తెలంగాణ రాష్ట్రంలోని అన్ని ప్రభుత్వ పాఠశాలలు, కళాశాలల్లో త్వరలోనే ఫేషియల్ రికగ్నిషన్ హాజరు విధానం (Facial recognition attendance system) అమలులోకి రానుంది. విద్యార్థులు, అధ్యాపకులు, బోధనేతర సిబ్బంది హాజరును ఈ సాంకేతికతతో రికార్డు చేయాలని ముఖ్యమంత్రి ఎ. రేవంత్ రెడ్డి (Revanth Reddy) ఆదేశించారు. ఈ విధానం ద్వారా హాజరు శాతం మెరుగుపడటమే కాకుండా, వృత్తి విద్యా సంస్థల్లోని లోపాలను కూడా సరిదిద్దవచ్చని ఆయన అభిప్రాయపడ్డారు.హైదరాబాద్లోని ఇంటిగ్రేటెడ్ కమాండ్ అండ్ కంట్రోల్ సెంటర్ (ICCC) లో విద్యాశాఖపై సమీక్ష జరిపిన సీఎం రేవంత్ రెడ్డి, పలు ముఖ్యమైన నిర్ణయాలు తీసుకున్నారు. ప్రభుత్వ విద్యాసంస్థల్లో నాణ్యమైన విద్య అందించేందుకు అన్ని అవసరమైన చర్యలు చేపట్టాలని స్పష్టం చేశారు. పాఠశాలల నుంచి విశ్వవిద్యాలయాల వరకు మౌలిక వసతులు మెరుగుపర్చడం, ఆధునిక బోధనా సౌకర్యాలు కల్పించడం తప్పనిసరి అని పేర్కొన్నారు.
నిర్మాణ పనులకు కొత్త మార్గదర్శకాలు
విద్యా సంస్థల్లో అదనపు తరగతి గదులు, వంటశాలలు, టాయిలెట్లు, ప్రహరీ గోడల నిర్మాణ పనులను వేర్వేరు ఏజెన్సీలకు అప్పగించడం సరైన పద్ధతి కాదని సీఎం అన్నారు. నాణ్యత, పర్యవేక్షణ, నిధుల వినియోగంలో పారదర్శకత కోసం ఈ పనులన్నింటినీ ఒకే విభాగం నిర్వహించాలని ఆదేశించారు. ఇప్పటికే గురుకుల పాఠశాలల నిర్మాణాన్ని పర్యవేక్షిస్తున్న ఎడ్యుకేషన్ అండ్ వెల్ఫేర్ ఇన్ఫ్రాస్ట్రక్చర్ డెవలప్మెంట్ కార్పొరేషన్ (EWIDC) కు ఈ బాధ్యత అప్పగించాలని ఆయన తేల్చిచెప్పారు.
మధ్యాహ్న భోజన పథకంపై దృష్టి
మధ్యాహ్న భోజన పథకానికి సంబంధించిన పెండింగ్ బిల్లులు గ్రీన్ ఛానెల్ ద్వారా వెంటనే క్లియర్ చేయాలని సీఎం ఆదేశించారు. ఇందులో ఎలాంటి జాప్యం జరగరాదని హెచ్చరించారు. అలాగే ‘అమ్మ ఆదర్శ పాఠశాలల్లో’ చేపట్టిన పారిశుద్ధ్య పనుల బకాయిలను కూడా తక్షణమే చెల్లించాలని సూచించారు.మహిళా కళాశాలలు, బాలికల పాఠశాలల్లో మరుగుదొడ్ల నిర్మాణాన్ని వేగవంతం చేయాలని, వంట కోసం సోలార్ ప్యానెల్ కిచెన్లు ఏర్పాటు చేయాలని ఆయన ప్రత్యేకంగా ఆదేశించారు.
క్రీడలకు ప్రాధాన్యత
క్రీడా రంగానికి ప్రభుత్వం అధిక ప్రాధాన్యత ఇస్తుందని సీఎం మరోసారి స్పష్టం చేశారు. అవసరమైతే కాంట్రాక్ట్ పద్ధతిలో ఫిజికల్ ఎడ్యుకేషన్ టీచర్లను (PETలు) నియమించాలని సూచించారు. గురుకులాల్లో చదువుతున్న బాలికలకు మహిళా కౌన్సెలర్లు అందుబాటులో ఉండాలని కూడా సమావేశంలో చర్చించారు.విద్యా రంగంపై చేసే ఖర్చును ఖర్చుగా కాకుండా పెట్టుబడిగా భావించాలని సీఎం అన్నారు. ప్రభుత్వ పాఠశాలల్లో 90% పైగా బీసీ, ఎస్సీ, ఎస్టీ, మైనారిటీ విద్యార్థులు చదువుతున్నారని గుర్తుచేశారు. గత 10 ఏళ్లలో చదువుకున్న వారి వివరాలతో సమగ్ర నివేదిక సిద్ధం చేయాలని అధికారులను ఆదేశించారు.
Read Also :
