బెంగళూరులో మెట్రో ట్రైన్ ఛార్జీలు పెరిగాయి, దీంతో రోజువారీ ప్రయాణికులపై అదనపు భారం పడనుంది. కొత్త టికెట్ ధరలు నేటి నుంచి అమల్లోకి రానుండగా, కనిష్ఠ ఛార్జీ రూ.10గా, గరిష్ఠ ఛార్జీ రూ.90గా నిర్ధారించారు. గతంలో గరిష్ఠ ఛార్జీ రూ.60గా ఉండగా, ఇప్పుడు దాన్ని రూ.90కి పెంచారు. మెట్రో ప్రయాణికుల కోసం దూరాన్ని ఆధారంగా చేసుకుని ఛార్జీలను విభజించారు. 0-2 కిలోమీటర్ల దూరానికి రూ.10, 2-4 కిలోమీటర్లకు రూ.20, 6-8 కిలోమీటర్లకు రూ.40, 8-10 కిలోమీటర్లకు రూ.50, 20-25 కిలోమీటర్లకు రూ.80, 25-30 కిలోమీటర్ల దూరానికి రూ.90గా నిర్ణయించారు.
ప్రయాణికుల భారం కొంతవరకు తగ్గించేందుకు, స్మార్ట్ కార్డుదారులకు 5% డిస్కౌంట్ను కొనసాగిస్తున్నట్టు అధికారులు ప్రకటించారు. ఇది తరచుగా మెట్రోను ఉపయోగించే వారికి కొంతవరకు ఊరటనిచ్చే అంశం. అయితే, సాధారణ టికెట్ ప్రయాణికులు మాత్రం పెరిగిన ఛార్జీలను భరించాల్సి వస్తోంది. మెట్రో ఛార్జీలు పెరగడం వలన సాధారణ ప్రయాణికులు తీవ్రంగా ప్రభావితమవుతున్నారు. రోజూ మెట్రోలో ప్రయాణించే ఉద్యోగస్తులు, విద్యార్థులు పెరిగిన ధరలతో అసౌకర్యానికి గురవుతున్నారు. కొంతమంది ప్రయాణికులు ఈ ఛార్జీ పెంపు నిర్ణయంపై తమ అసంతృప్తిని వ్యక్తం చేశారు. ఇటీవలే కర్ణాటక రాష్ట్ర రోడ్డు రవాణా సంస్థ (ఆర్టీసీ) కూడా ఛార్జీలను 15% పెంచిన విషయం తెలిసిందే. ఇప్పుడు మెట్రో ఛార్జీలు కూడా పెరగడంతో సాధారణ ప్రజలపై మరింత ఆర్థిక భారం పడుతోంది. పెరిగిన ఛార్జీలతో ప్రజలు ప్రత్యామ్నాయ రవాణా మార్గాలను అన్వేషించే అవకాశముందని విశ్లేషకులు భావిస్తున్నారు.