కేంద్ర మంత్రి ఎస్. జైశంకర్ (Union Minister S. Jaishankar) ఒక ముఖ్యమైన ప్రకటన చేశారు. ఏప్రిల్ 22 నుంచి జూన్ 17 మధ్య ప్రధానమంత్రి నరేంద్ర మోదీ (Narendra Modi), అమెరికా అధ్యక్షుడు డొనాల్డ్ ట్రంప్ల మధ్య ఎలాంటి ఫోన్ సంభాషణ జరగలేదని ఆయన తెలిపారు.లోక్సభలో జరిగిన చర్చలో జైశంకర్ మాట్లాడుతూ ఆపరేషన్ సిందూర్ ద్వారా పాకిస్థాన్కు గట్టి సమాధానం ఇచ్చామని అన్నారు. ఉగ్రవాదాన్ని ఇక భరించబోమని ప్రపంచమంతా స్పష్టంగా ప్రకటించిందని ఆయన గుర్తుచేశారు.భారత్–పాకిస్థాన్ మధ్య కాల్పుల విరమణలో ట్రంప్ ప్రమేయం లేదని జైశంకర్ స్పష్టం చేశారు. పాకిస్థాన్లోని బహావల్పూర్, మురిద్కేలో ఉన్న ఉగ్ర స్థావరాలపై దాడి చేస్తామని ఎవరూ ఊహించలేదని అన్నారు. పాక్ ప్రతిస్పందనను సమర్థంగా ఎదుర్కొన్న తర్వాతే కాల్పులు నిలిపివేసే అంశంపై చర్చ జరిగిందని చెప్పారు.
అమెరికా టీఆర్ఎఫ్ను ఉగ్ర సంస్థగా గుర్తింపు
పహల్గామ్ ఉగ్రదాడికి కారణమైన టీఆర్ఎఫ్ను అమెరికా ఉగ్రవాద సంస్థగా ప్రకటించిందని జైశంకర్ తెలిపారు. ఈ దాడిని ఐక్యరాజ్యసమితి భద్రతామండలి, క్వాడ్, బ్రిక్స్ సహా అనేక దేశాలు ఖండించాయని చెప్పారు. ఐరాసలో 193 దేశాల్లో కేవలం మూడు దేశాలే పాకిస్థాన్కు మద్దతు ఇచ్చాయని వెల్లడించారు.
చైనా–పాక్ సంబంధాలపై వ్యాఖ్యలు
పాకిస్థాన్, చైనాల మధ్య సహకారం ఆరు దశాబ్దాలుగా కొనసాగుతోందని ఆయన తెలిపారు. చైనాతో వ్యవహరించే తీరు గురించి ప్రతిపక్షాలు ఉపన్యాసాలు ఇవ్వడం హాస్యాస్పదమని అన్నారు. తాము చైనాకు వెళ్లింది తీవ్రవాద వ్యతిరేక పోరాటం, వాణిజ్య ఒప్పందాల కోసం మాత్రమేనని ఆయన స్పష్టం చేశారు.
ప్రతిపక్షాలపై ఎద్దేవా
ఒలింపిక్స్ కోసం లేదా రహస్య ఒప్పందాల కోసం చైనాకు వెళ్లలేదని ఆయన ఎద్దేవా చేశారు. ప్రతిపక్షాల విమర్శలు వాస్తవానికి విరుద్ధమని జైశంకర్ తేల్చి చెప్పారు.ఈ వ్యాఖ్యలు లోక్సభలో తీవ్ర చర్చకు దారితీశాయి. జైశంకర్ చేసిన ప్రకటనలు భారత్–అమెరికా సంబంధాలపై ఉన్న అపోహలను తొలగించాయి.
Read Also : Kinetic DX : తాజాగా డీఎక్స్ మోడల్ తో రీఎంట్రీ ఎలక్ట్రిక్ స్కూటర్