ప్రేమ పేరుతో మోసం: థాయ్లాండ్ యువతి జీవితం తలకిందులైన కథ
ప్రేమ అనేది రెండు హృదయాల మధ్య ఏర్పడే అపారమైన అనుబంధం. ఈ భావన ప్రాంతాలు, భాషలు, జాతులు అన్నీ దాటి వెళుతుంది. కానీ అదే ప్రేమను కొందరు తమ స్వార్థ ప్రయోజనాల కోసం వాడుకుంటే, అది మానవ జీవితాలను నాశనం చేసే ఆయుధంగా మారుతుంది. ఇటీవలి రోజుల్లో ఇలాంటి ఘటనలు అధికమవుతున్నాయి. ప్రేమ పేరుతో అమాయకుల్ని మోసం చేసే దుర్మార్గుల వల్ల ఎంతోమంది యువతులు మానసికంగా, శారీరకంగా చిద్రమవుతున్నారు.
ఇన్స్టాగ్రామ్ పరిచయం.. మోసం వరకూ ప్రయాణం
థాయ్లాండ్కు చెందిన ఓ యువతి తన విద్య పూర్తి చేసి ఉద్యోగ అన్వేషణలో ఉన్న సమయంలో, ఇన్స్టాగ్రామ్ ద్వారా చెన్నైకి చెందిన ఓ యువకుడికి పరిచయమైంది. ఆ పరిచయం కాస్తా నమ్మకంగా మారి, చివరికి ప్రేమగా మారింది. “నువ్వు చెన్నైకు రా.. మనం కలుసుకుందాం.. నా ప్రపంచాన్ని నీకు చూపిస్తాను” అనే మాటలతో ఆ యువకుడు ఆమెను ఆశల మాయలో నెట్టాడు. దేశం విడిచి, కుటుంబాన్ని వదిలి, పెద్ద ఆశలతో మార్చి 15న ఆమె చెన్నైకి వచ్చింది.
చెన్నైకు వచ్చిన తర్వాత కొన్నాళ్ళు ఇద్దరూ హోటల్లో కలిసి ఉన్నారు. కానీ ఒక్కసారిగా ఆ యువకుడు ఫోన్ స్విచ్ ఆఫ్ చేసి, ఆ అమ్మాయిని వదిలేసి పారిపోయాడు.
హోటల్ బిల్లులూ కట్టకుండా మాయమయ్యాడు. ఆ అమ్మాయి ఆశలన్నీ ఒక్కసారిగా ఛిన్నాభిన్నం అయ్యాయి. తన దేశం కాని దేశంలో, పరిచయాలు లేని నగరంలో ఆ యువతి భయంతో, దిక్కుతోచని స్థితిలో పడిపోయింది.
వేదన, మోసం.. చివరకు వ్యభిచార ముఠాలోకి అడుగుపెట్టు
తన బాధను థాయ్లాండ్లోని స్నేహితురాలితో పంచుకున్నా, అక్కడ నుంచి సహాయం అందలేదు. తీరా ఆ స్నేహితురాలే “హైదరాబాద్ వెళ్లు, అక్కడ కొంత డబ్బు సంపాదించుకుని వెనక్కి రా” అని దుర్మార్గపు సలహా ఇచ్చింది. చేసేది లేక, హోటల్ స్టాఫ్ను బతిమలాడి కొంత డబ్బు తీసుకుని హైదరాబాద్ చేరుకుంది. అక్కడ శ్రీనగర్ కాలనీలోని ఓ వ్యభిచార ముఠాలో చేరింది.పది రోజుల క్రితం జూబ్లీహిల్స్ పోలీసులు అసాంఘిక కార్యకలాపాలపై దాడులు నిర్వహించి, ఆ యువతిని, బెంగాల్కు చెందిన మరో మహిళను, నిర్వాహకురాలిని అదుపులోకి తీసుకున్నారు. విచారణలో ఆ యువతి జరిగిన దుర్మార్గాన్ని వివరిస్తూ కన్నీళ్లు పెట్టుకుంది. ప్రేమనమ్మి వచ్చిన తాను, జీవితాన్ని నాశనం చేసుకున్నానంటూ మౌనంగా విలపించింది.
ప్రేమలో జాగ్రత్తలు.. అమ్మాయిలకు ముఖ్యమైన హెచ్చరిక
ఈ సంఘటన కేవలం ఒక కథ కాదు – మనం గమనించాల్సిన గమనిక. ప్రేమ పేరుతో మోసం చేసే వారు మన చుట్టూ ఉన్నారు. ముఖ్యంగా యువతులు ప్రేమ విషయంలో గరిష్ఠమైన జాగ్రత్తలు తీసుకోవాలి. సోషల్ మీడియాలో పరిచయాలు అనేది పక్కా సమాచారం లేకుండా నమ్మకూడదు. ప్రేమించే ముందు ఆ వ్యక్తి గురించి పూర్తిగా తెలుసుకోవాలి. ఒక్కసారి ఆలోచించకుండా తీసుకున్న నిర్ణయం, జీవితాన్ని చీకటిలోకి నెట్టవచ్చు. అమాయకతను, నమ్మకాన్ని వాడుకునే స్వార్థపరులను గుర్తించటం, వారిని దూరం పెట్టటం అవసరం. ఒక్కోసారి ప్రేమ అనే పదం వెనక దాగి ఉండేది మోసం, ఆకర్షణ, అవసరంగా మారుతుంది. అందుకే ఎవరిని ప్రేమించాలన్నా, ముందు వాళ్ల నిజమైన స్వభావాన్ని తెలుసుకోవాలే కానీ, మాటలకోసం మన హృదయాన్ని తాకట్టుపెట్టకూడదు.
Read also: Justice Priya Darsini: తెలంగాణ హైకోర్టు సిట్టింగ్ జడ్జి గిరిజా ప్రియదర్శిని మృతి