Shashikala: ఎట్టిపరిస్థితుల్లోనూ స్టాలిన్‌ను మళ్లీ సీఎం కానివ్వను

తమిళనాడు రాజకీయాలు మళ్లీ ఉత్కంఠభరితంగా మారుతున్నాయి. వచ్చే ఏడాది జరగనున్న అసెంబ్లీ ఎన్నికలు సమీపిస్తున్న కొద్దీ ప్రతి పార్టీ తమ బలాన్ని చాటుకోవడానికి నూతన వ్యూహాలతో ముందుకు వెళ్తోంది. ఈ క్రమంలోనే ఏఐఏడీఎంకే (AIADMK) మాజీ నేత, జయలలిత సన్నిహితురాలు వీకే శశికళ మళ్లీ రాజకీయ వేదికపైకి వచ్చి సంచలన వ్యాఖ్యలు చేశారు. ముఖ్యమంత్రి ఎంకే స్టాలిన్ నేతృత్వంలోని డీఎంకే (DMK) ప్రభుత్వంపై ఆమె తీవ్రమైన విమర్శలు గుప్పించారు.శశికళ మాట్లాడుతూ, “రాబోయే అసెంబ్లీ ఎన్నికల్లో డీఎంకే పార్టీని గెలిపించనివ్వను. స్టాలిన్ మరోసారి అధికారంలోకి రావడం అసాధ్యం. తమిళ ప్రజలు ప్రస్తుతం ఎదుర్కొంటున్న సమస్యలు చూస్తే రాత్రిళ్లు నాకే నిద్ర పట్టడం లేదు. జయలలిత గారి హయాంలో మేము అందించిన పాలనను ప్రజలు మరచిపోలేదు. ఆ పాలనలో అభివృద్ధి, సంక్షేమం రెండూ కలిసివచ్చాయి. కానీ నేటి పరిస్థితులు పూర్తిగా భిన్నంగా ఉన్నాయి. ప్రజలు అసంతృప్తిగా ఉన్నారు” అని వ్యాఖ్యానించారు శశికళ (Shashikala).

ప్రస్తుత పాలనపై శశికళ తీవ్ర అసంతృప్తి వ్యక్తం చేశారు

రాష్ట్రంలో ప్రస్తుత పాలనపై శశికళ తీవ్ర అసంతృప్తి వ్యక్తం చేశారు. ‘అమ్మ’ జయలలిత హయాంలో తమిళనాడు ఎంతో అభివృద్ధి సాధించిందని, కానీ నేటి పరిస్థితులు అందుకు పూర్తి భిన్నంగా ఉన్నాయని ఆవేదన చెందారు. “ప్రస్తుత పరిస్థితి చూస్తుంటే నాకు రాత్రిళ్లు నిద్ర కూడా సరిగా పట్టడం లేదు. మేం ప్రజలకు మంచి పాలన అందించాం. అందుకే ఇప్పటి పరిస్థితులు చూస్తే ఆ బాధ ఎలా ఉంటుందో మాకే తెలుసు. స్టాలిన్, మిమ్మల్ని మరోసారి అధికారంలోకి రానివ్వను” అని ఆమె స్పష్టం చేశారు.ఈ సందర్భంగా, గత ఏఐఏడీఎంకే ప్రభుత్వం తీసుకున్న ఓ నిర్ణయాన్ని కూడా శశికళ తప్పుపట్టారు. పారిశుద్ధ్య కార్మికుల వ్యవస్థను ప్రైవేటీకరించడం సరైన చర్య కాదని ఆమె విమర్శించారు. జయలలిత జీవించి ఉంటే అలాంటి నిర్ణయానికి ఎప్పటికీ అంగీకరించేవారు కాదని అన్నారు. రాబోయే ఎన్నికల్లో ప్రజలు అన్నీ ఆలోచించి ఓటు వేయాలని ఆమె పిలుపునిచ్చారు.