ప్రతిష్టాత్మకమైన మిస్ యూనివర్స్ ఇండియా 2025 పోటీల గ్రాండ్ ఫైనల్ సోమవారం రాత్రి జైపూర్లో అట్టహాసంగా జరిగింది. ఈ కిరీటం రాజస్థాన్ (Rajasthan) కు చెందిన మణిక విశ్వకర్మ (Manika Vishwakarma) విజేతగా నిలిచారు. గత ఏడాది టైటిల్ గెలుచుకున్న రియా సింఘా స్వయంగా ఆమెకు కిరీటం తొడిగారు. ఈ విజయంతో మణిక రాబోయే నవంబర్లో థాయ్లాండ్లో జరగనున్న 74వ మిస్ యూనివర్స్ వేదికపై భారతదేశానికి ప్రాతినిధ్యం వహించనున్నారు.
ఇతర విజేతలు
ఈ పోటీలో ఉత్తరప్రదేశ్కు చెందిన తాన్యా శర్మ ఫస్ట్ రన్నరప్గా నిలవగా, హర్యానాకు చెందిన మెహక్ ధింగ్రా సెకండ్ రన్నరప్ టైటిల్ అందుకున్నారు. అదేవిధంగా, అమిషి కౌశిక్ థర్డ్ రన్నరప్గా నిలిచారు.
బహుముఖ ప్రజ్ఞాశాలి మణిక
రాజస్థాన్లోని శ్రీ గంగానగర్లో జన్మించిన మణిక (Manika Vishwakarma) ప్రస్తుతం ఢిల్లీలో నివసిస్తున్నారు. పొలిటికల్ సైన్స్, ఎకనామిక్స్లో తుది సంవత్సరం చదువుతున్న ఆమె విద్యారంగంలోనే కాకుండా కళారంగంలోనూ ప్రత్యేక ప్రతిభ కనబరిచారు. శాస్త్రీయ నృత్యంలో శిక్షణ పొందిన ఆమె పెయింటింగ్లోనూ తనకంటూ గుర్తింపు తెచ్చుకున్నారు. లలిత కళా అకాడమీ, జేజే స్కూల్ ఆఫ్ ఆర్ట్స్ వంటి ప్రతిష్టాత్మక సంస్థల నుంచి గౌరవాలు అందుకోవడం ఆమె ప్రతిభకు నిదర్శనం.
అంతర్జాతీయ వేదికపై అనుభవం
విదేశాంగ మంత్రిత్వ శాఖ ఆధ్వర్యంలో జరిగిన బిమ్స్టెక్ సెవోకాన్ (BIMSTEC Sevocon) కార్యక్రమంలో భారతదేశానికి ప్రాతినిధ్యం వహించడం మణికకు ప్రత్యేకమైన గుర్తింపును తెచ్చిపెట్టింది. అంతర్జాతీయ వేదికలపై ఆత్మవిశ్వాసంతో నిలబడగలిగే శక్తిని ఆ అనుభవం ఆమెకు ఇచ్చింది.
సామాజిక కార్యక్రమాల పట్ల నిబద్ధత
మణిక కేవలం కళలు, విద్యలకే పరిమితం కాకుండా సామాజిక అంశాలపై కూడా దృష్టి సారిస్తున్నారు. “న్యూరోనోవా” అనే సంస్థను స్థాపించి, న్యూరోడైవర్జెన్స్పై అవగాహన పెంపొందించడానికి కృషి చేస్తున్నారు. ఏడీహెచ్డీ వంటి సమస్యలను లోపాలుగా కాకుండా ప్రత్యేకమైన మేధోశక్తులుగా చూడాలని ఆమె తన ప్లాట్ఫామ్ ద్వారా ప్రజలకు తెలియజేస్తున్నారు.
విజయానంతరం స్పందన
విజయం అనంతరం మణిక మాట్లాడుతూ –
“నా ప్రయాణం నా స్వస్థలం గంగానగర్ నుంచి మొదలైంది. ఢిల్లీ వచ్చి ఈ పోటీ కోసం కష్టపడ్డాను. ప్రతి ఒక్కరిని నమ్మకం, ధైర్యం ముందుకు నడిపిస్తాయి. నన్ను ఈ స్థాయికి తీసుకొచ్చిన ప్రతి ఒక్కరికీ నా హృదయపూర్వక కృతజ్ఞతలు. ఈ పోటీలు కేవలం అందాల వేదికలు కాదు, అవి వ్యక్తిత్వాన్ని తీర్చిదిద్దే పాఠశాలలాంటివి” అని తన ఆనందాన్ని వ్యక్తం చేశారు.
Read hindi news: hindi.vaartha.com
Read also: