బీజేపీ(BJP) నూతన జాతీయ అధ్యక్షుడిగా బాధ్యతలు స్వీకరించిన నితిన్ నబిన్కు కేంద్ర ప్రభుత్వం జెడ్-కేటగిరీ భద్రతను కల్పించింది. ఆయన భద్రతపై ముప్పు ఉందని ఇంటెలిజెన్స్ బ్యూరో (IB) సమర్పించిన నివేదిక ఆధారంగా కేంద్ర హోం మంత్రిత్వ శాఖ ఈ కీలక నిర్ణయం తీసుకుంది. ఇకపై నితిన్ నబిన్కు సెంట్రల్ రిజర్వ్ పోలీస్ ఫోర్స్ (CRPF) కమాండోలు రక్షణ కల్పించనున్నారు.
Read Also: BJP: జాతీయ అధ్యక్షుడిగా నితిన్ నబీన్
పర్యటనలు, నివాసం వద్ద 24 గంటల భద్రత
కేంద్ర ఆదేశాల ప్రకారం నితిన్ నబిన్ దేశవ్యాప్తంగా చేసే పర్యటనల సమయంలో, బహిరంగ సభల్లో పాల్గొనేటప్పుడు, అలాగే ఆయన నివాసం వద్ద సీఆర్పీఎఫ్ దళాలు 24 గంటల పహారా కాస్తాయి. సాధారణంగా ప్రముఖ రాజకీయ నేతలు, కేంద్ర మంత్రులకు ఇలాంటి ఉన్నతస్థాయి భద్రతను ప్రభుత్వం అందిస్తుంది. గతంలో బీజేపీ అధ్యక్షుడిగా పనిచేసిన జేపీ నడ్డాకు కూడా ఇదే తరహా రక్షణ కల్పించిన సంగతి తెలిసిందే.
నితిన్ నబిన్ను 2025 డిసెంబర్లో పార్టీ వర్కింగ్ ప్రెసిడెంట్గా నియమించినప్పటి నుంచే భద్రతా ఏర్పాట్లు అమల్లోకి వచ్చాయి. తాజాగా ఆయన ఏకగ్రీవంగా పూర్తి స్థాయి జాతీయ అధ్యక్షుడిగా ఎన్నిక కావడంతో భద్రతను జెడ్-కేటగిరీకి అప్గ్రేడ్ చేశారు.
పిన్న వయసులో కీలక బాధ్యతలు
46 ఏళ్ల నితిన్ నబిన్ బీజేపీ(BJP) జాతీయ అధ్యక్ష పదవి చేపట్టిన అత్యంత పిన్న వయస్కుడిగా గుర్తింపు పొందారు. బీహార్లోని బంకీపుర్ నియోజకవర్గం నుంచి ఐదుసార్లు ఎమ్మెల్యేగా గెలిచిన ఆయన, గతంలో రాష్ట్ర మంత్రిగా కూడా పనిచేశారు. పశ్చిమ బెంగాల్, అసోం, తమిళనాడు, కేరళ వంటి రాష్ట్రాల్లో త్వరలో జరగనున్న అసెంబ్లీ ఎన్నికల నేపథ్యంలో ఆయన విస్తృతంగా పర్యటించనున్నందున భద్రత కట్టుదిట్టం చేయడం అవసరమని అధికారులు భావిస్తున్నారు.
Read hindi news: hindi.vaartha.com
Epaper: epaper.vaartha.com
Read Also:
