ప్రపంచంలోనే తొలి ఏఐ హాస్పిటల్ చైనాలో ప్రారంభం
కృత్రిమ మేధ ఆధారంగా ప్రపంచంలోనే తొలి పూర్తి ఏఐ హాస్పిటల్కి చైనా వేదికైంది. వైద్యరంగంలో విప్లవాత్మకమైన అడుగు వేసిన చైనా, ఈ ఏఐ హాస్పిటల్ను ఏజెంట్ హాస్పిటల్ అనే పేరుతో ఇటీవలే అధికారికంగా ప్రారంభించింది. ఈ ఆస్పత్రిని చైనాలోని ప్రఖ్యాత సింఘువా యూనివర్సిటీ కి చెందిన పరిశోధకులు అభివృద్ధి చేశారు. డాక్టర్లు, నర్సులు, సహాయక సిబ్బంది – అన్నీ వర్చువల్ ఆకృతుల్లో ఉండే ఈ హాస్పిటల్లో రోగులకు సేవలు అందించనున్నారు.
చాట్జీపీటీ 3.5 టెక్నాలజీ ఆధారంగా ట్రీట్మెంట్
చాట్జీపీటీ 3.5 టెక్నాలజీని ఉపయోగించుకుని.. ఏఐ రోబోలు ఈ ఏఐ హాస్పిటల్లో డాక్టర్ల పనిని నిర్వర్తిస్తున్నాయి. ఈ ఏఐ హాస్పిటల్లో ఎమర్జెన్సీ ట్రీట్మెంట్, శ్వాసకోశ వ్యాధులు, పిల్లల వైద్యం, కార్డియాలజీ సహా మొత్తంగా 21 విభాగాల్లో సేవలు అందించనున్నారు. ఇక ట్రీట్మెంట్లో వేగం, కచ్చితత్వం ఈ ఏఐ డాక్టర్ల స్పెషాలిటీ. అయితే ఈ ఏడాది చివరి నాటికి ఈ ఏఐ హాస్పిటల్ ప్రజలకు అందుబాటులోకి వచ్చే అవకాశం ఉందని మీడియా కథనాలు వెల్లడిస్తున్నాయి. సాంప్రదాయ మానవ డాక్టర్లు అందించే చికిత్సల కచ్చితత్వం 82–85 శాతం వరకు ఉండగా, ఈ ఏఐ డాక్టర్లు 93 శాతం కచ్చితత్వంతో ట్రీట్మెంట్ చేయగలవని పరిశోధకులు చెబుతున్నారు.
ఇంకా ఆశ్చర్యకరమైన విషయం ఏమిటంటే, కేవలం కొన్ని రోజుల్లోనే ఈ ఏఐ హాస్పిటల్ దాదాపు 10,000 మందికి వైద్య సేవలు అందించగలదు. అదే పని సాధారణ డాక్టర్లు చేయాలంటే కనీసం 2 సంవత్సరాల సమయం పడుతుందని శాస్త్రవేత్తలు అంచనా వేస్తున్నారు. ఇది మెడికల్ రంగంలో ఎలాంటి పరిణామం అని ఊహించుకోవడమే కష్టం!
భవిష్యత్ వైద్యంలో ఏఐ పాత్ర – అవకాశాలన్నీ కొత్తే!
ఈ ఏఐ హాస్పిటల్ విజయవంతమైతే, ప్రపంచవ్యాప్తంగా అభివృద్ధి చెందిన దేశాల్లో ఇలాంటి వర్చువల్ హాస్పిటల్స్ స్థాపించబడే అవకాశం ఉందని నిపుణులు చెబుతున్నారు. ఇప్పటికే మెడికల్ రంగంలో డేటా ఆధారిత నిర్ణయాలు, డయాగ్నోస్టిక్ ఏఐ టూల్స్ ఉపయోగంలో ఉన్నా, ఇది పూర్తిగా వర్చువల్ హాస్పిటల్ స్థాయి అంటే అది గణనీయమైన ముందడుగు.
ఇదిలా ఉండగా, సామాజిక మాధ్యమాల్లో నెటిజన్లు కొత్త ప్రశ్నలు వేస్తున్నారు – “ఏఐ డాక్టర్లు మరింత అభివృద్ధి చెందిన తర్వాత మానవ డాక్టర్ల అవసరం ఏంటీ?”, “అయితే వైద్య విద్యాభ్యాసం అవసరమా?” వంటి డిబేట్లు తెరపైకి వస్తున్నాయి.
అయితే పరిశోధకులు చెబుతున్న మాట ఏమిటంటే, ఏఐ వైద్యులు మానవ డాక్టర్లను పూర్తిగా భర్తీ చేయలేరు కానీ, వారి పనిని త్వరగా, కచ్చితంగా పూర్తి చేయడంలో తోడ్పడతారు. ముఖ్యంగా గ్రామీణ ప్రాంతాల్లో వైద్య సదుపాయాలు అందుబాటులో లేకపోయినప్పుడు, ఈ తరహా ఏఐ హాస్పిటల్స్ గొప్ప మార్గదర్శకాలు కావొచ్చు.
Read also: India Pakistan War: నరమేధానికి ప్రతీకారమే.. ఆపరేషన్ సింధూర్ మిషన్