మరోసారికేజ్రీవాల్ విపశ్యన ధ్యానానికి వెళ్లనున్నారు

ఢిల్లీ మాజీ ముఖ్యమంత్రి ఆమ్ ఆద్మీ పార్టీ అధినేత అరవింద్ కేజ్రీవాల్ మరోసారి విపశ్యన ధ్యానానికి వెళుతున్నారు. ఢిల్లీలో అధికారాన్ని కోల్పోయిన తర్వాత, కేజ్రీవాల్ పార్టీ కార్యక్రమాల్లో మినహా బహిరంగంగా ఎక్కడా కనిపించలేదు. తాజాగా, ఆయన పది రోజుల పాటు విపశ్యన ధ్యాన కార్యక్రమంలో పాల్గొననున్నట్లు సమాచారం.

విపశ్యన ధ్యానం

ఇందుకోసం ఆయన పంజాబ్‌లోని హోషియార్‌పుర్ వెళ్లనున్నారని పార్టీ వర్గాలు తెలిపాయి. ఈ నెల 5 నుంచి 15 వరకు ఆయన ధ్యాన కేంద్రంలోనే ఉండనున్నట్లు తెలుస్తోంది. కేజ్రీవాల్ గతంలోనూ విపశ్యన ధ్యానం చేశారు. 2023 డిసెంబర్ నెలలో పది రోజుల పాటు హోషియార్‌పుర్ ధ్యాన కేంద్రంలో ఉన్నారు.

కేజ్రీవాల్ పరాజయం

దేశ రాజధాని ఢిల్లీలో తొమ్మిదేళ్ల పాటు పరిపాలన సాగించిన ఆమ్ ఆద్మీ పార్టీకి ఇటీవల అసెంబ్లీ ఎన్నికల్లో తీవ్ర ఎదురుదెబ్బ తగిలిన విషయం తెలిసిందే. మొత్తం 70 స్థానాలకు గానూ కేవలం 22 స్థానాలకే పరిమితం కావడంతో పాటు స్వయంగా పార్టీ అధినేత కేజ్రీవాల్ కూడా పరాజయం పాలయ్యారు. దీంతో అప్పటి నుంచి కేజ్రీవాల్ బహిరంగ కార్యక్రమాలకు దూరంగా ఉంటున్నారు.

కీలకమైన అంశం

విపశ్యన ధ్యానం కేజ్రీవాల్ జీవితంలో కీలకమైన అంశమని, ఇది ఆయనకు మానసిక ప్రశాంతతను అందించడంలో సహాయపడుతుందని ఆయన అనుచరులు పేర్కొంటున్నారు. కేజ్రీవాల్ ఇటువంటి ధ్యాన కార్యక్రమాల్లో పాల్గొనడం కొత్త కాదు. 2016లో కూడా ఆయన విపశ్యన ధ్యానంలో పాల్గొని ప్రజా జీవితానికి తాత్కాలిక విరామం తీసుకున్నారు. విపశ్యన ద్వారా మనసు ప్రశాంతంగా ఉండేలా చేయడం, ఎలాంటి ఒత్తిడులను అయిన అధిగమించడం సాధ్యమవుతుందని భావిస్తారు.

రాజకీయంగా చర్చ

ఈసారి కేజ్రీవాల్ ధ్యానం రాజకీయంగా చర్చనీయాంశంగా మారింది. అసెంబ్లీ ఎన్నికల్లో జరిగిన పరాజయంతో పాటు కేంద్ర ప్రభుత్వానికి వ్యతిరేకంగా కొనసాగుతున్న విచారణల మధ్య ఆయన ధ్యానంలో పాల్గొనడం విభిన్న వ్యాఖ్యలకు దారి తీసింది. అయితే, కేజ్రీవాల్ తన ఆరోగ్యం మరియు మానసిక స్థితిని మెరుగుపరచుకోవడం కోసమే విపశ్యన ధ్యానం చేస్తున్నారని ఆప్ వర్గాలు స్పష్టం చేస్తున్నాయి.

ఇటీవల రాజకీయ ఒత్తిళ్లు, పరాజయాల వల్ల కేజ్రీవాల్ వ్యక్తిగతంగా ఒత్తిడిని ఎదుర్కొంటున్నట్లు రాజకీయ విశ్లేషకులు భావిస్తున్నారు. అటువంటి పరిస్థితుల్లో ధ్యానం ద్వారా ఆయన మళ్లీ తన శక్తిని, ఉత్సాహాన్ని పెంపొందించుకోవచ్చని, రాబోయే రోజులలో రాజకీయంగా మరింత ముమ్మరంగా వ్యవహరించవచ్చని వారు అంచనా వేస్తున్నారు. కేజ్రీవాల్ తిరిగి ప్రజల ముందుకు వచ్చి రాజకీయంగా క్రియాశీలకంగా వ్యవహరించేందుకు ఈ విపశ్యన ధ్యానం సహాయపడుతుందని పార్టీ వర్గాలు విశ్వాసం వ్యక్తం చేస్తున్నాయి.