మంత్రివర్గ విస్తరణకు బ్రేక్
తెలంగాణలో రాజకీయ సమీకరణాలు రోజురోజుకు మలుపులు తిరుగుతున్నాయి. ముఖ్యమంత్రి రేవంత్ రెడ్డి మంత్రివర్గ విస్తరణపై నిర్ణయం తీసుకోవాలని భావించినా, కాంగ్రెస్ హైకమాండ్ నుంచి తుది ఆమోదం రాకపోవడంతో ప్రస్తుతానికి విస్తరణ నిలిచిపోయింది. మంత్రుల ఎంపికపై హైకమాండ్ లో చర్చలు కొనసాగుతున్నప్పటికీ, క్లారిటీ రాకపోవటంతో రాష్ట్రానికి చెందిన నేతలు నిరీక్షణలో ఉన్నారు.
సుప్రీంకోర్టులో పెండింగ్ కేసు.. ఉత్కంఠ
ఇక, బీఆర్ఎస్ పార్టీ నుంచి కాంగ్రెస్లో చేరిన ఎమ్మెల్యేలు అనర్హతపై సుప్రీంకోర్టులో విచారణ పూర్తై తీర్పును రిజర్వ్ చేసింది. ఈ కేసు ఫలితం రాజకీయ సమీకరణాలపై ప్రభావం చూపే అవకాశం ఉంది. అసెంబ్లీలో సీఎం రేవంత్ చేసిన వ్యాఖ్యలపై కూడా కోర్టులో చర్చ జరిగింది. బీఆర్ఎస్ పార్టీ ఈ ఎమ్మెల్యేలు అనర్హులేనని న్యాయస్ధానాన్ని ఆశ్రయించగా, కాంగ్రెస్ మాత్రం చట్టబద్ధంగానే పార్టీ మారిందని వాదిస్తోంది. ఈ తీర్పు దిశగా అన్ని రాజకీయ పక్షాలు ఆసక్తిగా ఎదురుచూస్తున్నాయి.
రేవంత్ కొత్త వ్యూహాల దిశగా
తాజా పరిణామాలతో రేవంత్ సర్కార్ కీలక వ్యూహాలు రచిస్తోంది. ఎన్నికలు ఎప్పుడైనా రావచ్చన్న నేపధ్యంలో, ప్రస్తుత పరిస్థితిని ఎన్నికల లాభానికి మలచుకునే ప్రయత్నాల్లో ఉంది. ముఖ్యంగా బీసీల ఓటు బ్యాంకును ఆకర్షించేందుకు 42 శాతం రిజర్వేషన్లతో స్థానిక సంస్థల ఎన్నికలు నిర్వహించేందుకు రంగం సిద్ధం చేస్తోంది.
బీసీలకు 42 శాతం రిజర్వేషన్లు.. చర్చల్లో కీలక బిల్లు
తెలంగాణ అసెంబ్లీలో ప్రభుత్వం ప్రవేశపెట్టిన రెండు కీలక బిల్లులు – బీసీలకు స్థానిక సంస్థలు, విద్యా, ఉద్యోగ రంగాల్లో రిజర్వేషన్లను 29 శాతం నుంచి 42 శాతానికి పెంచే బిల్లులు గవర్నర్ ఆమోదానికి పంపబడ్డాయి. అయితే ఈ బిల్లులు ఇప్పటివరకు పార్లమెంటు ఉభయ సభల్లో చర్చకు రాలేదు. వానాకాలం సమావేశాల్లోనే వీటిపై చర్చ జరగవచ్చని అంచనా. దీంతో తక్షణంలో ఎన్నికలు జరిగితే గతంలో అమలైన రిజర్వేషన్లే వర్తించనున్నాయి.
స్థానిక సంస్థల ఎన్నికలకు సన్నాహాలు
ప్రభుత్వం జూలైలో ఎంపీటీసీ, జడ్పీటీసీ, మున్సిపాలిటీ, సర్పంచ్ ఎన్నికలు నిర్వహించేందుకు కసరత్తు ప్రారంభించింది. అధికార వర్గాల సమాచారం మేరకు, గ్రామాల్లో ఇప్పటికే సర్పంచ్ల పదవీకాలం ముగిసి ఏడాదికి పైగా కావడంతో, ముందుగా సర్పంచ్ ఎన్నికలే జరిపితే కేంద్ర నిధులు విడుదల అయ్యే అవకాశం ఉందని అధికారుల సూచనలున్నాయి.
నిధుల నిర్బంధం కారణంగా తొలుత సర్పంచ్ ఎన్నికలు?
గ్రామీణ అభివృద్ధికి కేంద్రం అందించే 15వ ఆర్థిక సంఘం నిధులు రూ.1,500 కోట్లకు పైగా పెండింగ్లో ఉన్నాయని, కొత్త పాలకవర్గాల ఏర్పాటుతో వాటిని పొందే అవకాశం ఉందని అధికారులు భావిస్తున్నారు. దీంతో ముందుగా సర్పంచ్ ఎన్నికలే జరిపితే మంచిదన్న అభిప్రాయాన్ని ప్రభుత్వం పరిశీలిస్తోంది.
కేసీఆర్ వ్యూహాలు.. వరుస సమావేశాలు
దీన్ని ఎదుర్కొనేందుకు మాజీ సీఎం కేసీఆర్ కూడా ఖాళీగా లేరు. వరుస సమావేశాలు నిర్వహిస్తూ పార్టీ శ్రేణులకు మార్గదర్శనం చేస్తున్నారు. బీఆర్ఎస్ వర్గం ఉప ఎన్నికలే తప్పవని భావిస్తోంది. ఒకవేళ సుప్రీంకోర్టు అనర్హత తీర్పు ఇచ్చినట్లయితే, రాష్ట్రంలో త్వరితగతిన ఉప ఎన్నికలు జరగే అవకాశం ఉంది. అటువంటి పరిస్థితిని కలుగజేయకుండా తగిన వ్యూహాలతో కేసీఆర్ ముందుకు సాగుతున్నారు.
ఎన్నికలు ముందస్తా? లేక గడువు ప్రకారమా?
ఇప్పటి దాకా వచ్చిన సంకేతాల ప్రకారం, రాష్ట్రంలో స్థానిక సంస్థల ఎన్నికలు ముందుగా జరగవచ్చు. అయితే, సుప్రీంకోర్టు తీర్పు, బీసీ రిజర్వేషన్లపై కేంద్రం స్పందన వంటి అంశాలు ఎన్నికల సమీకరణాలను ప్రభావితం చేయనున్నాయి. ప్రభుత్వ వర్గాలు మాత్రం ఇప్పటికే సిద్ధంగా ఉన్నట్టు సంకేతాలు ఇస్తున్నాయి.
ALSO READ: E Challan: మీ బండిని ఫొటో తీశారా లేదా తెలుసుకోవడం ఎలా?