బిహార్ అసెంబ్లీ ఎన్నికలు ఈసారి చారిత్రాత్మక రికార్డులను సృష్టించాయి. దేశవ్యాప్తంగా ఎన్నికల ఉత్సాహం తగ్గిపోతుందనే సమయంలో, బిహార్ ప్రజలు చూపిన ప్రజాస్వామ్య చైతన్యం దేశానికి ఆదర్శంగా నిలిచింది. మొదటి దశలో 65.08%, రెండో దశలో 68.76% ఓటింగ్ నమోదవ్వడంతో, మొత్తం ఓటింగ్ శాతం 66.91% చేరింది. ఇది 1951లో జరిగిన తొలి అసెంబ్లీ ఎన్నికల తర్వాత ఆ రాష్ట్రంలో నమోదైన అత్యధిక ఓటింగ్గా గుర్తింపు పొందింది. ఈ సారి గ్రామీణ ప్రాంతాల నుండి పట్టణాల వరకూ ఓటర్ల స్పందన ఉత్సాహభరితంగా కనిపించింది. రాజకీయ విశ్లేషకుల అభిప్రాయం ప్రకారం, ఈ అధిక ఓటింగ్ ప్రజల్లో మార్పు పట్ల ఉన్న ఆసక్తిని ప్రతిబింబిస్తోంది.
ప్రత్యేకంగా మహిళా ఓటర్ల పాల్గొనడం ఈ ఎన్నికల ప్రధాన ఆకర్షణగా నిలిచింది. బిహార్లో మహిళల ఓటింగ్ శాతం 71.6% దాటడం రికార్డు స్థాయి. పురుషులతో పోలిస్తే ఎక్కువ శాతం మహిళలు ఓటు హక్కు వినియోగించుకోవడం రాష్ట్ర రాజకీయాల్లో సానుకూల మార్పుకు దారి తీస్తుందని నిపుణులు భావిస్తున్నారు. మహిళలు ఇప్పుడు కేవలం ఓటర్లు మాత్రమే కాకుండా, రాజకీయ దిశను నిర్ణయించే శక్తిగా ఎదుగుతున్నారనే విశ్లేషణకు ఇది బలాన్నిస్తోంది. ఈసారి మహిళా ఓటర్ల ప్రాధాన్యం గ్రామీణ అభివృద్ధి, భద్రత, విద్య, ఉపాధి వంటి అంశాలపై ఎక్కువగా కేంద్రీకృతమైందని చెబుతున్నారు.
ఇక ఎన్నికల ఫలితాలు ఈ నెల 14న వెలువడనున్నాయి. అయితే, ఇప్పటికే ప్రకటించిన ఎగ్జిట్ పోల్స్ ప్రకారం, ఎన్డీఏ (NDA) కూటమికే అధిక ఆధిక్యం లభించే అవకాశాలు ఉన్నట్లు అంచనా వేస్తున్నాయి. ముఖ్యంగా నితీష్ కుమార్ నేతృత్వంలోని జేడీయూ, బీజేపీ కలయిక ఈసారి కూడా ఆధిక్యాన్ని కొనసాగిస్తుందని సర్వేలు సూచిస్తున్నాయి. అయితే మహాఘటనకూటమి కూడా గ్రామీణ ఓటర్ల మద్దతుతో గట్టి పోటీ ఇస్తుందనే అంచనాలు ఉన్నాయి. ఏదేమైనా, ఈసారి బిహార్ ఎన్నికలు కేవలం శాతం గణాంకాలకే పరిమితం కాకుండా ప్రజాస్వామ్య చైతన్యానికి కొత్త మైలురాయిగా నిలిచాయి.
Read hindi news: https://hindi.vaartha.com
Epaper : https://epaper.vaartha.com/