Rahul Dravid: భారత క్రికెట్ చరిత్రలో “ది వాల్”గా(The Wall) ప్రసిద్ధి చెందిన రాహుల్ ద్రవిడ్, తన కెరీర్కు సంబంధించిన ఓ ఆసక్తికర సంఘటనను తాజాగా పంచుకున్నాడు. తన జీవితంలో చేసిన ఒక పెద్ద తప్పు సచిన్ టెండూల్కర్ సలహా విన్నదే అని, ఆ నిర్ణయాన్ని ఇప్పటికీ పశ్చాత్తాపంతో గుర్తుచేసుకుంటున్నానని వెల్లడించాడు. మాజీ స్పిన్నర్ రవిచంద్రన్ అశ్విన్తో మాట్లాడుతూ ద్రవిడ్ ఈ ఘటనను వివరించాడు. 2011లో భారత్ ఇంగ్లాండ్ పర్యటనలో భాగంగా ఎడ్జ్బాస్టన్ వేదికగా జరిగిన టెస్టులో ఈ సంఘటన చోటుచేసుకుంది. జేమ్స్ అండర్సన్ బౌలింగ్లో ద్రవిడ్ ఆడుతుండగా అంపైర్ సైమన్ టఫెల్ అతడిని క్యాచ్ ఔట్గా ప్రకటించారు. కానీ బంతి తన బ్యాట్ను తాకలేదని ద్రవిడ్కు నమ్మకం. “డ్రైవ్ చేసినప్పుడు శబ్దం వినిపించింది కానీ నా బ్యాట్కు తగిలిన ఫీలింగ్ రాలేదు” అని ఆయన గుర్తుచేసుకున్నాడు.
ఇంతకీ ఎం జరిగిందంటే?
ఆటమైదానంలో అంపైర్ నిర్ణయంపై అనుమానంతో ద్రవిడ్, నాన్-స్ట్రైకర్ ఎండ్లో ఉన్న సచిన్ టెండూల్కర్(Sachin Tendulkar) వద్దకు వెళ్లి చర్చించాడు. ద్రవిడ్ బంతి బ్యాట్ను తాకలేదని చెప్పినా, “శబ్దం చాలా గట్టిగా వచ్చింది, నువ్వు బాదావ్ అనిపించింది” అని సచిన్ అన్నాడట. దాంతో ద్రవిడ్ తన భావన తప్పు అనుకుని రివ్యూ అడగకుండానే పావిలియన్కి వెళ్లిపోయాడు. డ్రెస్సింగ్ రూమ్లో రీప్లే చూసిన తర్వాత ద్రవిడ్కు అసలు నిజం తెలిసింది. బంతి బ్యాట్ను తాకలేదని, బ్యాట్ షూలేస్ను తాకడంతో ఆ శబ్దం వచ్చిందని రుజువైంది. అప్పట్లో అంపైర్ సైమన్ టఫెల్ లాంటి దిగ్గజ నిర్ణయాన్ని సవాలు చేయడం అంత సులభం కాదని ద్రవిడ్ పేర్కొన్నాడు. ఆ సిరీస్ను భారత్ 4-0 తేడాతో కోల్పోయినా, ద్రవిడ్ మాత్రం నాలుగు టెస్టుల్లో మూడు సెంచరీలు సాధించి 461 పరుగులు చేసి జట్టులో అత్యధిక స్కోరర్గా నిలిచాడు.
రాహుల్ ద్రవిడ్ తన కెరీర్లో పెద్ద తప్పుగా ఏది గుర్తించారు?
సచిన్ టెండూల్కర్ సలహా విని, రివ్యూ తీసుకోకుండా అవుట్గా మైదానం విడిచిపెట్టడమేనని ద్రవిడ్ పేర్కొన్నారు.
అసలు ఏమి జరిగింది?
అంపైర్ ద్రవిడ్ను క్యాచ్ ఔట్గా ప్రకటించగా, బంతి బ్యాట్కు తగలలేదని ఆయనకు నమ్మకం. కానీ సచిన్ సలహా మేరకు రివ్యూ తీసుకోకుండా పెవిలియన్కు వెళ్లిపోయారు.
READ HINDI NEWS : hindi.vaartha.com
READ ALSO :