భారతదేశంలోని బ్యాంకు ఉద్యోగులకు వారానికి ఐదు రోజులు మాత్రమే పని దినాలు ఉండాలని, శనివారాన్ని పూర్తిస్థాయి సెలవు దినంగా ప్రకటించాలని ఆల్ ఇండియా బ్యాంక్ ఆఫీసర్స్ కాన్ఫెడరేషన్ (AIBOC) బలంగా డిమాండ్ చేస్తోంది. ప్రస్తుతం ప్రపంచవ్యాప్తంగా అనేక దేశాలు వారానికి కేవలం నాలుగు రోజుల పని విధానం (4-Day Work Week) వైపు అడుగులు వేస్తుంటే, మన దేశంలో బ్యాంకు ఉద్యోగులు విరామం లేకుండా పనిచేయాల్సి వస్తోందని సంఘం నేతలు ఆవేదన వ్యక్తం చేస్తున్నారు. ఇప్పటికే ఇండియన్ బ్యాంక్స్ అసోసియేషన్ (IBA) ఈ ప్రతిపాదనకు సూత్రప్రాయంగా అంగీకరించినప్పటికీ, కేంద్ర ప్రభుత్వం నుంచి తుది ఆమోదం లభించకపోవడంతో ఈ ప్రక్రియ నిలిచిపోయింది.
బ్యాంకింగ్ రంగంలో పెరుగుతున్న డిజిటలైజేషన్ వల్ల ఉద్యోగులపై పని భారం భారీగా పెరిగిందని నిపుణులు విశ్లేషిస్తున్నారు. నగదు లావాదేవీలకే పరిమితం కాకుండా, ప్రభుత్వ పథకాల అమలు, ఇన్సూరెన్స్, లోన్ల రికవరీ వంటి అనేక పనుల వల్ల ఉద్యోగులు శారీరకంగా, మానసిక ఒత్తిడికి లోనవుతున్నారు. ఐదు రోజుల పని విధానం వల్ల ఉద్యోగులకు తగినంత విశ్రాంతి దొరుకుతుందని, తద్వారా వారు విధుల్లో మరింత సమర్థవంతంగా పనిచేయగలరని ఉద్యోగ సంఘాలు వాదిస్తున్నాయి. ఈ క్రమంలో సోషల్ మీడియా ప్లాట్ఫారమ్ ‘X’ (గతంలో ట్విట్టర్) లో #5DayBankingNow అనే హ్యాష్ట్యాగ్ జాతీయ స్థాయిలో ట్రెండ్ అవుతోంది, దీనికి వేలాది మంది ఉద్యోగులు, వారి కుటుంబ సభ్యులు మద్దతు తెలుపుతున్నారు.
Nizamabad Crime: అప్పు ఎగ్గొట్టేందుకు మాస్టర్ ప్లాన్.. అసలేం జరిగింది?
అయితే, ఐదు రోజుల పని విధానం వల్ల ఖాతాదారులకు, ముఖ్యంగా వ్యాపార వర్గాలకు ఇబ్బందులు కలగవచ్చని ప్రభుత్వం కొంత సంశయిస్తోంది. కానీ, ప్రస్తుతం అందుబాటులో ఉన్న నెట్ బ్యాంకింగ్, మొబైల్ బ్యాంకింగ్ మరియు ఏటీఎం సేవల వల్ల ఫిజికల్ బ్యాంకింగ్పై ఆధారపడటం గణనీయంగా తగ్గిందని యూనియన్లు గుర్తు చేస్తున్నాయి. శనివారం సెలవు ఇచ్చినప్పటికీ, మిగిలిన ఐదు పని దినాలలో పని వేళలను రోజుకు 40 నుంచి 50 నిమిషాల వరకు పెంచడానికి కూడా తాము సిద్ధమని ఉద్యోగులు ప్రతిపాదిస్తున్నారు. ప్రభుత్వం ఈ డిమాండ్పై సానుకూలంగా స్పందించి, త్వరలోనే అధికారిక ఉత్తర్వులు జారీ చేయాలని బ్యాంకింగ్ వర్గాలు ఆశిస్తున్నాయి.