Karnataka : హనీ ట్రాప్ అంశాన్ని అసెంబ్లీలో లేవనెత్తిన బీజేపీ ఎమ్మెల్యేలు కర్ణాటక అసెంబ్లీలో గందరగోళం రేగడంతో 18 మంది బీజేపీ ఎమ్మెల్యేలపై ఆరు నెలల సస్పెన్షన్ వేటు పడింది. అసెంబ్లీ సమావేశాల్లో సభా కార్యక్రమాలను అడ్డుకున్న కారణంగా ఈ చర్య తీసుకున్నట్టు స్పీకర్ యూటీ ఖాదర్ వెల్లడించారు. సస్పెండైన వారిలో మాజీ ఉప ముఖ్యమంత్రి డాక్టర్ సీఎన్ అశ్వథ్ నారాయణ్ సహా పలువురు కీలక నేతలు ఉన్నారు.ఇటీవల కర్ణాటక రాజకీయాల్లో తీవ్ర దుమారం రేపుతున్న అంశం ‘హనీ ట్రాప్’ కేసు. రాష్ట్రంలోని పలువురు మంత్రులు, ప్రజాప్రతినిధులపై హనీ ట్రాప్ ఆరోపణలు రావడం తీవ్ర చర్చనీయాంశంగా మారింది. ముఖ్యంగా నేతలను బ్లాక్మెయిల్ చేసి అవినీతికి తోడు కావాలనే కుట్ర జరుగుతోందని బీజేపీ సభ్యులు ఆరోపించారు.ఈ వ్యవహారంపై అసెంబ్లీలో భాజపా ఎమ్మెల్యేలు గొడవ పెట్టారు. పూర్తి విచారణ జరిపే వరకు బాధ్యులపై చర్యలు తీసుకోవాలని వారు డిమాండ్ చేశారు.
దీంతో సభలో గందరగోళం మొదలైంది ప్రభుత్వ వైఖరిపై అసంతృప్తితో ఉన్న బీజేపీ సభ్యులు స్పీకర్ వద్దకు వెళ్లి నిరసన తెలిపారు.అసెంబ్లీలో భాజపా సభ్యుల తీరుపై అసంతృప్తిగా ఉన్న స్పీకర్ యూటీ ఖాదర్, సభా నియమావళిని ఉల్లంఘించిన కారణంగా 18 మంది సభ్యులపై ఆరు నెలల సస్పెన్షన్ విధించారు. అయితే ఈ నిర్ణయాన్ని బీజేపీ తీవ్రంగా ఖండించింది.”ఇది పూర్తిగా రాజకీయ కక్ష సాధింపే. ప్రభుత్వ వైఫల్యాలను ఎత్తిచూపితే ఎమ్మెల్యేలను సస్పెండ్ చేస్తున్నారా?” అని ప్రతిపక్ష నేతలు మండిపడ్డారు.
ప్రభుత్వానికి వ్యతిరేకంగా రాష్ట్రవ్యాప్తంగా ఆందోళన చేపడతామని వారు హెచ్చరించారు.హనీ ట్రాప్ వ్యవహారం గత కొన్ని రోజులుగా కర్ణాటక రాజకీయాలను కుదిపేస్తోంది. ముఖ్యంగా, గొప్ప రాజకీయ ప్రముఖులను టార్గెట్ చేస్తూ ఓ గూఢచార వ్యవస్థ పని చేస్తోందన్న అనుమానాలు వ్యక్తమవుతున్నాయి. అధికార పక్షంలోనే కొందరు నేతలు ఇందులో ఉన్నారని ప్రతిపక్షం ఆరోపిస్తోంది.ఈ వ్యవహారం మరింత ముదిరితే రాష్ట్ర రాజకీయాలపై తీవ్ర ప్రభావం పడే అవకాశం ఉందని విశ్లేషకులు చెబుతున్నారు. ఇప్పటికే ప్రభుత్వంపై ఒత్తిడి పెరిగిపోయింది. హనీ ట్రాప్ వ్యవహారం, అసెంబ్లీలో జరిగిన ఘర్షణల నేపథ్యంలో రాజకీయంగా కర్ణాటక మరింత వేడెక్కనుంది!