దేశ రాజధాని ఢిల్లీలోని చారిత్రాత్మక ఎర్రకోట సమీపంలో జరిగిన పేలుడు ఘటన తీవ్రతపై కేంద్ర హోంమంత్రి అమిత్ షా కీలక సమాచారాన్ని పంచుకున్నారు. ‘యాంటీ టెర్రరిజం కాన్ఫరెన్స్-2025’లో ఆయన మాట్లాడుతూ, ఈ దాడిలో ఉగ్రవాదులు సుమారు 40 కేజీల అత్యంత శక్తివంతమైన పేలుడు పదార్థాలను ఉపయోగించినట్లు ప్రాథమిక విచారణలో తేలిందని చెప్పారు. అయితే, భద్రతా దళాల అప్రమత్తత వల్ల పెను ప్రమాదం తప్పిందని, పేలడానికి సిద్ధంగా ఉన్న మరో 3 టన్నుల భారీ పేలుడు పదార్థాలను అవి డిటోనేట్ (పేలడం) కాకముందే స్వాధీనం చేసుకున్నామని ఆయన వెల్లడించారు. ఈ భారీ నిల్వలు గనుక పేలి ఉంటే ఊహించని స్థాయిలో ప్రాణ, ఆస్తి నష్టం సంభవించి ఉండేదని ఆయన ఆందోళన వ్యక్తం చేశారు.
Madras HC: చిన్నారులకు సోషల్ మీడియా బ్యాన్పై కేంద్రానికి హైకోర్టు సూచన
దేశంలో ఉగ్రవాద నిర్మూలనకు రాష్ట్రాల మధ్య సమన్వయం అవసరమని హోంమంత్రి ఈ సందర్భంగా నొక్కి చెప్పారు. ఉగ్రవాద వ్యతిరేక పోరాటంలో దేశవ్యాప్తంగా పోలీసులందరికీ ఒకే విధమైన విధానం ఉండాలని, అందుకోసం త్వరలోనే ‘కామన్ ఏటీఎస్’ (ATS – Anti-Terrorism Squad) విధానాన్ని అమలులోకి తీసుకురావాలని అన్ని రాష్ట్రాల డీజీపీలను కోరారు. ఉగ్రవాదులు కొత్త కొత్త సాంకేతికతలతో దాడులకు పాల్పడుతున్న తరుణంలో, అన్ని రాష్ట్రాల ఏటీఎస్ విభాగాల మధ్య సమాచార మార్పిడి మరియు ఆపరేషన్ల నిర్వహణలో ఏకరూపత ఉండాలని ఆయన సూచించారు. దీనివల్ల నిఘా వ్యవస్థ మరింత పటిష్టమవడమే కాకుండా, ఉగ్ర కుట్రలను ముందే పసిగట్టే అవకాశం ఉంటుందని ఆయన అభిప్రాయపడ్డారు.
భద్రతా వ్యవస్థల పనితీరులో ప్రాథమిక మార్పు రావాలని అమిత్ షా పిలుపునిచ్చారు. ఇప్పటి వరకు అనుసరిస్తున్న “అందరూ తెలుసుకోవాలి” (Need to know) అనే పరిమిత విధానం కంటే, “అందరికీ తెలియజేయాలి” (Duty to share) అనే సూత్రంతో ముందుకు సాగాలని ఆయన స్పష్టం చేశారు. ఒక రాష్ట్రంలో లభించిన కీలక సమాచారాన్ని ఇతర రాష్ట్రాల భద్రతా సంస్థలతో తక్షణమే పంచుకోవడం వల్ల ఉగ్రవాదుల కదలికలను అడ్డుకోవడం సులభతరం అవుతుందని చెప్పారు. జాతీయ భద్రత విషయంలో రాజీ పడే ప్రసక్తే లేదని, ఉగ్రవాదాన్ని మూలాల నుంచి పెకిలించేందుకు కేంద్రం అన్ని విధాలా సిద్ధంగా ఉందని హోంమంత్రి పునరుద్ఘాటించారు.
Read hindi news: hindi.vaartha.com
Epaper : epaper.vaartha.com
