వాయువ్య బంగాళాఖాతం మరియు బెంగాల్ తీర ప్రాంతంలో ఏర్పడిన వాయుగుండం పశ్చిమ వాయువ్య దిశగా కదిలి, శుక్రవారం ఉదయం బెంగాల్ మరియు బంగ్లాదేశ్ తీరాలను దాటిందని వాతావరణ శాఖ ప్రకటించింది. ఇది ప్రస్తుతం సాగర్ ద్వీపానికి 80 కిలోమీటర్ల దూరంలో కేంద్రీకృతమై ఉందని తెలిపింది. వాయుగుండం ఉత్తర ఒడిశా, జార్ఖండ్ మీదుగా పశ్చిమ దిశగా కదిలే అవకాశముందని అధికారులు తెలిపారు. దీని ప్రభావంతో ఉపరితల ద్రోణి 4.5 కిలోమీటర్ల ఎత్తు వరకు విస్తరించిందని పేర్కొన్నారు.
తెలంగాణలో నాలుగు రోజులపాటు భారీ వర్షాలు
ఈ వాయుగుండం ప్రభావంతో రాబోయే నాలుగు రోజుల్లో తెలంగాణలో విస్తారంగా వర్షాలు కురిసే అవకాశం ఉందని హైదరాబాద్ వాతావరణ కేంద్రం హెచ్చరించింది. శుక్రవారం ఆదిలాబాద్, ఆసిఫాబాద్, మంచిర్యాల, నిర్మల్, నిజామాబాద్, జయశంకర్ భూపాలపల్లి, ములుగు, ఖమ్మం, హన్మకొండ, మెదక్, కామారెడ్డి జిల్లాల్లో భారీ వర్షాలు పడే అవకాశముందని తెలిపింది. శనివారం రాష్ట్రవ్యాప్తంగా ఉరుములు, మెరుపులు మరియు బలమైన ఈదురుగాలులతో కూడిన వర్షాలు కురిసే అవకాశముందని పేర్కొంది.
ఇప్పటికే భారీ వర్షపాతం – రాబోయే రోజుల్లో మరిన్ని జిల్లాలకు హెచ్చరిక
ఆదివారం మరియు సోమవారం రోజుల్లోనూ వర్షపాతం కొనసాగనున్నట్లు వాతావరణ శాఖ స్పష్టం చేసింది. ఆదివారం కరీంనగర్, రాజన్న సిరిసిల్ల, పెద్దపల్లి, వికారాబాద్, సంగారెడ్డి సహా పలు జిల్లాల్లో భారీ వర్షాలు కురుస్తాయని చెప్పింది. సోమవారం రాష్ట్రవ్యాప్తంగా 20కి పైగా జిల్లాల్లో అక్కడక్కడ భారీ వర్షాలు కురిసే సూచనలున్నాయని పేర్కొంది. గడచిన 24 గంటల్లో ఆసిఫాబాద్ జిల్లా రవీంద్రనగర్లో 7.5 సెం.మీ, కౌటాలలో 7.4 సెం.మీ, లోనవెల్లిలో 6.7 సెం.మీ వర్షపాతం నమోదవడంతో భారీ వర్షానికి ఉదాహరణగా నిలిచింది.
Read Also : Paadi Kaushik Reddy : రేవంత్ రెడ్డిపై కౌశిక్ రెడ్డి తీవ్ర వ్యాఖ్యలు
