తెలంగాణ రాష్ట్రంలోని సంగారెడ్డి (Sangareddy) జిల్లా, పాశమైలారం (Pashamylaram) పారిశ్రామికవాడలో సోమవారం ఉదయం జరిగిన భారీ పేలుడు కలకలం రేపింది. ఈ ప్రమాదంలో ఇప్పటి వరకు ఆరుగురు కార్మికులు ప్రాణాలు కోల్పోయారు, మరో 20 మంది తీవ్రంగా గాయపడ్డారు. పేలుడు తీవ్రతకు వంద మీటర్ల దూరానికి కార్మికులు ఎగిరిపడినట్లు ప్రత్యక్ష సాక్షులు తెలిపారు.
పేలిన విధానం మరియు కారణాలు
ఈ ప్రమాదం సిగాచీ కెమికల్ ఫ్యాక్టరీలో రియాక్టర్ విఫలమవడం వల్ల జరిగినట్లు ప్రాథమికంగా అధికారులు అనుమానిస్తున్నారు. పేలుడు తీవ్రతకు రియాక్టర్ ఉన్న షెడ్డు మొత్తం కూలిపోయిందని, ఫ్యాక్టరీలో మంటలు ఎగిసిపడుతున్నాయని స్థానికులు తెలిపారు. ప్రమాదం జరిగిన సమయంలో ఫ్యాక్టరీలో పెద్ద సంఖ్యలో కార్మికులు పనిచేస్తున్నారని వివరించారు.
మృతులు మరియు గాయపడిన వారి పరిస్థితి
పేలుడు ధాటికి వంద మీటర్ల దూరం ఎగిరిపడ్డ కార్మికుల్లో అక్కడికక్కడే ఐదుగురు మరణించారు. ఆసుపత్రిలో చికిత్స పొందుతూ మరో కార్మికుడు చనిపోయాడని అధికార వర్గాలు తెలిపాయి. సిగాచీ కెమికల్ ఫ్యాక్టరీ లోపల పరిస్థితి భయానకంగా ఉందని, ఎక్కడ చూసినా కార్మికులు పడిపోయి కనిపించారని అధికారులు తెలిపారు. గాయపడిన వారిని చందానగర్, ఇస్నాపూర్లోని ప్రైవేటు ఆస్పత్రులకు తరలించారు. చికిత్స పొందుతున్న వారిలో మరికొందరి పరిస్థితి విషమంగా ఉన్నట్లు తెలుస్తోంది.
సహాయక చర్యలు
ఘటనాస్థలానికి సంగారెడ్డి జిల్లా కలెక్టర్ ప్రావీణ్య, ఎస్పీ పరితోష్ హాజరై పరిస్థితిని సమీక్షించారు. 11 ఫైరింజన్లతో అగ్నిమాపక సిబ్బంది అక్కడికి చేరుకుని మంటలను అదుపులోకి తీసుకు వచ్చేందుకు యత్నిస్తున్నారు.
పరిసర ప్రాంత ప్రజల్లో భయం
శిథిలాల కింద మరికొంతమంది కార్మికులు చిక్కుకుని ఉంటారని అనుమానం వ్యక్తం చేస్తున్నారు. ఈ క్రమంలో మృతుల సంఖ్య భారీగా పెరిగే అవకాశం ఉందనే ఆందోళనలు వ్యక్తమవుతున్నాయి. కార్మికుల్లో పలువురు ఫోన్లు పనిచేయకపోవడంతో వారి కుటుంబ సభ్యుల్లో ఆందోళన నెలకొంది. ఇదిలా ఉండగా, పరిశ్రమ నుంచి వెలువడుతున్న ఘాటైన వాసనల కారణంగా పరిసర ప్రాంతాల ప్రజలు తీవ్ర ఇబ్బందులు ఎదుర్కొంటున్నారు.
Read also: Factory Blast: పాశమైలారంలో ఫ్యాక్టరీ పేలుడు – 20 మందికి తీవ్ర గాయాలు
