HYderabad Employees: హైదరాబాద్‌ ఉద్యోగులకు హెచ్‌ఆర్‌ఏ మినహాయింపు..ఎంత అంటే?

రెండు దశాబ్దాల క్రితం రూపొందించిన పాత పన్ను చట్టం స్థానంలో కేంద్ర ప్రభుత్వం తీసుకువచ్చిన ఆదాయపు పన్ను చట్టం-2025 భారత ఆర్థిక వ్యవస్థలో ఒక కీలక మైలురాయిగా నిలవనుంది. దీనికి అనుగుణంగా కేంద్ర ప్రత్యక్ష పన్నుల బోర్డు (CBDT) నోటిఫై చేసిన ఆదాయపు పన్ను నిబంధనలు-2026, ఈ ఏడాది ఏప్రిల్ 1 నుంచి అమల్లోకి రానున్నాయి. ఈ కొత్త నిబంధనలు కేవలం పన్ను వసూళ్లకే పరిమితం కాకుండా.. మారుతున్న జీవన ప్రమాణాలు, డిజిటల్ లావాదేవీలకు అనుగుణంగా సామాన్యులకు, ముఖ్యంగా వేతన జీవులకు భారీ ఊరటనిచ్చేలా రూపొందించబడ్డాయి. ఈ చట్టంలోని అత్యంత ప్రధానమైన మార్పు ఇంటి అద్దె భత్యం (HRA) మినహాయింపులో కనిపిస్తుంది. గతంలో కేవలం నాలుగు ప్రధాన మెట్రో నగరాలకే పరిమితమైన 50 శాతం పన్ను మినహాయింపు ప్రయోజనాన్ని, ఇప్పుడు Hyderabad, బెంగళూరు, పుణె, అహ్మదాబాద్ వంటి నగరాలకు విస్తరించడం ద్వారా ప్రభుత్వం ఆయా నగరాల్లో పెరుగుతున్న జీవన వ్యయాన్ని గుర్తించినట్లయింది.

HYderabad Employees: 50% HRA exemption for Hyderabad employees

పెరగనున్న లక్షలాది మంది ఉద్యోగుల నికర ఆదాయం

దీనివల్ల సాఫ్ట్‌వేర్, ఇతర రంగాల్లోని లక్షలాది మంది ఉద్యోగుల చేతికి వచ్చే నికర ఆదాయం పెరుగుతుంది. అయితే, ఈ ప్రయోజనం పొందాలంటే అద్దెదారులకు, యజమానులకు మధ్య స్పష్టమైన అద్దె ఒప్పందాలు ఉండాలని ప్రభుత్వం నిబంధన విధించింది. అలాగే, ఈ రాయితీలు కేవలం పాత పన్ను విధానాన్ని ఎంచుకునే వారికి మాత్రమే వర్తిస్తాయని స్పష్టం చేయడం ద్వారా, పన్ను చెల్లింపుదారులు తమకు అనుకూలమైన విధానాన్ని ఎంచుకునేలా ప్రోత్సహిస్తోంది. మరోవైపు, పర్యావరణ పరిరక్షణలో భాగంగా ఎలక్ట్రిక్ వాహనాల (EV) వాడకాన్ని పన్ను నిబంధనల్లో ప్రోత్సహించడం విశేషం. ఉద్యోగులు తమ వ్యక్తిగత, అధికారిక అవసరాల కోసం ఈవీలను వాడుతున్నప్పుడు, వాటి అదనపు ప్రయోజనాల (Perquisites) విలువను తక్కువ ఇంజిన్ సామర్థ్యం కలిగిన సాధారణ కార్లతో సమానంగా లెక్కించడం వల్ల పన్ను భారం తగ్గుతుంది. ఇది పరోక్షంగా దేశంలో గ్రీన్ ఎనర్జీ వినియోగాన్ని పెంచడానికి దోహదపడుతుంది. డ్రాఫ్ట్ ఆదాయపు పన్ను నియమాలు 2026 కొత్త రూల్స్.. తల్లిదండ్రులకు అద్దె చెల్లిస్తే HRA మినహాయింపు ఉంటుందా.. ఆర్థిక పారదర్శకతను పెంచే క్రమంలో పాన్ (PAN) కార్డు సమర్పించాల్సిన లావాదేవీల పరిమితుల్లో కూడా కీలక మార్పులు చోటుచేసుకున్నాయి. గతంలో రోజువారీ నగదు లావాదేవీలపై ఉన్న కఠిన నిబంధనలను సడలించి, వార్షిక ప్రాతిపదికన రూ. 10 లక్షల పరిమితిని విధించడం ద్వారా సామాన్య పౌరులకు బ్యాంకింగ్ వ్యవహారాల్లో ఊరట లభించింది.