ఓట్స్ పేరు వినగానే, చాలామందికి ఆరోగ్యమే గుర్తొస్తుంది. బరువు తగ్గించుకోవడం, డయాబెటిస్ నియంత్రణ, గుండె ఆరోగ్యం మెరుగుపరచడం వంటి ప్రయోజనాల కోసం ఈ ఆహార పదార్థాన్ని విస్తృతంగా ఉపయోగిస్తున్నారు. ముఖ్యంగా ఆధునిక జీవనశైలిలో ఉన్న యువత మరియు హెల్త్ కాన్షస్ జనాలు దీన్ని రోజువారీ ఆహారంగా స్వీకరిస్తున్నారు. అయితే, ఏ ఆహారం అయినా సరే, మితిమేరకే మంచిది అన్న సూత్రం ఓట్స్ విషయంలో కూడా వర్తించదగినదే. ఓట్స్ లో ఉండే పోషకాలు మనకు ఎంత మంచో అలాగే మితిమీరి తీసుకుంటే కలిగే నష్టాలు కూడా అనేకంగా ఉంటాయి.
ఓట్స్లో ఉండే ముఖ్య పోషకాలు
ఫైబర్ (పీచు పదార్థం) – జీర్ణ వ్యవస్థకు మేలు చేస్తుంది
కాంప్లెక్స్ కార్బోహైడ్రేట్స్ – శక్తిని నెమ్మదిగా విడుదల చేస్తాయి
విటమిన్లు – ముఖ్యంగా B గ్రూప్ విటమిన్లు, ముఖ్యంగా B2
ఖనిజాలు – మెగ్నీషియం, ఫాస్ఫరస్, జింక్, ఐరన్
యాంటీఆక్సిడెంట్లు – శరీరంలో ఉత్పన్నమయ్యే ఫ్రీ రాడికల్స్ నుండి రక్షణ ఇస్తాయి.
ఇన్ని లాభాలు ఉన్నా కూడా, ఓట్స్ను మితిమీరిన మొత్తంలో తీసుకుంటే తలెత్తే ఆరోగ్య సమస్యలు ఏమిటో ఇప్పుడు పరిశీలిద్దాం.
మితిమీరిన ఓట్స్ వినియోగం వల్ల కలిగే సమస్యలు
జీర్ణ సంబంధిత సమస్యలు
ఓట్స్ లో పీచు పదార్థం అధికంగా ఉండటం వల్ల, కడుపు ఉబ్బరం, గ్యాస్, శుల్లులు వంటి సమస్యలు వస్తాయి. ఫైబర్ శరీరానికి మేలు చేస్తేనేగానీ, ఒక్కసారిగా అధిక మొత్తంలో తీసుకుంటే జీర్ణశక్తిపై ఒత్తిడిగా మారుతుంది.
ఫైటిక్ యాసిడ్ ప్రభావం
ఓట్స్ లో “ఫైటిక్ యాసిడ్” అనే యాసిడ్ ఉంటుంది. ఇది శరీరంలో క్యాల్షియం, ఐరన్, జింక్ లాంటి ఖనిజాల శోషణను అడ్డుకుంటుంది. దీర్ఘకాలంగా ఓట్స్ అధికంగా తీసుకుంటే ఖనిజ లోపాలు తలెత్తే అవకాశం ఉంటుంది.
మలబద్ధకం
ఓట్స్ తిన్న తర్వాత తగినంత నీటిని తీసుకోకపోతే, అధిక ఫైబర్ కారణంగా మలబద్ధకం సమస్య తలెత్తుతుంది. ఇది ముఖ్యంగా వయోవృద్ధులకు గణనీయమైన ఇబ్బందిగా మారవచ్చు.
ఆహార అలెర్జీలు
కొందరికి ఓట్స్ లోని ప్రోటీన్ (avenin) పట్ల అలెర్జీ ఉంటుంది. ఇది చర్మం మీద దద్దుర్లు, శ్వాసకోశ సమస్యలు, అలెర్జిక్ రియాక్షన్లకు దారితీయవచ్చు. ఓట్స్ తయారీ మరియు నిల్వ ప్రక్రియ సరైన పరిశుభ్రత లోపించితే, బ్యాక్టీరియా వృద్ధి అయ్యే అవకాశం ఉంటుంది. ఇది ఆహార విషబాధకు దారితీయవచ్చు.
బరువు పెరగడం
చాలామంది ప్రతిరోజు ఉదయం బ్రేక్ఫాస్ట్గా ఓట్స్ మాత్రమే తింటారు. ఇది సరైన ఆహారపు అలవాటు కాదు. మన శరీరానికి అన్ని రకాల పోషకాలు అవసరం. కేవలం ఓట్స్ మాత్రమే తీసుకోవడం వల్ల ఇతర ముఖ్యమైన పోషకాల లోపం ఏర్పడుతుంది. కాబట్టి, మీ ఆహారంలో వివిధ రకాల పోషకాలు ఉండేలా చూసుకోవడం చాలా ముఖ్యం. ఓట్స్ ను ఒక భాగంగా మాత్రమే పరిగణించాలి, ప్రధాన ఆహారంగా కాదు. ఓట్స్ తక్కువ కేలరీలతో ఉంటాయని భావించి అధికంగా తీసుకుంటే, శరీరానికి అనవసరమైన కేలరీలు అందడం వల్ల బరువు పెరిగే అవకాశం ఉంటుంది. ముఖ్యంగా రుచికి చక్కెర, తీపి పదార్థాలు కలిపితే ఈ సమస్య మరింత తీవ్రమవుతుంది. ఏ ఆహారం అయినా సమతుల్యంగా, మితంగా తీసుకుంటేనే ఆరోగ్యాన్ని కాపాడుకోవచ్చు. ఓట్స్ ను సరైన విధంగా, పరిమితంగా ఉపయోగిస్తే ఆరోగ్య ప్రయోజనాలన్నీ పొందవచ్చు.
Read also: Health: పొట్ట తగ్గించుకునే మార్గాలు ఇవే
