తెలంగాణలో కురుస్తున్న భారీ వర్షాల కారణంగా బొగత జలపాతం (Bogatha Waterfall) ఉప్పొంగుతోంది. ఎగువ ప్రాంతాల నుంచి నీరు భారీగా వచ్చి చేరడంతో, ఈ జలపాతం అందాలు పర్యాటకులను విశేషంగా ఆకట్టుకుంటున్నాయి. దీన్నే తెలంగాణ నయాగరా అని కూడా పిలుస్తుంటారు. ప్రస్తుతం జలపాతం వద్ద నీటి ఉధృతి అధికంగా ఉంది. వర్షాలు పడుతున్న సమయంలో బొగత అందాలు మరింత ఆహ్లాదకరంగా ఉంటాయి. ఇక్కడ పర్యాటకులు ఈత కొలనులో సరదాగా గడపవచ్చు. బొగత జలపాతాన్ని సందర్శించడానికి ఇదే సరైన సమయమని స్థానికులు అంటున్నారు. దీనితో పాటు చుట్టూ ఉన్న దట్టమైన అటవీ ప్రాంతం, పచ్చని ప్రకృతి పర్యాటకులను మంత్రముగ్ధులను చేస్తాయి.
బొగత జలపాతం ఎక్కడ ఉంది?
బొగత జలపాతం ములుగు జిల్లా, వాజేడు మండలం, చీకుపల్లి సమీపంలో ఉంది. ఈ జలపాతం హైదరాబాద్కు 290 కిలోమీటర్ల దూరంలో ఉంది. హైదరాబాద్ నుంచి బొగత చేరుకోవాలంటే వరంగల్ మీదుగా వెళ్లాలి. వరంగల్ నుంచి బొగత జలపాతం 140 కిలోమీటర్ల దూరంలో ఉంది. వరంగల్ నుంచి ఆరేపల్లి, ఆత్మకూరు, ములుగు, పస్రా, తాడ్వాయి, ఏటూరునాగారం మీదుగా వాజేడు చేరుకోవాలి.
బొగతకు ప్రయాణ మార్గాలు
భూపాలపల్లి వైపు నుంచి వచ్చేవారు ఘన్పూర్, ఇంచర్ల మీదుగా ములుగు-వాజేడు రోడ్డుకు చేరుకోవచ్చు. ఈ మార్గంలో ప్రయాణించే పర్యాటకులు ప్రపంచ వారసత్వ సంపదగా గుర్తింపు పొందిన రామప్ప దేవాలయాన్ని కూడా సందర్శించే అవకాశం ఉంది. బొగత జలపాతానికి చేరుకునే మార్గం కూడా పచ్చని ప్రకృతితో నిండి ఉంటుంది, ఇది పర్యాటకులకు మరపురాని అనుభూతిని ఇస్తుంది. బొగత అందాలను చూడటానికి పెద్ద సంఖ్యలో పర్యాటకులు క్యూ కడుతున్నారు.
