తెలంగాణ రాజకీయాల్లో కొత్త చర్చకు దారితీస్తున్న నిర్ణయం తీసుకున్నారు బీఆర్ఎస్ నేత కల్వకుంట్ల కవిత. తన తండ్రి, మాజీ ముఖ్యమంత్రి కల్వకుంట్ల చంద్రశేఖర్రావు (కెసీఆర్) అండ లేకుండా తొలిసారిగా ప్రజల్లోకి వెళ్తున్నారు. ఆమె ప్రారంభించబోయే ‘జాగృతి జనం బాట’ యాత్రలో కెసీఆర్ ఫొటో లేకుండా కేవలం జాగృతి జెండా, అజెండానే ప్రజలకు వినిపించనున్నట్లు ఇప్పటికే స్పష్టం చేశారు. తెలంగాణ ఉద్యమ సమయంలో ‘బతుకమ్మ’, ‘జాగృతి’ పేరుతో మహిళా శక్తిని సమీకరించిన కవిత ఇప్పుడు అదే వేదికను మళ్లీ ప్రజాసంబంధాల సాధనగా ఉపయోగించాలనుకుంటున్నారు. అయితే ఈసారి ఆమె అడుగులు వ్యక్తిగత రాజకీయ గుర్తింపుని బలపరచే ప్రయత్నంగానే కనిపిస్తున్నాయి.
జాగృతి సంస్థ తెలంగాణ ఉద్యమ సమయంలో సాంస్కృతిక వేదికగా కీలక పాత్ర పోషించిన విషయం తెలిసిందే. కానీ రాష్ట్ర ఏర్పాటుతో ఆ సంస్థ ప్రజా దృష్టి నుంచి క్రమంగా దూరమైంది. ఇప్పుడు కవిత ‘జాగృతి మూలాలకు తిరిగి వెళ్తోంది’ అని చెబుతున్నా, ఈ సారి దాని నేపథ్యం పూర్తిగా భిన్నంగా ఉంది. రాజకీయ పరంగా కవితకు స్వతంత్ర ఇమేజ్ అవసరం ఉన్న దశలో ఈ యాత్ర ప్రారంభం అవుతోంది. ముఖ్యంగా బీఆర్ఎస్ పార్టీకి ఎదురవుతున్న సవాళ్లు, కెసీఆర్ ఆరోగ్య పరిస్థితులు, పార్టీ భవిష్యత్తు చర్చల మధ్య కవిత సొంత బాటలో నడవాలని నిర్ణయించుకోవడం గమనార్హం.
అయితే ఈ బోల్డ్ డిసిషన్కు ప్రజలు ఎలా స్పందిస్తారన్నది ఇప్పుడు కీలక అంశంగా మారింది. కెసీఆర్ ఫొటో లేకుండా, కుటుంబ ప్రభావం దూరంగా ఉంచి కవిత తన రాజకీయ భవిష్యత్తు నిర్మించుకోగలరా అన్నదే అందరి దృష్టి. ఆమె యాత్రలో జాగృతి అజెండా కేవలం సాంస్కృతిక చైతన్యంగా మిగిలిపోతుందా, లేక అది కొత్త రాజకీయ బాటకు దారితీస్తుందా అన్న ప్రశ్నలకు సమాధానం రానున్న వారాల్లో స్పష్టమవుతుంది. మొత్తానికి, కవిత ఈ నిర్ణయం తెలంగాణ రాజకీయాల్లో కొత్త శక్తిసమీకరణాలకు నాంది కావొచ్చని రాజకీయ విశ్లేషకులు అంచనా వేస్తున్నారు.
Read hindi news: https://hindi.vaartha.com
Epaper : https://epaper.vaartha.com/