Elections: భారత ఉపరాష్ట్రపతి(Vice President) ఎన్నికకు సర్వం సిద్ధమైంది, ఓటింగ్ మంగళవారం (సెప్టెంబర్ 9న) జరగనుంది. ఎన్డీఏ తరపున సీపీ రాధాకృష్ణన్, ఇండియా కూటమి తరపున సుదర్శన్ రెడ్డి మధ్య తీవ్ర పోటీ నెలకొంది. లోక్సభలో ఎన్డీఏకు స్పష్టమైన మెజారిటీ ఉన్నప్పటికీ, ప్రతిపక్షాలు ఐక్యంగా సుదర్శన్ రెడ్డికి మద్దతు ఇస్తుండటంతో ఈ ఎన్నికలు ఆసక్తికరంగా మారాయి. గత నెలలో మాజీ ఉపరాష్ట్రపతి జగదీప్ ధన్కర్ అనారోగ్యం కారణంగా రాజీనామా చేయడంతో ఈ ఎన్నికలు అనివార్యమయ్యాయి. ఇది 17వ ఉపరాష్ట్రపతి ఎన్నిక.
అభ్యర్థుల నేపథ్యం, రాజకీయ వ్యూహాలు
ఈ ఎన్నికల్లో తమిళనాడుకు చెందిన సీనియర్ బీజేపీ నాయకుడు సీపీ రాధాకృష్ణన్, తెలంగాణకు చెందిన సుప్రీంకోర్టు(Supreme Court) మాజీ న్యాయమూర్తి బి. సుదర్శన్ రెడ్డి పోటీపడుతున్నారు. మహారాష్ట్ర గవర్నర్గా పనిచేసిన రాధాకృష్ణన్కు సుదీర్ఘ రాజకీయ అనుభవం ఉంది. దక్షిణాదిలో బీజేపీని బలోపేతం చేసే వ్యూహంలో భాగంగా ఆయన అభ్యర్థిత్వాన్ని ఎంపిక చేశారు. మరోవైపు, సుదర్శన్ రెడ్డి న్యాయవ్యవస్థలో తన నిజాయితీకి, నిబద్ధతకు పేరు పొందారు. రాజ్యాంగం, ప్రజాస్వామ్య విలువలను కాపాడే వ్యక్తిగా ఆయనను ప్రతిపక్షాలు భావిస్తున్నాయి.
ఇండియా కూటమిలోని పార్టీలు:
కాంగ్రెస్, తృణమూల్ కాంగ్రెస్, ఆమ్ ఆద్మీ పార్టీ, సమాజ్వాదీ పార్టీ, ఆర్జేడీ, వామపక్ష పార్టీలు సుదర్శన్ రెడ్డికి మద్దతుగా ప్రచారం చేశాయి. శివసేన (యుబిటి), ఏఐఎంఐఎం పార్టీలు కూడా జస్టిస్ సుదర్శన్ రెడ్డికి మద్దతు ప్రకటించాయి.
ఎన్డీఏకు మద్దతు ఇస్తున్న పార్టీలు:
వైఎస్సార్ కాంగ్రెస్ పార్టీ, గతంలో మాదిరిగానే ఎన్డీఏకు మద్దతు ఇవ్వనుంది. బీజేడీ పార్టీ ఇంకా తమ నిర్ణయాన్ని ప్రకటించలేదు.
ఉపరాష్ట్రపతి ఎన్నిక విధానం
ఉపరాష్ట్రపతిని పార్లమెంటు ఉభయ సభల సభ్యులతో కూడిన ఎలక్టోరల్ కాలేజీ ఎన్నుకుంటుంది. ఈ ఎన్నికల్లో లోక్సభ, రాజ్యసభ సభ్యులు (నామినేటెడ్ సభ్యులతో సహా) ఓటు వేస్తారు. రాష్ట్రాల శాసనసభలకు ఇందులో ఎలాంటి పాత్ర ఉండదు. మొత్తం 782 మంది ఎంపీలు (543 లోక్సభ, 245 రాజ్యసభ) ఈ ఎన్నికలో పాల్గొంటారు. రాజ్యాంగంలోని ఆర్టికల్ 66 ప్రకారం ఉపరాష్ట్రపతి ఎన్నిక అనుపాత ప్రాతినిధ్య వ్యవస్థకు అనుగుణంగా నిర్వహించబడుతుంది. సింగిల్ ట్రాన్స్ఫరబుల్ ఓటు (STV) ద్వారా రహస్య బ్యాలెట్ విధానంలో ఓటు వేస్తారు. అభ్యర్థులకు ఓటర్లు తమ ప్రాధాన్యతల ర్యాంక్ రూపంలో (1, 2, 3…) ఇస్తారు. విజేతగా నిలవడానికి ఒక అభ్యర్థికి మొత్తం చెల్లుబాటయ్యే ఓట్లలో సగానికి పైగా (మెజారిటీ) రావాలి. మొదటి ప్రాధాన్యత ఓట్లలో ఎవరికీ మెజారిటీ రాకపోతే, అత్యల్ప ఓట్లు పొందిన అభ్యర్థిని తొలగించి, అతని ఓట్లను రెండవ ప్రాధాన్యత ప్రకారం ఇతర అభ్యర్థులకు బదిలీ చేస్తారు. అభ్యర్థి మెజారిటీ సాధించే వరకు ఈ ప్రక్రియ కొనసాగుతుంది. ఎన్నికల సంఘం ఈ ప్రక్రియను పర్యవేక్షిస్తుంది.
మెజారిటీ ఎవరికి ఉంది
ప్రస్తుత గణాంకాల ప్రకారం, ఎన్డీఏకు లోక్సభలో 293 మంది, రాజ్యసభలో 130 మంది ఎంపీలు ఉన్నారు. నామినేటెడ్ సభ్యులతో కలిపి మొత్తం ఎన్డీఏ ఎంపీల సంఖ్య 435. ఎన్నికల్లో పాల్గొనే మొత్తం ఎంపీల సంఖ్య 782 కాగా, విజయం సాధించడానికి అవసరమైన మెజారిటీ సంఖ్య 392. క్రాస్ ఓటింగ్ లేకపోతే, ఎన్డీఏ అభ్యర్థి సీపీ రాధాకృష్ణన్ విజయం దాదాపు ఖాయం.
ఉపరాష్ట్రపతి ఎన్నికల్లో ఓటర్లు ఎవరు?
పార్లమెంటు ఉభయ సభలకు చెందిన లోక్సభ, రాజ్యసభ ఎంపీలు (నామినేటెడ్ సభ్యులతో సహా) ఓటు వేస్తారు.
ఉపరాష్ట్రపతి ఎన్నికల్లో గెలవడానికి ఎన్ని ఓట్లు అవసరం?
మొత్తం చెల్లుబాటయ్యే ఓట్లలో సగానికి పైగా ఓట్లు సాధించాలి.
Read hindi news: hindi.vaartha.com
Read also: