Kerala Elections 2026: కేరళ అసెంబ్లీ ఎన్నికల సమరం రసవత్తరంగా మారుతోంది. వచ్చే ఏప్రిల్ 9న జరగనున్న పోలింగ్ కోసం రాజకీయ పార్టీలు సమాయత్తమవుతున్నాయి. ఈ క్రమంలోనే కేరళ ముఖ్యమంత్రి పినరయి విజయన్ గురువారం కన్నూరు జిల్లాలోని ధర్మదం నియోజకవర్గం నుండి తన నామినేషన్ పత్రాలను దాఖలు చేశారు. తలస్సేరి సబ్ రిజిస్ట్రార్ కార్యాలయంలో రిజిస్ట్రార్ ఏబీ సత్యన్కు ఆయన పత్రాలను సమర్పించారు. ఈ కార్యక్రమంలో సీపీఎం అగ్రనేతలు ఆయన వెంట ఉన్నారు. విజయన్ తన సుదీర్ఘ రాజకీయ ప్రస్థానంలో అసెంబ్లీకి పోటీ చేయడం ఇది ఏడోసారి కావడం విశేషం.
Read Also:BJP Kerala Second List: కేరళ బీజేపీ రెండో జాబితా విడుదల!
నామినేషన్ డిపాజిట్ కోసం గాంధీ భవన్ వృద్ధ మహిళల విరాళం
విజయన్ నామినేషన్ ప్రక్రియలో ఒక మానవీయ కోణం ఆవిష్కృతమైంది. పతనపురం గాంధీ భవన్లో నివసిస్తున్న వృద్ధ మహిళలు తమ వంతు సహాయంగా ముఖ్యమంత్రి నామినేషన్ డిపాజిట్ మొత్తాన్ని విరాళంగా అందించారు. గతంలో కుతుపరంబ, పయ్యన్నూర్ నియోజకవర్గాల నుండి ప్రాతినిధ్యం వహించిన విజయన్, 2016 నుండి ధర్మదం కోటను కాపాడుకుంటూ వస్తున్నారు. ఈసారి ఇక్కడ త్రిముఖ పోటీ నెలకొంది. విజయన్కు సవాల్ విసురుతూ యూడీఎఫ్ తరఫున వీపీ అబ్దుల్ రషీద్, బీజేపీ అభ్యర్థిగా కే రంజిత్ బరిలో నిలిచారు.
ఎన్నికల ప్రచారంలో 80 ఏళ్ల విజయన్ ఎంతో ఉత్సాహంగా పాల్గొంటున్నారు. భారీ రోడ్షోలతో జనాల్లోకి వెళ్తున్న ఆయన, ఎల్డీఎఫ్ ప్రభుత్వం చేపట్టిన అభివృద్ధి పనులే తమను గెలిపిస్తాయని ధీమా వ్యక్తం చేస్తున్నారు. కేరళను పెట్టుబడులకు స్వర్గధామంగా మార్చామని, శాంతిభద్రతలను కాపాడామని ఆయన పేర్కొన్నారు. ప్రతిపక్షాలు చేస్తున్న విమర్శలను తిప్పికొడుతూ, తమ ప్రభుత్వం సంఘ్ పరివార్ అజెండాను అడ్డుకుందని స్పష్టం చేశారు. మరోవైపు, బీజేపీ తన రెండో విడత అభ్యర్థుల జాబితాను విడుదల చేస్తూ మహిళలకు ప్రాధాన్యతనిచ్చింది.
ఏప్రిల్ 9న ఎన్నికలు, మే 4న ఓట్ల లెక్కింపు
కేరళలోని 140 అసెంబ్లీ స్థానాలకు ఏప్రిల్ 9న ఒకే దశలో ఎన్నికలు జరగనున్నాయి. మే 4న ఫలితాలు వెలువడనున్నాయి. గతంలో ఎల్డీఎఫ్, యూడీఎఫ్ మధ్యే ప్రధాన పోటీ ఉండేది, కానీ ఈసారి బీజేపీ కూడా బలంగా పోటీ ఇస్తుండటంతో పోరు ఆసక్తికరంగా మారింది. 2021 ఎన్నికల్లో ఎల్డీఎఫ్ ఘనవిజయం సాధించి అధికారాన్ని నిలబెట్టుకోగా, ఈసారి హ్యాట్రిక్ కొట్టాలని ప్లాన్ చేస్తోంది. పదేళ్ల నిరీక్షణ తర్వాత అధికారం దక్కించుకోవాలని యూడీఎఫ్, ఉనికి చాటుకోవాలని ఎన్డీయే వ్యూహాలు రచిస్తున్నాయి.
Read hindi news: hindi.vaartha.com
Epaper : epaper.vaartha.com
Read Also: