గోషామహల్ బీజేపీ ఎమ్మెల్యే టి రాజాసింగ్ తెలంగాణలో అవినీతి పెరుగుదలపై తీవ్ర ఆగ్రహం వ్యక్తం చేశారు. కొత్త ప్రభుత్వం అధికారంలోకి వచ్చిన తర్వాత రాష్ట్రంలో అవినీతి పరిస్థితి మరింత దిగజారిందని ఆయన ఆరోపించారు. ఈ విషయంలో ఇటీవల అవినీతి నిరోధక శాఖ (ఏసీబీ) చర్యలను ప్రస్తావిస్తూ, పోలీస్ వ్యవస్థలో అవినీతి పట్ల తీవ్ర ఆందోళన వ్యక్తం చేశారు.
హైదరాబాద్లోని పటాన్చెరు పోలీస్ స్టేషన్ ఇన్స్పెక్టర్ ఎల్ బాలు చౌహాన్ రూ.50,000 లంచం తీసుకుంటుండగా ఏసీబీ అధికారుల చేతిలో రెడ్హ్యాండెడ్గా పట్టుబడ్డారు. ఈ సంఘటనను రాజాసింగ్ ప్రస్తావిస్తూ, పోలీస్ వ్యవస్థలో అవినీతిని చూపించే ఉదాహరణగా పేర్కొన్నారు. అదేవిధంగా, షాహినాయత్గంజ్ పోలీస్ స్టేషన్లో విధులు నిర్వహించిన ఇన్స్పెక్టర్, తన పేరును ఎఫ్ఐఆర్ నుండి తొలగించేందుకు ఒక వ్యక్తి నుండి రూ.1.5 లక్షల లంచం డిమాండ్ చేశారని రాజాసింగ్ తెలిపారు. మరో ఘటనలో, జమైకుంట ఇన్స్పెక్టర్ ఓ వ్యక్తి నుండి రూ.3 లక్షలు వసూలు చేసినట్లు ఆరోపణలతో, ఆ లావాదేవీకి సంబంధించిన ఆడియో క్లిప్ ప్రస్తుతం సోషల్ మీడియాలో వైరల్ అవుతోంది.
ఈ విషయాలను బహిర్గతం చేసిన రాజాసింగ్ రాష్ట్ర ప్రభుత్వంపై తీవ్ర విమర్శలు చేశారు. అవినీతి బాధితులను రక్షించేందుకు ప్రభుత్వం తక్షణ చర్యలు తీసుకోవాలని, ముఖ్యంగా అవినీతి పరులను తొలగించడానికి ప్రత్యేక ఉత్తర్వులు (GO) జారీ చేయాలని, ప్రతి పోలీస్ స్టేషన్లో సీసీ కెమెరాలను ఏర్పాటు చేయాలని, లంచం తీసుకున్నవారిపై కఠిన చర్యలు తీసుకోవాలని ఆయన డిమాండ్ చేశారు.
రాజాసింగ్ ముఖ్యమంత్రి రేవంత్ రెడ్డిపై తీవ్ర విమర్శలు చేశారు. ఎన్ని అవినీతి సంఘటనలు జరుగుతున్నా, వాటిని పట్టించుకోకుండా నిస్సహాయంగా వ్యవహరిస్తున్నారని ఆరోపించారు. ఇలాంటి సమస్యలను పరిష్కరించడానికి చర్యలు తీసుకోవడం ప్రభుత్వం బాధ్యతగా భావించాలని ఆయన పేర్కొన్నారు. అవినీతిపై వెంటనే చర్యలు తీసుకోవాలని రాజాసింగ్ పిలుపునిచ్చారు. అవినీతి నిర్మూలన కోసం ప్రభుత్వం చర్యలు చేపట్టకపోతే, ప్రజల్లో మరింత ఆగ్రహం వ్యక్తమవుతుందని స్పష్టం చేశారు.