Ranya Rao : విడిగా ఉంటున్నామని కోర్టుకు తెలిపిన రన్యా రావు భర్త కన్నడ నటి రన్యా రావు భర్త జతిన్ హుక్కేరి కోర్టుకు కీలక సమాచారం అందించారు. తాను అధికారికంగా విడిపోలేదని, కానీ కొన్ని వ్యక్తిగత కారణాల వల్ల వేరుగా జీవిస్తున్నట్లు వెల్లడించారు. గల్ఫ్ దేశాల నుంచి అక్రమంగా బంగారం తరలిస్తుండగా రన్యా రావు పట్టుబడిన విషయం తెలిసిందే.స్మగ్లింగ్ కేసులో తనపై ఎలాంటి చర్యలు తీసుకోకూడదని కోర్టును కోరుతూ హుక్కేరి పిటిషన్ వేశారు. ఈ సందర్భంగా, రన్యా రావుతో తనకు గత ఏడాది నవంబర్లో వివాహమైందని, కానీ డిసెంబర్ నుంచి వారిద్దరూ వేరుగా ఉంటున్నారని కోర్టుకు తెలిపారు.
హుక్కేరి వేసిన పిటిషన్పై గత వారం విచారణ నిర్వహించిన న్యాయస్థానం, తదుపరి విచారణ వచ్చే వరకు ఆయనపై ఎలాంటి చర్యలు తీసుకోవద్దని ఆదేశించింది. ఈ ఉత్తర్వులు మార్చి 24 వరకు అమలులో ఉంటాయని పేర్కొంది.ఇదిలా ఉండగా, హుక్కేరి వేసిన పిటిషన్ను వ్యతిరేకిస్తూ డైరెక్టరేట్ ఆఫ్ రెవెన్యూ ఇంటెలిజెన్స్ (DRI) అధికారులు కౌంటర్ పిటిషన్ వేయనున్నట్లు ప్రకటించారు. కేసు మరింత మలుపు తిరిగే అవకాశముండటంతో, రానున్న రోజుల్లో దీనిపై మరింత స్పష్టత రావచ్చని విశ్లేషకులు భావిస్తున్నారు.