సిమ్ కార్డుల వినియోగం విషయంలో కేంద్ర టెలికాం విభాగం (DoT) కీలకమైన, కఠినమైన హెచ్చరికలు జారీ చేసింది. అవసరం ఉన్నా లేకున్నా ఇష్టం వచ్చినట్లు సిమ్లను కొనుగోలు చేసి పక్కన పడేయడం, లేదా వాటిని ఇతరులకు ఇవ్వడం వంటివి చేయవద్దని సూచించింది. ఒకరి పేరు మీద కొనుగోలు చేసిన సిమ్ను వేరే వారికి ఇవ్వడం లేదా నకిలీ డాక్యుమెంట్లతో కొనుగోలు చేసిన సిమ్ కార్డులను వాడటం నేరం కిందికి వస్తుందని స్పష్టం చేసింది. ఒకవేళ ఆ నంబర్తో సైబర్ మోసాలు లేదా ఇతర చట్ట వ్యతిరేక కార్యకలాపాలకు పాల్పడినట్లయితే, ఆ నేరాలకు పాల్పడిన వారితో పాటు, సిమ్ కార్డు ఎవరి పేరు మీద ఉందో వారిని కూడా బాధ్యులుగా పరిగణించి కఠిన చర్యలు తీసుకుంటామని హెచ్చరించింది. పౌరులందరికీ సురక్షితమైన టెలికమ్యూనికేషన్ వ్యవస్థను అందించడంలో భాగంగా ఈ మార్గదర్శకాలను జారీ చేసినట్లు DoT తెలిపింది.
Challans: వాహనదారులకు గుడ్న్యూస్ చలాన్లపై 50 శాతం డిస్కౌంట్
టెలికాం విభాగం ముఖ్యంగా IMEI (ఇంటర్నేషనల్ మొబైల్ ఎక్విప్మెంట్ ఐడెంటిటీ) ట్యాంపరింగ్పై తీవ్ర హెచ్చరికలు చేసింది. IMEI నంబర్ ట్యాంపర్ చేసిన మోడెమ్లు, మాడ్యూల్స్, సిమ్ బాక్స్లను కొనుగోలు చేయడం లేదా ఉపయోగించడం నేరం అని తేల్చి చెప్పింది. సెల్ఫోన్లతో పాటు ఇతర ఎలక్ట్రానిక్ డివైజుల్లో IMEI నంబర్ను ట్యాంపరింగ్ చేస్తే, మూడు సంవత్సరాల వరకు జైలు శిక్ష, రూ. 50 లక్షల వరకు జరిమానా విధించే అవకాశం ఉందని DoT స్పష్టం చేసింది. కొన్ని సందర్భాల్లో జైలు శిక్ష, జరిమానా రెండూ కలిపి విధించే అవకాశం కూడా ఉంటుందని పేర్కొంది. కాలింగ్ లైన్ ఐడెంటిటీ (CLI) మార్చడం వంటి చర్యలు కూడా చట్ట వ్యతిరేకమేనని హెచ్చరించింది. చట్టపరమైన చిక్కులు, భారీ జరిమానాల నుంచి తప్పించుకోవడానికి పౌరులు తమ సిమ్ కార్డులు, మొబైల్ డివైజుల విషయంలో అత్యంత జాగ్రత్తగా ఉండాలని సూచించారు.
అంతేకాకుండా, తమ మొబైల్ పరికరం సురక్షితంగా ఉందో లేదో తెలుసుకునేందుకు DoT ఒక సులభమైన మార్గాన్ని అందుబాటులోకి తెచ్చింది. పౌరులు తమ మొబైల్ సేఫ్గా ఉందో లేదో తెలుసుకోవడానికి సంచార్ సాథి (Sanchar Saathi) పోర్టల్ లేదా మొబైల్ యాప్ను ఉపయోగించవచ్చు. లేదా 14422 నంబర్కు KYM నంబర్ అని సందేశం పంపడం ద్వారా తమ డివైజ్ వివరాలను తెలుసుకోవచ్చు. దీని ద్వారా మొబైల్ బ్రాండ్ నేమ్, మోడల్, తయారీ వివరాలతో కూడిన సందేశం DoT నుంచి తిరిగి వస్తుంది. టెలికాం వనరుల దుర్వినియోగాన్ని నివారించి, పౌరుల భద్రతను పెంచే లక్ష్యంతోనే ఈ చర్యలన్నీ చేపట్టామని DoT పేర్కొంది. అందువల్ల, ప్రతి ఒక్కరూ తమ పేరిట ఉన్న సిమ్ కార్డులు, వాటి వినియోగం పట్ల పూర్తి బాధ్యత వహించడం తప్పనిసరి.
Read hindi news: https://hindi.vaartha.com
Epaper : https://epaper.vaartha.com/