2025 ఐసీసీ ఛాంపియన్స్ ట్రోఫీ పాకిస్తాన్ క్రికెట్ బోర్డుకు (PCB) తీవ్రమైన ఆర్థిక నష్టాన్ని మిగిల్చింది. దాదాపు 29 సంవత్సరాల తర్వాత పాకిస్తాన్ అంతర్జాతీయ ICC టోర్నమెంట్కు ఆతిథ్యం ఇచ్చినా, ఆర్థికంగా ఇది PCBకి భారీ దెబ్బగా మారింది. తాజా నివేదికల ప్రకారం, పాకిస్తాన్ ఈ టోర్నమెంట్ నిర్వహణ వల్ల రూ. 7,445 కోట్ల నష్టం చవిచూసింది. ఈ భారీ నష్టానికి ప్రధాన కారణాలు భారత జట్టు పాకిస్తాన్లో ఆడకపోవడం, వర్షం ప్రభావం, ప్రసార హక్కుల ఆదాయం తగ్గిపోవడం, అత్యధిక నిర్వహణ ఖర్చులు అని విశ్లేషకులు చెబుతున్నారు.
ఐసీసీ ఛాంపియన్స్ ట్రోఫీకి భారత్, ఆస్ట్రేలియా, ఇంగ్లాండ్, పాకిస్తాన్, దక్షిణాఫ్రికా, న్యూజిలాండ్, శ్రీలంక, బంగ్లాదేశ్ జట్లు అర్హత సాధించాయి. కానీ, భారత జట్టు పాకిస్తాన్కు వెళ్లి ఆడేందుకు నిరాకరించడం PCBకు భారీ నష్టాన్ని మిగిల్చింది. చివరకు, రెండు బోర్డులు హైబ్రిడ్ మోడల్ను అమలు చేయాల్సి వచ్చింది. అంటే, 15 మ్యాచ్ల్లో 5 మ్యాచ్లు పాకిస్తాన్లో కాకుండా న్యూట్రల్ వేదికకు మార్చబడ్డాయి. ముఖ్యంగా, భారత్, పాకిస్తాన్ మ్యాచ్లు దేశీయంగా భారీ ఆదాయాన్ని తెచ్చిపెట్టే అవకాశముండగా, అవి న్యూట్రల్ వేదికలో జరగడంతో టిక్కెట్ల విక్రయాలు భారీగా పడిపోయాయి.
అనేక మ్యాచ్లు వర్షం కారణంగా రద్దు
పాకిస్తాన్లో ఈవెంట్ కోసం ప్రత్యేకంగా మూడుచోట్ల స్టేడియాలను పునరుద్ధరించగా, టోర్నమెంట్ సమయంలో వర్షం ప్రభావం తీవ్రంగా కనిపించింది. పాకిస్తాన్లో జరగాల్సిన 10 మ్యాచ్ల్లో అనేక మ్యాచ్లు వర్షం కారణంగా రద్దయ్యాయి. ముఖ్యంగా, పూర్తిగా రద్దైన కీలక మ్యాచ్ల కారణంగా ప్రసార హక్కుల ద్వారా వచ్చే ఆదాయంలో భారీ కోత పడింది. ప్రేక్షకులు తక్కువగా హాజరయ్యారు, టిక్కెట్ల విక్రయం ఆశించిన స్థాయికి చేరుకోలేదు. 2025 ఛాంపియన్స్ ట్రోఫీని విజయవంతంగా నిర్వహించేందుకు PCB మూడింటికి పైగా ప్రధాన స్టేడియాలను పునరుద్ధరించింది. అయితే, ఈ పనులకు ఖర్చు ఊహించిన దానికంటే 50% ఎక్కువ అయింది. స్టేడియాల పునరుద్ధరణ ఖర్చు – PKR 18 బిలియన్లు (రూ. 4,823 కోట్లు) టోర్నమెంట్ నిర్వహణ కోసం ఖర్చు – $40 మిలియన్ (రూ. 3,320 కోట్లు) ఈ ఖర్చులన్నీ తిరిగి రావడం మాత్రం లేదు. టోర్నమెంట్ ద్వారా వచ్చిన మొత్తం ఆదాయం కేవలం రూ. 498 కోట్లు మాత్రమే, అంటే PCBకి రూ. 7,445 కోట్ల నష్టం జరిగింది. కేవలం ఆర్థికంగా కాకుండా క్రికెట్ పరంగా కూడా ఛాంపియన్స్ ట్రోఫీ పాకిస్తాన్కు చేదు అనుభవాన్ని మిగిల్చింది. పాకిస్తాన్ జట్టు గ్రూప్ దశలోనే నిష్క్రమించడంతో దేశీయంగా ఈవెంట్పై ఆసక్తి తగ్గిపోయింది. దేశవాళీ ప్రేక్షకుల సంఖ్య కూడా తగ్గిపోవడంతో PCB ప్రసార హక్కుల ద్వారా లభించే ఆదాయంలో కోతపడింది. ఈ భారీ నష్టం PCB భవిష్యత్తు ప్రణాళికలపై తీవ్ర ప్రభావాన్ని చూపనుంది. IPL లాంటి లీగ్లతో పోలిస్తే PSL ఆదాయ వృద్ధి తక్కువగానే ఉంది. ఇప్పటికే PCB ఆర్థిక ఒత్తిడిలో ఉండగా, ఛాంపియన్స్ ట్రోఫీ నష్టాలు మరింత ఇబ్బందిగా మారాయి. ఇకపై PCB తమ ఆర్థిక పరిస్థితిని నిలబెట్టుకోవడానికి కొత్త ఆదాయ మార్గాలను అన్వేషించాల్సిన అవసరం ఉంది.