తెలంగాణ రాష్ట్రంలో విద్యా రంగంలో నెలకొన్న తీవ్ర సమస్యలను పరిష్కరించాలని, ప్రైవేట్ విద్యాసంస్థల ఫీజుల దోపిడీని అరికట్టాలని వామపక్ష విద్యార్థి సంఘాలు (Student Unions) డిమాండ్ చేశాయి. ఈ నెల జూలై 23న రాష్ట్రవ్యాప్తంగా పాఠశాలలు, జూనియర్ కళాశాలల బంద్ నిర్వహించాలని విద్యార్థి సంఘాలు పిలుపునిచ్చాయి. హిమాయత్నగర్లో జరిగిన సమావేశంలో ఈ బంద్ పోస్టర్ను ఆవిష్కరించిన వారు, తెలంగాణ విద్యా వ్యవస్థలో ప్రభుత్వం నిర్లక్ష్యం చేస్తున్న అంశాలను హైలైట్ చేయాలనే లక్ష్యంతో ఈ ఉద్యమాన్ని చేపట్టినట్టు తెలిపారు.
ఫీజుల నియంత్రణ చట్టం, ఖాళీ పోస్టుల భర్తీ ప్రధాన డిమాండ్లు
విద్యార్థి సంఘాలు ప్రభుత్వానికి ముఖ్యమైన డిమాండ్లను ముందుంచాయి. వాటిలో ప్రైవేట్, కార్పొరేట్ విద్యాసంస్థలపై ఫీజుల నియంత్రణ చట్టం, ఖాళీగా ఉన్న టీచర్, ఎంఈఓ, డీఈఓ పోస్టుల భర్తీ, విద్యాశాఖకు ప్రత్యేక మంత్రిని నియమించడం, ఇంటర్మీడియట్ కళాశాలలకు మధ్యాహ్న భోజన పథకాన్ని విస్తరించడం, వాయిదా పడ్డ స్కాలర్షిప్ల విడుదల వంటి అంశాలు ఉన్నాయి. పేద, మధ్యతరగతి విద్యార్థులకు నష్టమయ్యే విధంగా ఫీజులు పెంచడం వల్ల విద్యా అవకాశాలు దూరమవుతున్నాయని విద్యార్థి నాయకులు ఆవేదన వ్యక్తం చేశారు.
మౌలిక వసతుల కల్పన, ఉచిత బస్ పాస్ పునరుద్ధరణకు డిమాండ్
అనేక ప్రభుత్వ పాఠశాలలు, కళాశాలల్లో తరగతి గదులు, ప్రయోగశాలలు, గ్రంథాలయాలు, మరుగుదొడ్లు, తాగునీరు వంటి కనీస మౌలిక వసతులు లేనందున విద్యార్థులు తీవ్రంగా ఇబ్బంది పడుతున్నారని సంఘాలు పేర్కొన్నాయి. ప్రభుత్వం తగిన నిధులు కేటాయించి వీటిని మెరుగుపర్చాలని డిమాండ్ చేశారు. అలాగే విద్యార్థుల రాకపోకల కోసం RTC బస్సుల్లో ఉచిత బస్ పాస్లను తిరిగి ప్రవేశపెట్టాలని, NEP 2020ను అమలు చేయకూడదని అసెంబ్లీలో తీర్మానం చేయాలని వారు కోరుతున్నారు. ఈ బంద్ ద్వారా విద్యా రంగంలోని సమస్యలపై ప్రజలు, ప్రభుత్వం దృష్టి పెట్టాలని వామపక్ష విద్యార్థి సంఘాలు స్పష్టంగా పేర్కొన్నాయి.
Read Also : Vaddiraju Ravichandra : మాయమాటలతో కాంగ్రెస్ అధికారం – ఎంపీ వద్దిరాజు
