Hyderabad Metro : మెట్రో ఫేజ్ II-బి ప్రతిపాదనలు కేంద్రానికి సమర్పించిన తెలంగాణ ప్రభుత్వం

హైదరాబాద్ (Hyderabad) ప్రజా రవాణా వ్యవస్థను మరింత బలోపేతం చేసేందుకు తెలంగాణ ప్రభుత్వం కీలక అడుగు వేసింది. మెట్రో రైల్ (Metro Rail) ప్రాజెక్టు రెండో దశలో భాగంగా ‘ఫేజ్ II-బీ’ విస్తరణ ప్రతిపాదనలు శనివారం కేంద్రానికి పంపించారు. హైదరాబాద్ (Hyderabad Metro) ఎయిర్‌పోర్ట్ మెట్రో లిమిటెడ్ (హెచ్ఏఎంఎల్) ఈ విషయాన్ని వెల్లడించింది.

ఫేజ్ II-బీలో మూడు మెట్రో మార్గాలు

ఈ దశలో మొత్తం 86.1 కిలోమీటర్ల మేర మూడు మార్గాలు నిర్మించనున్నారు. వీటి కోసం రూ.19,579 కోట్ల ఖర్చు అవుతుందని అంచనా. ఇందులో ముఖ్యంగా:
విమానాశ్రయం నుంచి భారత్ ఫ్యూచర్ సిటీ: 39.6 కిలోమీటర్లు (రూ.7,168 కోట్లు)
జేబీఎస్ నుంచి మేడ్చల్: 24.5 కిలోమీటర్లు (రూ.6,946 కోట్లు)
జేబీఎస్ నుంచి శామీర్‌పేట్: 22 కిలోమీటర్లు (రూ.5,465 కోట్లు)

కేంద్ర-రాష్ట్ర భాగస్వామ్యంతో ప్రాజెక్టు

ఈ విస్తరణను కేంద్ర-రాష్ట్ర భాగస్వామ్యంతో చేపట్టాలన్నది రాష్ట్రం అభిప్రాయం. ఖర్చు వాహకత్వం ఇలా ఉంటుంది:
తెలంగాణ వాటా: 30 శాతం (రూ.5,874 కోట్లు)
కేంద్ర వాటా: 18 శాతం (రూ.3,524 కోట్లు)
విదేశీ రుణాలు: 48 శాతం (రూ.9,398 కోట్లు)
పీపీపీ పద్ధతిలో: 4 శాతం (రూ.783 కోట్లు)

ఫేజ్ II-ఎ ప్రతిపాదనలపై చర్చలు కొనసాగుతున్నాయి

76.4 కిలోమీటర్ల ఐదు కారిడార్లతో కూడిన ‘ఫేజ్ II-ఎ’ ప్రాజెక్టుకు రాష్ట్ర ప్రభుత్వం ఇప్పటికే ఆమోదం తెలిపింది. రూ.24,269 కోట్ల వ్యయంతో దీనిని అభివృద్ధి చేయనున్నారు. సీఎం రేవంత్ రెడ్డి ఇటీవల ఢిల్లీలో కేంద్ర మంత్రి ఖట్టర్‌ను కలుసుకుని దీనికి ఆమోదం కోరారు.

సుస్థిర అభివృద్ధికి మెట్రో అవసరం

హైదరాబాద్ (Hyderabad Metro) వేగంగా అభివృద్ధి చెందుతోందని, మెట్రో అవసరం మరింత పెరిగిందని సీఎం వివరించారు. మెట్రో ప్రాజెక్టు పూర్తయితే ట్రాఫిక్ తగ్గి, ప్రయాణం సులభమవుతుందన్నారు. జైకా, ఏడీబీ సంస్థలతో పాటు పీపీపీ మోడల్ ద్వారా నిధులు సమీకరించాలని రాష్ట్రం భావిస్తోంది.ఇప్పటికే ఫేజ్ I కింద 69.2 కిలోమీటర్లకు పైగా మార్గాలు నిర్మించి ప్రజలకు అందుబాటులోకి తీసుకొచ్చారు. రూ.22,000 కోట్ల వ్యయంతో నిర్మితమైన ఈ ప్రాజెక్టు ప్రపంచంలో అతిపెద్ద పీపీపీ మెట్రో ప్రాజెక్టుగా గుర్తింపు పొందింది.