Telangana : తెలంగాణ రాష్ట్ర ఇంటర్మీడియట్ 2024-25 విద్యా సంవత్సరానికి సంబంధించి వార్షిక పరీక్షల ఫలితాలు మంగళవారం నాంపల్లిలోని ఇంటర్ బోర్డు కార్యాలయంలో విడుదలయ్యాయి. ఉప ముఖ్యమంత్రి మల్లు భట్టి విక్రమార్క, మంత్రులు కొమటిరెడ్డి వెంకట్ రెడ్డి, పొన్నం ప్రభాకర్, విద్యాశాఖ కార్యదర్శి యోగితా రాణా, ఇంటర్ బోర్డు కార్యదర్శి కృష్ణ ఆదిత్య తదితరులు ఈ కార్యక్రమంలో పాల్గొన్నారు. ఈసారి కూడా బాలికలే ఉత్తీర్ణత శాతంలో అగ్రస్థానాన్ని సాధించారు. ఇంటర్ మొదటి సంవత్సరంలో 65.96 శాతం, ద్వితీయ సంవత్సరంలో 65.65 శాతం మంది విద్యార్థులు ఉత్తీర్ణత సాధించారు.ఇంటర్ మొదటి సంవత్సరం పరీక్షలు రాసిన 4,88,430 మంది విద్యార్థుల్లో 73.83 శాతం బాలికలు, 57.83 శాతం బాలురు ఉత్తీర్ణత సాధించారు. అలాగే, రెండో సంవత్సరంలో పరీక్షలు రాసిన 5,08,582 మందిలో 74.21 శాతం బాలికలు, 57.31 శాతం బాలురు పాసయ్యారు. మొత్తం 9,97,012 మంది విద్యార్థులు పరీక్షలకు హాజరయ్యారు, వారిలో 6,56,099 మంది విద్యార్థులు ఉత్తీర్ణులయ్యారు. పరీక్షలు మార్చి 5 నుంచి 25 వ తేదీ వరకు రాష్ట్రవ్యాప్తంగా 2060 పరీక్ష కేంద్రాల్లో నిర్వహించబడ్డాయి. వీటి కోసం 29,992 మంది ఇన్విజిలేటర్లను నియమించగా, పత్రాల మూల్యాంకనాన్ని 19 కేంద్రాల్లో 18,518 మంది బోధకులతో చేపట్టారు.
మే 22 నుంచి ఇంటర్ అడ్వాన్స్డ్ సప్లిమెంటరీ పరీక్షలు రెండు సెషన్లలో నిర్వహించనున్నట్లు అధికారులు వెల్లడించారు. రీకౌంటింగ్ కోసం ఒక్కో పేపర్కు రూ.100, రీవెరిఫికేషన్ కోసం రూ.600 చొప్పున చెల్లించి, ఏప్రిల్ 23 నుంచి 30లోగా దరఖాస్తు చేసుకోవాల్సి ఉంటుంది. విద్యార్థుల ఫలితాల కలర్ మెమోలను ఏప్రిల్ 24 బుధవారం నుంచే డౌన్లోడ్ చేసుకునే వీలుందని ఇంటర్ బోర్డు కార్యదర్శి తెలిపారు.ఈ ఫలితాలతో రాష్ట్రంలో బాలికల విద్యా స్థాయికి మరోసారి ముద్రపడింది. బాలికల ప్రదర్శన పురోగమన భారత దిశగా అడుగులు వేస్తున్నదని చెప్పాలి. ప్రభుత్వం ఈ ఉత్తీర్ణులందరినీ అభినందించింది
Read More : MLC Elections : ఈరోజే పోలింగ్
