తెలంగాణ ఎక్సైజ్ శాఖలో విషాద ఛాయలు అలుముకున్నాయి. గంజాయి స్మగ్లర్ల కిరాతకానికి బలైన నిజామాబాద్ ఎక్సైజ్ కానిస్టేబుల్ సౌమ్య మరణం రాష్ట్రవ్యాప్తంగా కలకలం సృష్టించింది. విధి నిర్వహణలో భాగంగా స్మగ్లర్లను అడ్డుకునే క్రమంలో తీవ్రంగా గాయపడిన ఆమె, హైదరాబాద్లోని నిమ్స్ (NIMS) ఆసుపత్రిలో వారం రోజులుగా మృత్యువుతో పోరాడి నిన్న రాత్రి తుదిశ్వాస విడిచారు. సమాజ రక్షణ కోసం ప్రాణాలను పణంగా పెట్టిన ఒక యువ కానిస్టేబుల్ ఇలా అకాల మరణం చెందడం పట్ల తోటి ఉద్యోగులు, ప్రజలు కన్నీరుమున్నీరవుతున్నారు.
Ambati Arrest : అంబటి అరెస్ట్..నల్లపాడు పోలీస్ స్టేషన్ కు తరలింపు
జనవరి 23వ తేదీన నిజామాబాద్ పరిధిలో గంజాయి స్మగ్లర్ల కదలికలపై సమాచారం అందడంతో ఎక్సైజ్ బృందం తనిఖీలు చేపట్టింది. ఈ క్రమంలో ఇద్దరు స్మగ్లర్లు కారులో పారిపోయేందుకు ప్రయత్నించగా, సౌమ్య సాహసోపేతంగా వారిని అడ్డుకునే ప్రయత్నం చేశారు. అయితే, మానవత్వం లేని ఆ స్మగ్లర్లు ఆమెను తప్పించుకుని వెళ్లేందుకు మొదట కారుతో బలంగా ఢీకొట్టారు. అంతటితో ఆగకుండా, ఆమె కింద పడిపోయినట్లు గమనించిన నిందితులు, కారును రివర్స్ తీస్తూ రెండోసారి ఆమెపై నుంచి పోనిచ్చారు. ఈ క్రూరమైన దాడిలో ఆమె శరీరంలోని అంతర్గత అవయవాలు పూర్తిగా ఛిద్రమయ్యాయి.
ప్రమాదం జరిగిన వెంటనే ఆమెను అత్యవసర చికిత్స కోసం హైదరాబాద్ నిమ్స్కు తరలించారు. ఆమె ప్రాణాలను కాపాడేందుకు వైద్య బృందం శతవిధాలా ప్రయత్నించింది. ఈ క్రమంలోనే దెబ్బతిన్న ఒక కిడ్నీని శస్త్రచికిత్స ద్వారా తొలగించారు. వారం రోజుల పాటు వెంటిలేటర్పై ఉండి ప్రాణాల కోసం పోరాడిన సౌమ్య, పరిస్థితి విషమించడంతో కన్నుమూశారు. ఈ దారుణానికి ఒడిగట్టిన నిందితులను పట్టుకునేందుకు పోలీసులు గాలింపు చర్యలు ముమ్మరం చేశారు. ఒక కర్తవ్య పరాయణత కలిగిన అధికారిణిని పొగొట్టుకోవడం ఎక్సైజ్ శాఖకు తీరని లోటు. ప్రభుత్వం ఆమె కుటుంబానికి అండగా ఉండాలని సర్వత్రా డిమాండ్లు వినిపిస్తున్నాయి.
