Iran Israel War: అంతర్జాతీయంగా చమురు ధరలు ఆకాశాన్ని తాకుతున్న తరుణంలో ట్రంప్ ప్రభుత్వం భారత్కు కీలక వెసులుబాటు కల్పించింది. ఇరాన్తో కొనసాగుతున్న ఉద్రిక్తతల వల్ల చమురు మార్కెట్లో నెలకొన్న అనిశ్చితిని తగ్గించేందుకు రష్యా నుంచి ముడి చమురు దిగుమతి చేసుకునేందుకు భారత్కు నెల రోజుల పాటు తాత్కాలిక అనుమతి ఇచ్చింది. దీనికి సంబంధించి అమెరికా ట్రెజరీ డిపార్ట్మెంట్లోని ఆఫీస్ ఆఫ్ ఫారిన్ అసెట్స్ కంట్రోల్ (OFAC) అధికారిక ఉత్తర్వులను జారీ చేసింది.
Read Also: Sukhoi-30 MKI: కుప్పకూలిన సుఖోయ్ యుద్ధ విమానం.. ఇద్దరు పైలట్లు మృతి
కఠినమైన షరతులు.. ఏప్రిల్ 4 వరకే గడువు
అయితే, ఈ అనుమతి కేవలం తాత్కాలికమే కాకుండా కఠినమైన నిబంధనలతో కూడి ఉంది. అమెరికా జారీ చేసిన ఈ ప్రత్యేక లైసెన్స్ ప్రకారం.. ఈ నెల 5వ తేదీకి ముందే నౌకల్లోకి లోడ్ చేసిన రష్యా ముడి చమురు లేదా పెట్రోలియం ఉత్పత్తుల లావాదేవీలకు మాత్రమే అనుమతి ఉంటుంది. ఈ ప్రక్రియ మొత్తాన్ని ఏప్రిల్ 4వ తేదీ లోపు పూర్తి చేయాల్సి ఉంటుందని ఓఎఫ్ఏసీ (OFAC) స్పష్టం చేసింది. ఈ వెసులుబాటు భారతీయ ఇంధన కంపెనీలకు పెద్ద ఊరటనిచ్చే అంశం.
ఈ చమురును కేవలం భారత ఓడరేవులకు మాత్రమే చేర్చాలి. కొనుగోలు చేసే సంస్థలు కూడా భారత చట్టాల ప్రకారం నమోదైనవి అయి ఉండాలని ట్రెజరీ శాఖ తన ఉత్తర్వుల్లో స్పష్టంగా పేర్కొంది.ఈ నిర్ణయంపై అమెరికా అధికారి బాసెంట్ మాట్లాడుతూ… “అంతర్జాతీయ మార్కెట్లోకి చమురు ప్రవాహం కొనసాగేలా చూసేందుకే ఈ తాత్కాలిక 30 రోజుల మినహాయింపు ఇస్తున్నాం. ఇది కేవలం సముద్రంలో ఇప్పటికే చిక్కుకుపోయిన చమురుకు సంబంధించిన లావాదేవీలకు మాత్రమే వర్తిస్తుంది.
తాత్కాలిక చర్య మాత్రమే
కాబట్టి, దీనివల్ల రష్యా ప్రభుత్వానికి పెద్దగా ఆర్థిక ప్రయోజనం చేకూరదు. భారత్ మాకు కీలక భాగస్వామి. రానున్న రోజుల్లో న్యూఢిల్లీ అమెరికా నుంచి చమురు కొనుగోళ్లను పెంచుతుందని ఆశిస్తున్నాం. ఇంధన మార్కెట్లను ఇరాన్ బందీగా మార్చే ప్రయత్నాలను అడ్డుకోవడానికే ఈ తాత్కాలిక చర్య” అని వివరించారు.ఈ మినహాయింపు కేవలం చమురు రవాణాను పూర్తి చేయడానికి అవసరమైన కార్యకలాపాలకే పరిమితం.
నౌకల డాకింగ్, యాంకరింగ్, సిబ్బంది భద్రత, అత్యవసర మరమ్మతులు, బీమా, బంకరింగ్ వంటి సేవలకు ఇది వర్తిస్తుంది. ఇది రష్యాపై విధించిన ఆంక్షల సడలింపు కాదని, కేవలం పరిమితమైన, తాత్కాలిక చర్య మాత్రమేనని అమెరికా అధికారులు నొక్కిచెప్పారు. 2022లో ఉక్రెయిన్పై దాడి తర్వాత రష్యాపై విధించిన విస్తృత ఆంక్షలు యథాతథంగా కొనసాగుతాయని స్పష్టం చేశారు. అలాగే, ఈ లైసెన్స్ కింద ఇరాన్కు సంబంధించిన ఎలాంటి లావాదేవీలకు అనుమతి లేదని చెప్పారు.
Read hindi news: hindi.vaartha.com
Epaper: epaper.vaartha.com
Read Also: