దేశవ్యాప్తంగా ఆయిల్ మార్కెటింగ్ కంపెనీలు జులై 1న కమర్షియల్ గ్యాస్ (Commercial gas) సిలిండర్ల ధరలను తగ్గించాయని ప్రకటించాయి. 19 కిలోల గల వాణిజ్య గ్యాస్ సిలిండర్పై రూ.58.50 తగ్గింపు అమల్లోకి వచ్చింది. దీంతో ఢిల్లీలో ప్రస్తుతం సిలిండర్ ధర రూ.1,723 నుంచి రూ.1,665కి తగ్గింది. మిగతా నగరాల్లోనూ ధరలు తగినంత మేరకు తగ్గినట్లు సమాచారం.
ఇండస్ట్రీలకు ఊరట, వ్యాపార రంగానికి సహాయం
ఈ ధర తగ్గింపుతో హోటల్స్, రెస్టారెంట్లు, బేకరీస్ వంటి వాణిజ్య సంస్థలకు కొంతమేర లాభం కలగనుంది. గ్యాస్ ధరల పెరుగుదలతో ఇప్పటికే వ్యాపార రంగంపై ఒత్తిడి పెరిగిన నేపథ్యంలో, ఈ తాజా తగ్గింపు మంచి పరిణామంగా భావిస్తున్నారు. ముఖ్యంగా చిన్న స్థాయి వ్యాపారులు గ్యాస్ ధరల తగ్గింపుతో కొంత ఉపశమనం పొందే అవకాశం ఉంది.
గృహ వినియోగ సిలిండర్ల ధరలో మార్పులేమీ లేవు
మరోవైపు, గృహ అవసరాల కోసం వినియోగించే 14.2 కిలోల డొమెస్టిక్ సిలిండర్ ధరల్లో మాత్రం ఎలాంటి మార్పులు చేయలేదని ఆయిల్ కంపెనీలు స్పష్టం చేశాయి. తద్వారా సామాన్య గృహ వినియోగదారులకు ఎటువంటి ఉపశమనం లభించలేదు. అయితే రానున్న నెలల్లో గృహ గ్యాస్ ధరలపై సైతం సమీక్ష జరపవచ్చని భావిస్తున్నారు.
Read Also : Sigachi Plant Explosion : భారీ పేలుడుకు కారణమిదేనా?