నేపథ్యంలో, నైతిక విలువల దృష్ట్యా ఆమె తన ఎమ్మెల్సీ పదవికి రాజీనామా చేస్తూ నిర్ణయం తీసుకున్నారు.
రాజీనామా ప్రక్రియలో భాగంగా కవిత నిన్న స్వయంగా మండలి ఛైర్మన్ను కలిసి తన అభ్యర్థనను సమర్పించారు. తన రాజీనామాను తక్షణమే ఆమోదించాలని ఆమె కోరగా, నిబంధనలను పరిశీలించిన అనంతరం ఛైర్మన్ ఈ మేరకు నిర్ణయం తీసుకున్నారు. కవిత 2022లో నిజామాబాద్ స్థానిక సంస్థల కోటా నుంచి ఎమ్మెల్సీగా ఏకగ్రీవంగా ఎన్నికయ్యారు. ఆమె పదవీకాలం ఇంకా మిగిలి ఉన్నప్పటికీ, రాజకీయ పరిణామాల నేపథ్యంలో సభ నుంచి వైదొలగడం రాజకీయ వర్గాల్లో చర్చనీయాంశంగా మారింది.
KTR :కుటుంబంలో భేదాభిప్రాయాలు సహజమే!
కవిత రాజీనామా ఆమోదంతో ఇప్పుడు నిజామాబాద్ స్థానిక సంస్థల ఎమ్మెల్సీ స్థానం ఖాళీ అయింది. దీనిపై త్వరలోనే కేంద్ర ఎన్నికల సంఘం ఉప ఎన్నిక నిర్వహించే అవకాశం ఉంది. బీఆర్ఎస్ నుంచి బహిష్కరణకు గురైన తర్వాత కవిత భవిష్యత్ రాజకీయ కార్యాచరణ ఏమిటన్నది ఇప్పుడు ఆసక్తికరంగా మారింది. ఆమె స్వతంత్రంగా కొనసాగుతారా లేక మరేదైనా రాజకీయ నిర్ణయం తీసుకుంటారా అన్నది వేచి చూడాలి. ప్రస్తుతం ఆమె రాజీనామా ఆమోదం పొందడంతో మండలిలో బీఆర్ఎస్ బలం కూడా ఒక స్థానం తగ్గింది.
Read hindi news: hindi.vaartha.com
Epaper : epaper.vaartha.com