తెలంగాణ జాగృతి అధ్యక్షురాలు కల్వకుంట్ల కవిత మీడియా సమావేశంలో చేసిన వ్యాఖ్యలు రాష్ట్ర రాజకీయాల్లో తీవ్ర చర్చనీయాంశంగా మారాయి. మాజీ మంత్రి హరీశ్ రావు (Harish Rao) మరియు మాజీ ఎంపీ సంతోష్ తమపై రాజకీయ కుట్రలు పన్నారని ఆమె ఆరోపించారు. ఆ కుట్రల వెనుక ముఖ్యమంత్రి రేవంత్ రెడ్డి ఉన్నారని ఆరోపిస్తూ, వారంతా కలిసి లోపాయికారి ఒప్పందంతో పనిచేస్తున్నారంటూ తీవ్ర స్థాయిలో విమర్శలు గుప్పించారు.
కాళేశ్వరం అంశంలో హరీశ్ రావు బాధ్యతేంటని ప్రశ్న
కాళేశ్వరం ప్రాజెక్టుపై ప్రతిపక్షాల విమర్శలపై స్పందించిన కవిత, ఒక చిన్న భాగం కుంగిపోయినందునే మొత్తం ప్రాజెక్టుపై అనవసరమైన ఆరోపణలు వస్తున్నాయన్నారు. ఇరిగేషన్ శాఖను ఐదేళ్ల పాటు నడిపిన హరీశ్ రావు ఈ లోపాలకు బాధ్యత వహించకపోవడాన్ని ఆమె ప్రశ్నించారు. మేఘా ఇంజినీరింగ్, హరీశ్ రావు, సంతోష్ కలిసి వ్యవహరించడంతోనే కేసీఆర్కు చెడ్డ పేరు వచ్చిందని అన్నారు.
సీబీఐ దర్యాప్తుపై బాధ
తండ్రి కేసీఆర్ (KCR) పై సీబీఐ దర్యాప్తు ఆదేశించడాన్ని తీవ్రంగా వ్యతిరేకించిన కవిత, ఇది తాను కుమార్తెగా ఎంతో బాధపడే అంశమని వ్యాఖ్యానించారు. “పార్టీ ఉండకపోయినా పరవాలేదు, కానీ ఇది నా తండ్రి పరువు విషయం,” అంటూ ఆవేదన వ్యక్తం చేశారు. గతంలో తాను రాసిన లేఖ బయటకు వచ్చినప్పటికీ ఎవరి పేర్లను బయటపెట్టలేదని తెలిపారు.
కేసీఆర్ మీద అన్యాయం – తాను ఎందుకు స్పందించాల్సి వచ్చిందన్న కవిత
కేసీఆర్ ప్రజల కోసం నిజాయితీగా పనిచేస్తే, ఆయన చుట్టూ ఉన్న కొందరు మాత్రం తమ స్వలాభం కోసం వ్యవహరించారని ఆరోపించారు. నిన్నటి దాకా ఆయనపై ఎన్నో విమర్శలు వస్తున్నా, ఒక్క నాయకుడు కూడా ఆయనకు మద్దతుగా మాట్లాడలేదని ఆమె అసంతృప్తిని వ్యక్తం చేశారు. ఇది పార్టీలో ఉన్న విభేదాలను స్పష్టంగా చూపిస్తోందని పరోక్షంగా చెప్పుకొచ్చారు.
బీసీ రిజర్వేషన్లు – బీహార్ కోసం తెలంగాణ బిడ్డల బలి
బీసీ రిజర్వేషన్లపై బిల్లు తెచ్చినా, దానిపై సుప్రీంకోర్టు వరకు పోరాటం చేయకపోవడాన్ని కవిత గట్టిగా ప్రశ్నించారు. “తెలంగాణ బీసీ బిడ్డలను బీహార్ రాజకీయాల కోసం బలిగా మారుస్తున్నారని” ఆమె తీవ్ర ఆగ్రహాన్ని వ్యక్తం చేశారు. ఇది రాష్ట్రానికి అన్యాయం చేయడమేనని ఆమె పేర్కొన్నారు.
కేసీఆర్ పై ఎలాంటి దర్యాప్తు వచ్చినా ఆయన నిర్దోషి అని నమ్మకం
చివరగా, సీబీఐ కాకపోయినా ఇతర దర్యాప్తు సంస్థలు కేసీఆర్పై విచారణ జరిపినా, ఆయన ఎంత స్వచ్ఛమైన నాయకుడో దేశానికి తెలిసే రోజు వస్తుందని కవిత ధీమా వ్యక్తం చేశారు. “కేసీఆర్ హిమాలయ పర్వతంలాంటి నాయకుడు. ఎటువంటి మచ్చ పడకుండా బయటపడతారు” అని నమ్మకంతో అన్నారు.
Read hindi news: hindi.vaartha.com
Read also: