కోడిగుడ్డు అంటే సాధారణంగా తెలుపు లేదా లేత గోధుమ రంగు గుర్తుకువస్తుంది. కానీ కర్ణాటకలోని దావణగెరె జిల్లా (Davanagere district of Karnataka) చన్నగిరి తాలూకా నెల్లూరు గ్రామంలో ఓ కోడి నీలం రంగు గుడ్డు (Blue egg) పెట్టి అందరినీ ఆశ్చర్యపరిచింది. ఈ అరుదైన ఘటన ప్రస్తుతం చర్చనీయాంశంగా మారింది.గ్రామానికి చెందిన రైతు సయ్యద్ నూర్ రెండు సంవత్సరాల క్రితం రూ.20కి ఓ కోడిని కొనుగోలు చేశారు. అప్పటి నుంచి ఆ కోడి ప్రతిరోజూ తెల్లగుడ్లు మాత్రమే పెట్టేది. అయితే, ఇటీవల అది ఒక్కసారిగా నీలం రంగులో గుడ్డు పెట్టింది. ఈ అనూహ్య ఘటనతో నూర్ ఆశ్చర్యపోయి, ఆ గుడ్డును ప్రత్యేకంగా భద్రపరిచారు.ఈ వార్త ఊరంతా వ్యాపించడంతో చుట్టుపక్కల ప్రాంతాల ప్రజలు ఆయన ఇంటికి తరలివస్తున్నారు. వింత గుడ్డును చూడటానికి చిన్నా పెద్దా తేడా లేకుండా ఆసక్తి చూపుతున్నారు. “నా దగ్గర పది కోళ్లు ఉన్నాయి. అన్నింటికీ ఒకే ఆహారం పెడతాను. కానీ ఇంతవరకు ఇలాంటి గుడ్డును చూడలేదు” అని నూర్ తెలిపారు.
స్నేహితుడి ఆశ్చర్యం
నూర్ స్నేహితుడు హఫీజ్ మాట్లాడుతూ, రెండు రోజుల క్రితం కోడి నీలం గుడ్డు పెట్టింది. నా జీవితంలో ఇలాంటి విషయం ఎప్పుడూ చూడలేదు. వినలేదు కూడా. ఇది నిజంగా ఆశ్చర్యకరం అని అన్నాడు. ఈ వ్యాఖ్యలు ప్రజల్లో మరింత ఆసక్తిని రేపాయి.ఈ విషయం తెలుసుకున్న పశుసంవర్ధక శాఖ అధికారులు కూడా పరిశీలించారు. సహాయ సంచాలకులు డాక్టర్ అశోక్ మాట్లాడుతూ, “ఆకుపచ్చ, పసుపు రంగు గుడ్లు నేను చూశాను. కానీ సాధారణ కోడి నీలం గుడ్డు పెట్టడం చాలా అరుదు. ఇది కోడి క్లోమంలో ఉండే ‘బైలివర్డిన్’ అనే వర్ణద్రవ్యం కారణంగా జరగుతుంది” అని వివరించారు.పశువైద్యాధికారి డాక్టర్ రఘు నాయక్ మాట్లాడుతూ, గుడ్డు పైపొర రంగు మారడానికి బైలివర్డిన్ ప్రధాన కారణం. కొన్ని సందర్భాల్లో జన్యుపరమైన సమస్యలు లేదా ఆహారపు మార్పులు కూడా దీనికి దారితీస్తాయి అని తెలిపారు.
అరుదైన ఘటనపై చర్చ
గ్రామస్థులు మాత్రమే కాకుండా నిపుణులు కూడా ఈ ఘటనపై ఆసక్తి చూపుతున్నారు. సాధారణంగా ఇలాంటి రంగుల గుడ్లు ప్రత్యేక జాతుల కోళ్లలో మాత్రమే కనిపిస్తాయి. కానీ సాధారణ కోడి పెట్టినందువల్లే ఈ సంఘటన ప్రత్యేకంగా మారింది.నెల్లూరు గ్రామంలో జరిగిన ఈ ఘటన ఇప్పుడు సోషల్ మీడియాలో కూడా వైరల్ అవుతోంది. రైతు నూర్ ఇంటి ముందు గుంపులు కూర్చుంటే, నిపుణులు మాత్రం శాస్త్రీయ కారణాలు చెబుతున్నారు. ఏదేమైనా, ఒక చిన్న కోడి పెట్టిన నీలం గుడ్డు ఇప్పుడు అందరి దృష్టిని ఆకర్షిస్తోంది.
Read Also :