ఒడిశాలో ముఖ్యమంత్రి మోహన్ చరణ్ మాఝీ నేతృత్వంలోని భారతీయ జనతా పార్టీ ప్రభుత్వం కొత్త విధానాలను అమలు చేస్తోంది. ముఖ్యంగా విద్యా రంగంలో సమూల మార్పులకు శ్రీకారం చుట్టింది. ప్రాథమిక విద్యా మంత్రిత్వ శాఖలో పలు కీలక సంస్కరణలు తీసుకురావడం ద్వారా ప్రభుత్వ పాఠశాలల రూపురేఖలను పూర్తిగా మార్చేందుకు సిద్ధమైంది. ఈ క్రమంలోనే ఇప్పటికే విద్యార్థుల యూనిఫాంల రంగును మారుస్తూ నిర్ణయం తీసుకున్న ప్రభుత్వం, ఇప్పుడు మరో కీలక నిర్ణయంగా పాఠశాల భవనాల రంగును మార్చేందుకు చర్యలు చేపట్టింది. గతంలో బిజూ జనతాదళ్ ప్రభుత్వం హయాంలో ఒడిశా ప్రభుత్వ పాఠశాల భవనాలను ఆకుపచ్చ, తెలుపు రంగులతో రంగరించారు. అయితే ఇప్పుడు అధికారంలో ఉన్న బీజేపీ ప్రభుత్వం వాటికి పూర్తిగా కొత్త రూపాన్ని ఇవ్వాలని నిర్ణయించింది. అందులో భాగంగా రాష్ట్రంలోని అన్ని ప్రభుత్వ పాఠశాల భవనాలను నారింజ రంగులో పెయింట్ చేయాలని నిర్ణయం తీసుకుంది. ఈ మేరకు ఒడిశా స్కూల్ ఎడ్యుకేషన్ ప్రోగ్రామ్ అథారిటీ నుంచి ఉత్తర్వులు వెలువడ్డాయి.
యూనిఫాం రంగుల్లో మార్పులు
ఇది కొత్తగా తీసుకున్న నిర్ణయం మాత్రమే కాకుండా, గతేడాది కూడా ఒడిశా ప్రభుత్వం విద్యార్థుల యూనిఫాంల రంగును మార్పు చేసింది. ఛాత్ర పరిధాన్ యోజన కింద సెకండరీ పాఠశాల విద్యార్థుల యూనిఫాంలకు కొత్త రంగులను పరిచయం చేసింది. తెలుపు-ఆకుపచ్చ రంగుల స్థానంలో లేత గోధుమ, మెరూన్ రంగులను చేర్చింది. ఇప్పుడు పాఠశాల భవనాలకు కూడా నారింజ రంగును ఎంచుకోవడం చర్చనీయాంశంగా మారింది.
పాఠశాల భవనాలకు కొత్త రంగు
ఒడిశాలో ప్రస్తుతం ఉన్న ప్రభుత్వ పాఠశాల భవనాలను ఆకుపచ్చ, తెలుపు రంగుల నుంచి నారింజ రంగుకు మార్చేందుకు అధికార యంత్రాంగం ఇప్పటికే చర్యలు ప్రారంభించింది. ఈ నిర్ణయాన్ని అమలు చేసేందుకు ఒడిశా స్కూల్ ఎడ్యుకేషన్ ప్రోగ్రామ్ అథారిటీ ప్రత్యేక మార్గదర్శకాలను రూపొందించింది. అన్ని జిల్లాల కలెక్టర్లు, సర్వ శిక్షా అభియాన్ ఛైర్మన్లకు ఈ మార్పులపై నివేదిక ఇవ్వాలని సూచించింది. అదేవిధంగా, రంగుల మార్పు ప్రక్రియను సమర్థంగా నిర్వహించేందుకు ఫీల్డ్ ఫంక్షనరీలకు తగిన సూచనలు ఇవ్వాలని పేర్కొంది. పాఠశాల భవనాల రంగును మార్చే కార్యక్రమంతోపాటు, ఒడిశా బీజేపీ ప్రభుత్వం పలు ఇతర చర్యలూ తీసుకుంటోంది. ఇందులో భాగంగా సమగ్ర శిక్షా అభియాన్ కింద ప్రభుత్వ పాఠశాలల్లో మరమ్మత్తులు, పునరుద్ధరణ పనులకు అనుమతి ఇచ్చింది. గత ప్రభుత్వ హయాంలో చేపట్టిన పాఠశాల అభివృద్ధి పనులను మరింత వేగంగా అమలు చేసేందుకు ప్రభుత్వం నిధులను కేటాయించింది.
ప్రభుత్వ అంచనాలు, ప్రజల అభిప్రాయాలు
ఇదే సమయంలో, బీజేపీ ప్రభుత్వం మాత్రం ఈ రంగు మార్పు వెనుక విద్యా ప్రాంగణాల అభివృద్ధే ప్రధాన ఉద్దేశమని స్పష్టం చేస్తోంది. పాఠశాలల మరమ్మత్తులు, పునరుద్ధరణ పనులను వేగంగా పూర్తి చేసి విద్యార్థులకు మెరుగైన వాతావరణాన్ని అందించడమే లక్ష్యమని ప్రభుత్వం వెల్లడించింది. అయితే, ప్రభుత్వ నిర్ణయంపై సాధారణ ప్రజలు మిశ్రమ స్పందనను వ్యక్తం చేస్తున్నారు. కొంతమంది విద్యార్థుల తల్లిదండ్రులు పాఠశాల భవనాల రంగును మార్చడం కన్నా విద్యా ప్రమాణాలను మెరుగుపరిచే చర్యలు తీసుకోవాలని సూచిస్తున్నారు. ఏది ఏమైనా, ఒడిశాలో ప్రభుత్వ పాఠశాలల రంగుల మార్పు నిర్ణయం విద్యా వ్యవస్థను మాత్రమే కాకుండా, రాజకీయ వ్యవస్థను కూడా ప్రభావితం చేసే అంశంగా మారింది.