తెలంగాణ డిప్యూటీ ముఖ్యమంత్రి మల్లు భట్టి విక్రమార్క మాజీ క్రికెటర్ అజహరుద్దీన్కు మంత్రి పదవి ఇవ్వడంపై వచ్చిన విమర్శలపై ఘాటుగా స్పందించారు. ఆయన వ్యాఖ్యానిస్తూ – “దేశానికి, రాష్ట్రానికి పేరుతెచ్చిన వ్యక్తికి మంత్రి పదవి ఇవ్వాలని చూస్తే వ్యతిరేకించడం సరికాదు” అన్నారు. అజహరుద్దీన్ వంటి అంతర్జాతీయ క్రీడాకారుడు, ప్రజాసేవలో భాగమయ్యే ప్రయత్నం చేయడమే గర్వకారణమని పేర్కొన్నారు. ఇలాంటి నాయకుడికి పదవి ఇవ్వడాన్ని స్వాగతించాల్సింది పోయి, ఎన్నికల సంఘానికి లేఖ రాయడం చాలా దారుణమని ఆయన ఆగ్రహం వ్యక్తం చేశారు. రాష్ట్ర గౌరవం, ప్రజల మనోభావాలను దెబ్బతీసేలా బీజేపీ ప్రవర్తిస్తోందని విమర్శించారు.
భట్టి విక్రమార్క మాట్లాడుతూ .. “అజహరుద్దీన్ దేశానికి సేవ చేసిన వ్యక్తి. ఆయనకు మంత్రి పదవి ఇవ్వడం కాంగ్రెస్ ప్రభుత్వానికి గర్వకారణం. కానీ బీజేపీ నేతలు ఇది సహించలేక రాజకీయ నాటకాలు ఆడుతున్నారు. మైనారిటీ నేతకు పదవి ఇవ్వడాన్ని ఓర్వలేకే లేఖలు రాస్తున్నారు” అని అన్నారు. రాజకీయాల్లో సామాజిక సమానత్వాన్ని ప్రోత్సహించాల్సిన పరిస్థితిలో, మైనారిటీలను లక్ష్యంగా చేసుకుని బీజేపీ అడ్డంకులు సృష్టించడం దేశ ప్రజాస్వామ్య విలువలకు విరుద్ధమని ఆయన అన్నారు. మైనారిటీ అన్న కారణంతో ప్రమాణ స్వీకారాన్ని అడ్డుకోవడం ద్వేషపూరిత రాజకీయమని భట్టి మండిపడ్డారు.
అతను ఇంకా తీవ్రంగా వ్యాఖ్యానిస్తూ, “బీజేపీ, బీఆర్ఎస్ పార్టీలు కలిసి కుట్రలు చేస్తున్నాయి. గత ఎన్నికల్లో బీఆర్ఎస్ పార్టీ బీజేపీకి ఎలా సహకరించిందో రాష్ట్ర ప్రజలు మర్చిపోలేదు” అని అన్నారు. రాబోయే ఉపఎన్నికల్లో ప్రజలు ఈ రెండు పార్టీల నాటకాలకు మోసపోవరని విశ్వాసం వ్యక్తం చేశారు. కాంగ్రెస్ ప్రభుత్వం మైనారిటీ, వెనుకబడిన వర్గాలకు న్యాయం చేసే విధానాన్ని కొనసాగిస్తుందని, అజహరుద్దీన్కు ఇచ్చే అవకాశం కూడా అదే దిశగా తీసుకున్న నిర్ణయమని ఆయన స్పష్టం చేశారు. ఈ వ్యాఖ్యలతో తెలంగాణ రాజకీయాల్లో మైనారిటీ ప్రాతినిధ్యం, ఎన్నికల వ్యూహాలు కొత్త చర్చలకు దారితీశాయి.
Read hindi news: https://hindi.vaartha.com
Epaper : https://epaper.vaartha.com/
