Bangladesh : వన్డే వరల్డ్ కప్ క్వాలిఫయింగ్లో హ్యాట్రిక్ విజయం
మహిళల వన్డే ప్రపంచ కప్ క్వాలిఫయింగ్ టోర్నమెంట్లో బంగ్లాదేశ్ జట్టు అద్భుత ప్రదర్శనతో హ్యాట్రిక్ విజయాన్ని నమోదు చేసింది. లాహోర్ వేదికగా స్కాట్లాండ్తో జరిగిన మ్యాచ్లో బంగ్లాదేశ్ జట్టు 34 పరుగుల తేడాతో విజయాన్ని సొంతం చేసుకుంది. మొదట బ్యాటింగ్ చేసిన బంగ్లాదేశ్ 50 ఓవర్లలో 6 వికెట్లు కోల్పోయి 276 పరుగులు చేసింది.కెప్టెన్ నిగార్ సుల్తానా ఈ మ్యాచ్లో అద్భుతంగా రాణించి ప్లేయర్ ఆఫ్ ది మ్యాచ్గా నిలిచింది. ఆమె 59 బంతుల్లో 83 పరుగులు చేయడంతో పాటు 11 ఫోర్లు బాదింది. ఆమెతో పాటు ఫదానా 57 పరుగులు చేశాడు. షర్మిన్ అక్థర్ కూడా 57 పరుగులతో హాఫ్ సెంచరీలు చేయడంతో బంగ్లాదేశ్ భారీ స్కోరు నమోదు చేయగలిగింది. స్కాట్లాండ్ బౌలర్లలో క్యాథరిన్ ప్రెస్ 2 వికెట్లు తీశారు.
ఇక 277 పరుగుల లక్ష్యంతో బరిలోకి దిగిన స్కాట్లాండ్ మహిళల జట్టు మాత్రం చివరి వరకు పోరాడినా విజయం అందుకోలేకపోయింది. నిర్ణీత 50 ఓవర్లలో 9 వికెట్లు కోల్పోయిన స్కాట్లాండ్ 242 పరుగులకే పరిమితమైంది. స్కాట్లాండ్ బ్యాటర్లలో ప్రియవాజ్ 63 బంతుల్లో 61 పరుగులు చేశాడు. రాచెల్ 73 బంతుల్లో 61 పరుగులతో మెరిశారు. అయితే మరొకరు అంతగా ప్రభావం చూపలేకపోయారు. బంగ్లాదేశ్ బౌలర్లలో సదా 4 వికెట్లు తీయగా, జన్నతుల్ 2 వికెట్లు తీసి విజయంలో కీలక పాత్ర పోషించారు. ఈ విజయంతో బంగ్లాదేశ్ మూడు మ్యాచుల్లో మూడు విజయాలు నమోదు చేసి అజేయంగా నిలిచింది. వరుసగా ఈ విజయాలతో బంగ్లా మహిళల జట్టు వరల్డ్ కప్ టికెట్కు మరింత సమీపంగా వచ్చింది.
Read More : PSL 2025: రెండో ఓటమిపై స్పందించిన రిజ్వాన్
