నటి రన్యా రావు బంగారం అక్రమ రవాణా కేసులో అరెస్ట్ అయ్యింది. ఈ కేసు కర్ణాటక రాజకీయాల్లో ప్రకంపనలు రేపుతోంది. బీజేపీ ఎమ్మెల్యే బసనగౌడ పాటిల్ యత్నాల్ చేసిన సంచలన ఆరోపణలు మరింత ఉత్కంఠ రేపాయి. ఈ కేసులో ఇద్దరు మంత్రులు, కస్టమ్స్ అధికారులు, ఇతర కీలక వ్యక్తుల ప్రమేయం ఉందని ఆయన పేర్కొన్నారు. దీనికి సంబంధించి ఆయన త్వరలో సభలో వివరణ ఇవ్వనున్నట్లు తెలిపారు.
రన్యా రావుతో ఇద్దరు మంత్రుల లింక్?
ఈ కేసు మరింత వాడివేడిగా మారింది. బీజేపీ ఎమ్మెల్యే యత్నాల్ మాట్లాడుతూ, ఈ కేసులో ఇద్దరు మంత్రులు నేరుగా సంబంధం కలిగి ఉన్నారు. నేను వారి పేర్లను సభలో బయట పెడతాను అని చెప్పారు. ప్రోటోకాల్ ఉల్లంఘన, భూమి కేటాయింపుల్లో అక్రమాలు జరిగినట్లు ఆయన ఆరోపించారు. నటి రన్యా రావుకు కర్ణాటక ఇండస్ట్రీయల్ ఏరియా డెవలప్మెంట్ బోర్డ్ (KIADB) 12 ఎకరాల భూమి కేటాయించబడింది. అయితే, భూమికి సంబంధించిన చెల్లింపులు జరగకపోవడంతో, ఆ కేటాయింపును రద్దు చేశారు. ఈ కేసులో కస్టమ్స్ అధికారులు కూడా అనేక తప్పిదాలు చేశారు అని మంత్రి సంతోష్ లాడ్ ఆరోపించారు. దీనిపై బీజేపీ ఎమ్మెల్యే యత్నాల్ స్పందిస్తూ, ఎవరు తప్పు చేసినా, అది తప్పే. కస్టమ్స్ అధికారులు కూడా దోషులే అయితే, వారిని సమర్థించం అని స్పష్టం చేశారు.
కోర్టులో రన్యా ఆరోపణలు
రన్యా రావు కోర్టులో తనను చిత్రహింసలు పెట్టారని ఆరోపించారు. నన్ను గంటల తరబడి ప్రశ్నించారు. తెల్ల కాగితాలపై బలవంతంగా సంతకాలు చేయించుకున్నారు. నిద్ర పోనివ్వకుండా, తిండి కూడా తిననివ్వడం లేదు అని కోర్టుకు వివరించారు. కస్టడీలో టార్చర్ విషయంపై మానవ హక్కుల కమిషన్ స్పందించవచ్చనే ఊహాగానాలు ఉన్నాయి. ఈ కేసులో ఐపీఎస్ అధికారి రామచంద్రరావు పాత్రపై విచారణ జరపాలని ప్రభుత్వం ఆదేశాలు జారీ చేసింది. ఎయిర్పోర్టులో ప్రోటోకాల్ ఉల్లంఘనకు ఆయన బాధ్యత వహించాలంటూ ఆరోపణలు వస్తున్నాయి. బంగారం అక్రమ రవాణా కేసు కేవలం రన్యా రావు వరకు మాత్రమే పరిమితం కాదా? ఇందులో మంత్రులు, అధికారుల ప్రమేయం ఎంత ఉంది? దీనిపై సీబీఐ లేదా ఎన్ఫోర్స్మెంట్ డైరెక్టరేట్ (ED) విచారణ జరిపే అవకాశముందా? అనే ప్రశ్నలు ప్రస్తుతం చర్చనీయాంశమయ్యాయి. ఈ కేసు మరిన్ని సంచలన విషయాలను వెలుగులోకి తెచ్చే అవకాశముంది. రన్యా రావుతో లింక్ ఉన్న మంత్రుల పేర్లు బయటపడితే, రాజకీయంగా పెనుపరిమాణంలో దుమారం రేగే అవకాశం ఉంది.